JEREMIAH 44 - LEKHARABU INTHENG (BSI)

Egypt Ram a Israel Sahei hnenga Rōngpu Ṭong Manrôn

¹ Egypt ram a Israel sa aka-om rakip, Migdol, Tahpanhes khana Memphis khōpui heia leh thlâng intong ram a aka-om hei sik a Rōngpu’n kahnenga ahri.

² Chunghnung Rōngpu Israel Pathen in ahri, “Jerusalem leh Judah khōpui ralak-hei seng chunga suksetna kajōng mathlung kha nangni khet in nanhmu jo. Tûn katlunga’m inhmanga laka-om hei, tûte la-omna mak hei

³ ajârchu anmi he’n ṭōnse antloa kahnuk anmannat a kae. Anmani’num, nangni’num khana nanpa-nanpu he’num anta leikamuk phungmak pathen ralak-hei hneng inthoina antōk a anrazen jo heia kae.

⁴ Ke’n kamater ṭit ka-om ṭōnhei kha nantlo makna sik a ani kahri pek sik a kasōk sânkathem kajōngtir ṭhak hei.

⁵ Tâk-kha nangni’n anṭong rangei mak chei khana nanmalung manhlut mak chei. Nangni’n pathen ralak hnenga inthoina tōkna nanṭōnse tlo kha masō dekmak chei.

⁶ Khava jâra ke’n kahnuknat leh kahnuk inthakna kha Judah khōpuihei chunga leh Jerusalem hlampui heia hmei vânga karo hei kae. Khahei kha tuning katlunga inhmanga, hmit a enngamlotak a ka-om jo hei.

⁷ “Khava jâra Chunghnung Rōngpu, Israel Pathen ke’n tûn nanhnenga ṭongderna kanei chei kae, heisa mo nanbinga khangtuk hrep a ṭōnse nantatlo? Nanmi inkhatbek kahringa a-om makna sik a, pase leh nuhmeihei, sa leh tehei chunga ramna akasōk sik hi nanta madu mo?

⁸ Nangni’n nan-omna sik a nanta heijōn Egypt a limhei nankamuk a pathen ralak hnenga inthoina nantōk a heisik a mo kahnuk nanta mannat? Raleichunga jât he’n sem manlonâ sik chei leh nanrahming kha inhâksêrna anhmangna sik chei, nanbibinga insuk inhmangna sik a hivahi nantatlo mo kae?

⁹ Judah khōpui heia leh Jerusalem hlampuia, nanpu sōnhei, Judah renghei, annuhmeihei ṭōnse leitlo rakip kha nantamahngi jo mo?

¹⁰ Tâk-kha tuning kapha nangni la’nsinsak mak chei. Nangni’n kei akaja mak chei, khan chu nanpu sōnhei leh nangni kapek jo chei dânhei dungjuia om mak chei.

¹¹ “Khava jâra Chunghnung Rōngpu, Israel Pathen ke’n kadōi sik chei khana Judah ram akhenga kasuk manhmang sik kae.

¹² Judah mi dahlona ka-om hei khan, Egypt a anvase leh anvaka-om sik a an-intluk inchu, anmani ankhenga suk manhmangna sik a ahlam ka-en sik. Ankhenga akasin, akalen Egypt a rea achangmak leh ṭâma kathisō sik hei. Anmani enngam changmak hei ning; mihe’n sem anmanlo sik hei; mihe’n anrahming kha hâksêrna anhmang sik jo.

¹³ Ke’n Jerusalem kha re, ṭâm, natse vânga karâkna kapek kapōa, Egypt a aka-om hei kha karâkna kapek sik hei.

¹⁴ Dahlona ka-om hei khana Egypt a anhong leh aka-om sik a a’ntluk Judah mi inkhatbek inphesōt mak ning khana hringmak ning. Anmani inkhatbek in avea omna sik a antarangei Judah ram a he’nle mak hei ning. Rekatlân ajingte tei loa, tûte he’nle mak hei ning.”

¹⁵ Khan chu annuhmei he’n pathen ralak-hei hnenga inthoina antōk tia inhret anpase hei, khava hnenga akangir nupuihei seng, khana Egypt thlang tinga aka-om Israelhei, ankhenga mipui katamtak he’n kahnenga anhonghri,

¹⁶ “Nang in Rōngpu rahminga namanthei ung hi keini’n rangei hnōm mak ung.

