JEREMIAH 51 - LEKHARABU INTHENG (BSI)

Babylon Chunga Ṭongtansa nôk

¹ Rōngpu’n ahri, “Ke’n Babylon leh amihei chunga, ankasuset sik thlipui kajōngtir.

² Thli’n sapôt asêm manjōng kapōa, Babylon kasuk inhmang sik a ram hlop mi kajōngtir sik hei. Khava kani kha ajōng tlung pha leh, anmani’n arakir rakip a anhei buhlu sik khana ram kha akarōk hêra andahlon sik.

³ Anremi he’n anthe ankâp sōtna sik pha pek mak hei ruh a-emak leh anrevon invonna pha manhmu mak hei ruh. Anrether hei kha ṭhenmak hei ruh. Remi rakip suk manhmang hei ruh!

⁴ Anmani kha intôn sik heia kha ankhōpui hlamdung heia kathi sik hei.

⁵ Israelhei A’ntheng Inkhat, kei dōina Israel leh Judah he’n antlo jo’num Chunghnung Rōngpu Pathen ke’n dahlon mak hei ning!

⁶ Babylona inphut tlânsōt ruh! Nanhringkhō sik a tlân ruh! Babylonhei set jâra thimak ruh. Tûnchu ke’n phu kahlōa arahōi kasōk karâkna kha kapek sik kae.

⁷ Babylon hi kakut chunga sana kōklei inkhat, vânhnōi ralei ju amanrui hei khava kapō kha kae. Jât he’n aju kha an-ina amanvet hei.

⁸ Babylon kha manhret manloa katlu jo khana sukset jo kae! Achunga ṭajai sui ruh! A’ntônna bia kano sik hlei vajongpek ruh, damthei um aja a kae.

⁹ Khana ka-om ram hlop mihe’n anhri, “Babylon inthōpuina sik intluk ung, tâk pha kha kathlengrei jo. Tûnchu amanu hi dahlon me sona inna inle jo rih. Pathen in Babylon hi aratha neina senga karâkna apek a asuk manhmang cher joa kae.’”

¹⁰ Rōngpu’n ahri, “Kamihei, ông ruh, ‘Rōngpu’n eini kadik me tia amalâr jo. Eini se rih, Jerusalema mihei hneng, Rōngpu ni-Pathen ṭōntlo hi, vamanthei hei rih.’”

¹¹ Rōngpu’n Babylon sukset sik a a’ntluk jâra, Media renghei akachok jo hei. Abek-inn anmanset jâra anchunga phu ahlō sik kha, khava jo kha kae. Re kabuhlu ṭōnkarônpa khan ṭong apek, “Nanthe katât man ngei ruh! Nanpho hei mantluk ruh!

¹² Babylon kurbanghei buhluna sik a mêrchîkna nei ruh. Repa hngâkna kha manngar chet ruh! Repa kahngâk da hei ruh! Akabuhlu sik a rerup da hei ruh!” Rōngpu’n Babylon mihei chunga, atlo sik tia ahri kha atlo jo kae.

¹³ Khava ram kha tuidung katamtak leh karōi katamtak anei, tâk apha kathleng jo, ahringna hrui kha intan jo.

¹⁴ Chunghnung Rōngpu’n ahringkhō khet apan a intep jo, Babylon kabuhlu sik mi katamtak, khâikhu jâm kapōa aheiṭhōi sik hei, khana anmani’n retorna ka-ông sik hei.

Pathen Manpâkna Hla

¹⁵ Pathen in arathahrat vâng ralei hi asyem; ama singna vâng vânhnōi asyem, khana marvân amazer hei.

¹⁶ Ama ṭongpek a, bōirōk chunga khōtui kha inri; ama’n ralei bângna inphut sumtuk ahei choi hei. Ama’n khōtui shunga khō inphe asyem, akarōi manbukna inphut thli ajōngtir.

¹⁷ Hiva hmun a hin, mihringhei kamo heia inhmak a ka-om hei; lim kasyem hei khan hmit vârna annei ajârchu an-pathen syem hei kha akadik mak leh hringna kaneimak hei kae.

¹⁸ Anmani hnemna kase, donmak sik hei kae; Rōngpu kha anchunga ṭōnkatlo ajōng pha leh anmani suk manhmang sik jo hei kae.

¹⁹ Jacob Pathen khachu, anmani kapō changmak; ama chu heirakip kasyempa kae, khana Israelhei hi ama mikhet sik a akadei jo hei kae. Chunghnung Rōngpu kha arahming kae.

Rōngpu Sekbung

²⁰ Rōngpu’n ahri, “Babylon, nang kare hmangchâk kasekbung che kha kae. Ke’n jât-hei leh rengramhei vōk manchipna kahmang che.

²¹ Shakorhei leh akachōng hei vōk mannōina, shakor gâri leh akachōng hei vōk mannōina,

²² Pase leh nuhmeihei thatna, kater leh naipanghei thatna, rether leh nuhngâk-hei thatna,

²³ kemōng kakhemhei leh ankemōng rup thatna, hlei kakhōi hei leh antahmang shakorhei thatna, khana vaikarônhei leh ṭōnkarônhei vōk manchipna sik a kaleihmang che kae.”

