JEREMIAH 5 - LEKHARABU INTHENG (BSI)

Jerusalem Setna

¹ Jerusalem mipuihei nanhlamdung heia tlân ruh! Nankimvea khō thlir ruh! Nanbinga sik a en kaṭha ruh! Inveina hmunhei injong ruh! Akadik katlo mi inkhat khana Pathen hnenga taksenthei kachang nanhmutor sik mo? Nanhmutor inchu Rōngpu’n Jerusalem kha arangei mandam sik.

² Rōngpu kha kankamuk nanti’num, nantati kha tlomak chei.

³ Rōngpu’n taksenthei kachang kha ajong kae. Ama’n nangni avōk jo chei, tâk rangei dekmak chei; ama’n asukset chei, tâk inchu hnōmdek mak chei. Nanracham kase khana nansetna inphut hei inhe mak tin chei.

⁴ Khan chu ke’n kamandon, “Hihei hi sara leh a’nhret mak rōk hei kae. Anmani kamotak a kachôn hei; an-Pathen in heimo arangei ti hi manhret mak hei, An-Pathen in heimo amantlo hnōm hei ti kha manhret mak hei.

⁵ Kei ratha kanei mihei hneng kase sik eng khana anmani leh inbek sik ung. Anmani’n an-Pathen tamadu kha, an-Rōngpu tamantlo hnōm hei kha anmanhret sik.” Tâk-kha ankhengpet in Rōngpu tlotorna kha donmak jo hei khana juihnōm mak hei.

⁶ Khava jâra ratua inphut shabakkai he’n anthat sik hei; nêrdiram a kahne he’n ahar-ahak a ankeihler sik hei, rûtnu’n ankhōpuihei anhlō sik hei. Khava mihei khan ansōksōt inchu anmani ankeihler sik hei ajârchu ansetna katam hêr jo khana ave-avea Pathena inphut inhesōt heia kae.

⁷ Rōngpu’n ader, “Heijâra mo kamihei setna karangei mandam sik hei? Anmani’n kei anni dahlon jo khana akadik mak pathen ankamuk jo hei. Kamihei anvon khopmak kârseng kavei hei, tâk anmani’n kajông heia, khana noti hei leh anpha kha anhmang joa kae.

⁸ Anmani kha vei manthai shakor hurna kasip kapō, ankhengpet a insak inthlang hei nuhmei indu hei kapō hei kha kae.

⁹ Hivahei sik jâra ke’n karâkna kapek mak sik hei mo, khana hiva kapō jât-hei chunga ke’n phu kahlō mak sik mo?”

¹⁰ Kamihei vomhrui rahōn katuktan sik a inrepuihei kahei tir sik hei, tâk-kha akhenga chu mantuktan pek mak hei ning. Abâk-hei chu tuktan petna sik a kamanthei sik hei, ajarchu abâk-hei khachu keita changmak hei.

¹¹ Judah leh Israel mihe’n kei anhōn cher jo eng. Rōngpu ke’n kahri jo kae.”

Rōngpu ’n Israel Ahlon sōt

¹² Rōngpu mihe’n ama hnōm mak heia anhri, “Ama’n heite tlotor mak ning. Eini chunga inrengna kha tlamak ning; re leh vonṭâm demak min.”

^13-14 Sânkathemhei kha pangṭonga akaṭonghei kae, Rōngpua inphut ṭonghri sik neimak hei. Rōngpu Akahratpen Pathen in kahnenga ahri, “Jeremiah, hiva mihe’n khanga anhri jâra kaṭong hi nabeia hmei kapō kamanchang sik. Mihei kha thing kapō kachang sik hei, khana hmei khan akâng sik hei kae.”

¹⁵ Israel mihei, nankabuhlu sik a Rōngpu’n ram kahlatak a jât inkhat aheiṭhōi jo heia kae. Hivahi jât kahrat leh jât marō hei kae, anmani ṭong kha nangni’n manhret mak chei.

¹⁶ Anremi the kachoihei kha ratha kanei remihei kae, lungset manhret loa mikathat-hei kae.

¹⁷ Anmani’n nanhmuchi leh nanbu ansâksō pet sik; nansanu nansapa hei anthatpek sik chei. Nanke, nankemōng, nanserup khana nanvomhrui leh nantheichang kunghei ansuk manhmang sik hei. Rekur nanta taksen hei kha anremi he’n ansuk manhmang sik hei.

¹⁸ Rōngpu’n ahri, “Khanga achang inum khava kanihei khan chu kamihei kha ankhenga chu suk manhmang mak hei ning.

¹⁹ Heijâra mo khanga katlo tia anmani’n ander che’nchu Jeremiah, hripek hei roh, anmani’n keia inphut inhesōt heia ram hlop pathenhei kha anrama ankamuk, khava kapōtak a anram kachangmak miram a khōhmehei sepa anvatlo pek sik jo hei.”

Pathen in Amihei Arakôk hei

²⁰ Rōngpu’n ahri, “Jacob sōn leh pârhei hneng hripek hei roh, Judah mihei hneng hripek hei roh.

²¹ Nanmalung manhlut ruh, heite inhret mak hei, hmit chu akaneihei, ahmu chu hmulo hei, kōr chu akaneihei, athei chu theilo hei.

²² Kei Rōngpu eng kae, heisik a mo nantaṭit mak eng? Heisik a mo kahma kunga ṭitpum a a’nnok mak chei? Tuipui ramri sik a ke’n nêrdi hei kha kabuk hei, arakantor mak sik, aka-om ṭhak sik a ramri kae. Tui-ôngpui in asuk lele, tâk-kha khavakha khe tor mak; tui in-nông kha ka-ông thei sik, tâk-kha suk khōitor mak a kae.

²³ Tâk-kha mipui nangni! Nangni nanracham kase, retlo kahrat chei; nanhmai nanmahea nandahlon eng.

²⁴ Ke’n ṭhekhō leh zerkhō khōsûr kahei tir inum, akum katai sâng khôm pha kapek chei inum, kei kajana sik mandon dekmak chei.

²⁵ Khava kanek a, nansetnahei khan akaṭha hei kha nanhnenga inphut amanhmang jo hei.

²⁶ “Kamihei kâra ṭhatmak katlohei kha ka-om hei; vahei surna sik a châng kado hei kapōa mi anhngâk a ka-om hei, khana mihei surna sik a anchâng hei kha ando hei.

²⁷ Shachâng kaleng inkhat in avoshunga va amansipphet kapōa, an-innhei kha marûk neinâk anmansip phet hei. Khava jâra tlotorna annei khana kahaohei,

²⁸ anmani katur hei khana thlai katui ansâk an-in. Anṭōnse tlo abângna om mak. Nu leh pa insamhei ratha mannei mak hei, khana suk manrim mihei kha akadik hripek mak hei.

²⁹ “Tâk Rōngpu ke’n, hiva rakip jâra anmani karâkna kapek sik hei; hiva jât chunga phu kahlō sik kae.

³⁰ Hiva ram shunga ṭit ka-om tak leh malung natna kasōk jo.

³¹ Sânkathem he’n maleisei tei loa heite hrimak jo hei, thempu he’num sânkathemhei ṭongpek a vai anrôn jo, khana kamipui he’num heite inphin mak jo hei. Tâk heirakip ahong inchai pha khan anmani’n heimo antatlo sik jo?”