¹⁷ Keini’n tlo sik kantati kha kantlo sik. Keini’n Marvân Rengnu kan-pathennu kha inthoina kantōk sik, khana kanpu sōnhei, kanrenghei, kanhlam kakei he’n Judah khōpui heia leh Jerusalem khōpuia anta leitlo kapōa keini’n inthoina ju kansô sik. Khanga kantlo leh sâk sik hingja kannei, kahao ung, heite bōina neimak ung.

¹⁸ Tâk-kha Marvân Rengnu hnenga ran inthoina, jusô inthoina kanbâng joa inphut chu, keini’n heite neimak jo ung, kanmihei rea leh vonṭâma kathi jo hei.”

¹⁹ Khana nupui he’n anhrisa nôk a, “Keini’n buhlom kha kanka hloma, Marvân Rengnu lim a kansyem pha, ahnenga inthoina kantōk a khana ju kanbun thlōn inchu, keini tatlona heikhat chunga khan kanpuise he’n anhnōm pek unga kae.”

²⁰ Khava pha kahnenga ṭong insôn pase leh nuhmeihei seng hneng kahri,

²¹ “Nangni leh nanpu sōnhei, nanreng hei, leh nanhlam kakeihei, khana Judah khōpui heia leh Jerusalem hlampuia khanga nantatōk chungchânga khan Rōngpu’n manhret mak jo ning, a-emak leh amahngi sik jo tia nantamandon mo?

²² Tûnlaitak hin nanram kha inhmanga ka-oma tûte om mak jo hei. Akaṭhamak omchen nantatlo kha Rōngpu’n a-en hnâm tor mak jo jâra, ram kha hmit-enna enngam timak jo khana mihe’n arahming kha inhâksêrna inkhat a anhmang joa kae.

²³ “Nangni’n pathen ralak hnenga inthoina nantōk a aṭongpek rakip kha nanjuimak jâra, Rōngpu dōina setna nantlo jâra hiva thi inramna hi nanchunga ajōng katlung kae.”

^24-25 Chunghnung Rōngpu, Israel Pathen in Egypt ram a ka-om Judah mihei seng hneng atahri kha, ke’n mi rakip, inhnakpena nuhmeihei hneng kamanthei hei, “Nangni leh nannuhmei he’n Marvân Rengnu hneng ṭit leh kajatak a intepna nannei jo. Nangni’n amanu hneng inthoina tōk sik khana ahnenga ju inthoina tōk sik intep jo chei, khana nan-intepna kha pui nanmathluk jo. Khan chu, kaṭha hêr jo! Nan-intepna kha jui ruh, tlosōt ruh!

²⁶ Tâk-kha Rōngpu ke’n tlotorna kanei karahming vânga, Egypt a ka-om Israel sa rakip hnenga intepna kanei kae, tûnchu rangei ruh: nangni’n heitik chen’um avea karahming panna, ‘Ke’n akahring ṭhak Chunghnung Rōngpu rahminga intep eng,’ tia intepna mannei mak jo chei ning!

²⁷ Nangni nankhang makna sik a ke’n khava hlam kha ka-en sik, khana kasuk manhmang sik chei. Nangni nankhenga kathi sik chei, rea achangmak leh hrisea, tûte kahringa a-om mak jo kârseng, kathisōreng sik chei.

²⁸ Tâk-kha nangni ajingte rōk kahring sik cheia kha Egypt a inphut Judah a jōng inle sik chei. Khan chu akahring hei khan kei ṭong mo, anmani ṭong mo akadik ti kha anmanhret sik jo.

²⁹ Ke’n hiva hmun a hin karâkna kapek sik chei leh suk manset sik a ka’ntepna kamathlung sik kha Rōngpu ke’n nanhnenga manchênna kha kapek sik chei.

³⁰ Judah reng Zedekiah kha akathat hnōm a’nrepui Babylon reng Nebuchadnezzar kut a kapek sōt kapōa, Egypt Reng Hophra hi akathat hnōm a’nrepui kut a kapek sōt sik kae.”