Babylon Karâkna

²⁴ Rōngpu’n ahri, “Nangni’n Babylon leh amihei Jerusalem chunga ṭōnse antlona rakip jâra ke’n anchunga katlo malena kha nanhmu sik.

²⁵ Babylon, nang hi raleichung pumpui kasuk inhmang hmebung inkhat kapō che kae, tâk-kha Rōngpu kei hi nang kadōi eng kae. Ke’n nang kasur sik chea kha, ralei hmai leh in-angtlinga phaicham kamanchang sik che khana ravut a kada sik che.

²⁶ Nang insuksetna khanna hlung inkhat rōk um, athera inn sak nôkna inhmang mak ning. Nang chu nêrdiram kachang thang sik jo che. Rōngpu ke’n kahri jo kae.

²⁷ “Buhluna sik mêrchîkna kha pek hei ruh! Jât-hei tathei sik apengkun tum ruh! Babylon dōina re kakōn sik jât-hei intluk ruh! Ararat, Minni, khana Ashkenaz rengramhei kha re kabuhlu sik a manthei hei ruh. Buhluna hlamkakei sik a kadei ruh. Khâikhuhei kapōa shakorhei kha vaṭhōi hei ruh.

²⁸ Babylon dōina re katuk sik jât-hei intluk ruh. Media renghei, anhlam kakeihei, aṭōn karônhei leh anvai rônna ram shunga remihei seng vabek hei ruh.

²⁹ Rōngpu’n, Babylon kha tûte om makna sik, ram kachi manchangna sik aṭōn mantluk kha aheitlosōt pha, raleichung pumpui intlira innok jo.

³⁰ Babylon remihei kha rekur shunga re tlo loa ka-om hnâm jo hei. Anmani inngamna inhmang jo, atloje manhret mak jo hei. Ankhōpui kur kot kakōi jo hei, khana an-innhei hmei in akâng jo hei.

³¹ Babylon rengpa hneng ṭong inthlung mi abân bâna kahong heia akhōpui bâng rakir manlia kakōi jo tia anhong manthei.

³² Re kasō he’n tuidung rakanna anhlō joa rekurhei kha hmeia anro jo hei. Babylon remihei ṭit a inhmak jo hei.

³³ Sôt lolaia remi he’n saphōr hmun a sapâr kapōa, anta-âttan heia raleia antachōn rachi sik jo hei kae. Rōngpu Akahratpen, Israel Pathen ke’n kahri jo kae.”

³⁴ Babylon rengpa’n Jerusalem amadea khana aleisâk jo. Ama’n khōpui kha bephu kapōa amanrōk; khōhri kapōa amadê. Ama’n amadu kha alosōt, alakseng kha ahlon sōt hei.

³⁵ Zion mihe’n hinga hri hei rasoh, “Kanchunga rethat mithat antlo jâra Babylon chunga mô ṭumna kha tlung rasoh!” Jerusalem mihe’n hinga hri hei rasoh, “Keini’n inrengna kanthōk jâra Babylon chunga mô ṭumna kha tlung rasoh!”

Rōngpu ’n Israel A’nthōpui sik

³⁶ Khava jâra Rōngpu’n Jerusalem mihei hneng ahri, “Ke’n nanṭong kha kamatu sik, khana nan-inrepuihei khan nachunga anleitlona kha kaman pek male sik che. Ke’n, Babylonhei tuihnar kamankang sik a kha antuidung hei kamanchâr sik.

³⁷ Khava ram kha neinâk inset bukna kamanchang sik, khana khan ramshahei ka-om sik hei. Khavakha enngam timak ning; tûte om mak hei ning, akahmu rakip inpir sik hei.

³⁸ Babylon mi ankhenga shabakkai kapōa inhrung sik hei, khana shabakkai tehei kapōa intuma insang sik hei.

³⁹ Anmani akalôp hei mo? Ke’n revei sâktlâng inkhat kamantluk pek sik hei, khana ju kaman rui heia kamanhōi sik hei. Anmani khō manhret loa kaje sik hei, thōimak jo hei ning.

⁴⁰ Anmani kemōngte, ke, khana kemōngchehei kapōa thatsōt sik a kakei sik hei. Rōngpu ke’n kahri jo kae.”

Babylon Vângset

⁴¹ Rōngpu’n Babylon chungchânga ahri, “Vânhnōi ralei pumpui tamanpâk khōpui kha re tuk a mihe’n anhlō khum jo. Jât-hei hmit-enna heituk a Babylon kha enngam ka-om mak jo mo!

⁴² Tuipui in-nông in Babylon avûrsi, tui inhrung khan achunga amakhusi.

⁴³ Khōpuihei kha hmit ena enngam om mak, tui om makna ram kachi tûte om makna, mihring inlôn phung makna hmun anpō jo.

⁴⁴ Ke’n Babylon pathen Bel karâkna kapek sik, khana amarûk a anei ahao hei kha kamansōsōt sik hei, jât he’n avea kamuk nôk mak jo hei ning. “Babylon kurbanghei kachim inset jo hei.

