JEREMIAH 43 - LEKHARABU INTHENG (BSI)

Jeremiah Egypt Ram a Antaṭhōi

¹ Rōngpu an-Pathen in mipuihei hnenga hri sik a atirna eng rakip seng kha ke’n kahri pek sō jo hei.

² Khava sōa Hoshaiah sapa Azariah khana Kahrea sapa Johanan khana alak racham kase mihe’n kahnenga anhri, “Nang namalei kasei. Rōngpu ni-Pathen in keini hnenga Egypt ram a vase makna sik leh va-om makna sik a nang ahei tir mak.

³ Keini chunga Babylon he’n ratha anneina sik, anithatna sik khana Babylona aniṭhōina sik unga Neria sapa Baruch in keini dōina nang amathok che kae.”

⁴ Khava jâra Johanan leh remi ṭōnkarônhei khana mipuihei anchanga, Rōngpu ṭongpekna Judah ram a om sik kha juimak jo hei.

⁵ Khava pha Judah ram a aka-om seng leh inṭhōia anlei inchek chaina jât-hei kâra inphut ahong inle jo hei seng kha Johanan leh remi ṭōnkarôn he’n Egypt a anṭhōi jo heia kae:

⁶ pasehei, nuhmeihei, naipanghei khana reng sanuhei. Rehlam kakeipa Nebuzaradan in Gedaliah ta-ensui sik tia adahlon senghei, Baruch leh kei inveina anṭhōisōt unga kae.

⁷ Anmani’n Rōngpu ṭongpek juimak heia Tahpanhe katlunga Egypt ram shunga kase jo hei.

⁸ Khana khan Rōngpu’n kahnenga ahri,

⁹ “Hlung kalen tatak ṭhahrep lo hei roh, khōpui shunga invairônna reng inn hlutna hma a pihmun inshânga khan vûm hei roh, khava naṭōntlo kha Israel mi ṭhahrep in hmu hei rasoh.

¹⁰ Khava sōa hripek hei roh, ti chu Chunghnung Rōngpu, Israel Pathen ke’n, kasōk Babylon Reng Nebuchadnezzar kha hiva hmun a hin kajōngṭhōi sik, khana nang in hlunghei navûmna chunga hin areng in-ongna amatung sik, khana areng pōn-inn kha achunga amazer sik kae.

¹¹ Nebuchadnezzar kajōng sik, Egypt ator sik. Nat hrisea akathi sik hei kha nat hrisea kathi sik hei, rehringa khum sik hei kha rehringa ankhum sik hei, khana rea that sik hei kha rea anthat sik hei.

¹² Ke’n Egypt pathen Bek-innhei karo mankâng sik hei, khana Babylon rengpa khan an-pathenhei kha hmeia aro mo achangmak leh achoi hei mo atlo sik hei. Kemōng kakhem he’n anpōna hrikṭha atalosōt a antamantheng kapōa, Babylon rengpa’n Egypt ram kha inthengtak a atora adahlon sik.

¹³ Ama’n Egypt ram a Heliopolis a hlungpui inthengtak antamatung hei kha asukset sik hei, khana Egypt mihei pathen bek-innhei kha aro mathlâk sik heia kae.”