⁴⁵ Israel mihei khana inphut tlânsōt ruh! Kahnuknat inhnaktak a inphut nanhringna sik tlânsōt ruh.

⁴⁶ Ṭong inhri nanthei jâra inngam makna neimak ruh khana nanṭit manse mak ruh. Akumtina ṭong hlop-hlop inhri ri, ram shunga rethat mithat ṭong, reng inkhat leh reng inkhat re intukna inthei.

⁴⁷ Khang’khan ke’n Babylon limsyemhei chunga ṭōn katlona sik pha hong katlung jo. Aram pumpui inzakna kamanchen sik, khana amihei seng thatsō pet sik hei kae.

⁴⁸ Akasukset sik a sak tinga mi akajōng hei kut chunga Babylon kha atlu pha, raleichunga leh marvân chunga aka-om rakip in inpâk a ka-ông sik hei.

⁴⁹ Babylon in vânhnōi ralei mihei thina amasō, khana Israel mi katamtak hei thina amasō jâra tûnchu Babylon hi akatlu sik kae. Rōngpu ke’n kahri jo kae.”

Babylona Israelhei hneng Pathen Ṭong mathlung

⁵⁰ Rōngpu’n Babylona amihei hneng ahri: “Nangni thina kha nanpek sōt jo! Tûnchu se ruh! Hngâk mak jo ruh! Nangni nan-inna inphut ram kahla a nan-om inum, nan-Rōngpu, kei chunga mandonna nei ruh, khana Jerusalem kha mandonsōt ruh.

⁵¹ Nangni’n nanti, “Keini hi hmaimôkna kanchen jo khana inzakna anpek jo ung; heite inthōpui kaneimak kachang jo ung, ajârchu ram hlop mihe’n Bek-inna hmun intheng hei anhlōsō jo.

⁵² Khava jâra, ke’n Babylon limsyemhei chunga ṭōn katlona sik pha kha katluk jo tia kahri kae, khana ram shung pumpuia a’ntôn hei khan inkōi sik heia kae.

⁵³ Babylon in bōirōk chunga ake tor a rekur kahnettak asyem inum, ke’n akasukset sik mi katir sik hei. Rōngpu ke’n kahri jo kae.”

Babylon chunga Akakhe chet a Suksetna

⁵⁴ Rōngpu’n ahri, “Babylona mi kaṭap rasa, aram shung sukset jâra ṭajai suina so rangei ruh.

⁵⁵ Ke’n Babylon kasukset sik, khana kamandâi hnger sik. Remihei kha tuipui in-nông inhrung kapōa katlân inhlut hei khana rasa inhnaktak a anbuhlu.

⁵⁶ Anmani Babylon kasukset sik kahong hei; anremihei kha ansur hei, khana anthe ansai hei ansuk thlek pek hei. Kei hi akaṭhamak karâkna kapek, Pathen inkhat eng kae, arahōi kasōk hrep a Babylon chunga ṭōn katlo sik.

⁵⁷ Ke’n avaikarônhei, ami kasinghei, ahlam kakeihei, khana aremihei ju kaman rui sik hei. Anmani kaje sik hei khana thōimak hei ning. Rn ke’n kahri jo kae; Kei Akahratpen Rōngpu eng kae.

⁵⁸ Akahrat Babylon kha raleia hlon mathla sik kae, akekot ber inshâng hei kha romathlâk sik hei kae. Jât-hei ṭōntlo rakip akhenga hnemna kase kae; anrahnak tlona kha hmeimalea kajongsōt hei. Akahratpen Rōngpu ke’n kahri jo kae.”

Babylonhei hneng Jeremiah Ṭong Mathlung

⁵⁹ Reng Zedekiah inzenpa kha Neria sapa, Mahseiah tupa Seraiah kae. Zedekiah’n Judah reng achang kum 4 atluk a hin ama leh inthoia Seraiah kha Babylona kase, khana ke’n ama hneng mansena ṭong ajing kaleipek.

⁶⁰ Ke’n Babylon chunga suk mansetna ahong kasōk sik leh omchen ralak ahong kasōk sik seng kha lekharabu inkhat a kamazet a kae.

⁶¹ Ke’n Seraiah kamanthei, “Nang Babylon natlung pha leh, hiva lekharabu inzet hi mihei hneng rasa inhnaktak a nateisōt sik kae.

⁶² Khava sōa hinga derna nei roh, ‘Rōngpu, nang in hiva hmun hin, mihringhei leh ranhei achanga heite akahringa a-om makna sik a, khana ahei tik a ram kachi akachang sik a nasuk manset sik tia naleihri joa kae.’

⁶³ Seraiah, hiva lekha hi nateisō pha leh hlung inkhat leh khit mankop ina, Euphrates Tuidunga hlon manhlut roh

⁶⁴ khana hri roh, ‘Hivahi Babylona akasōk sik omchen kha kae, Rōngpu’n Babylon chunga suksetna amathlung sik jo jâra khan ama kha katla inhlut sik a kha heisōksōt hêrmak jo ning.’” Jeremiah ṭonghei kha hin achai jo.