JEREMIAH 39 - LEKHARABU INTHENG (BSI)

Jerusalem Tlûkna

¹ Zedekiah’n Judah reng achangna kum 9 thla 10 atlukna shunga, Babylon Reng Nebuchadnezzar in asepeihei seng leh kahonga Jerusalem ahong buhlu jo.

² Zedekiah reng achangna kum 11 thla 4 ni 9 tluk ning kurpui bang kha ansukkhōi jo. (

³ Jerusalem kha anhlō pha, Babylon rengpa ṭōnpui karônhei khan khōpui Alaiṭim Kekot a khana Nergal Sharezer, Samgar Nebo, Sarsekhim, khana Nergal Sharezer ahlop inkhat inveina anhmun anvalo jo hei.)

⁴ Reng Zedekiah leh aremihei seng in omchen kasōk hi anhmu pha, jân pha leh marûk a tlânsōt sik a inrei hei. Anmani reng rahōn hlamting kurbang 2 insuktōna kekot a katlânsōt heia, Jordan phaiting kasesōt hei.

⁵ Tâk-kha Babylon remi he’n anhnong heia, Jericho hnenga phaichama Zedekiah kha ansur jo. Khava phatak a khan Hamath ram shunga Ribla khōpuia aleika-om Reng Nebuchadnezzar hnenga ama kha anṭhōi jo, khana khan Nebuchadnezzar in achunga ṭong tanna anei jo.

⁶ Ribla hmun a khan Zedekiah sapahei kha Zedekiah hmaikungtak a aleithat hei, khana Judah vaikarônhei kha’m amanthat hei.

⁷ Khava sōa ama’n Zedekiah hmit-hei amankhersōt pek hei khana Babylona ṭhōina sik thirhrui vâng ankhit jo.

⁸ Khava lai khan Babylon mihe’n reng-innpuihei leh mipuihei innhei kha hmeia anro heia Jerusalem kurpui banghei kha ansuk manchim jo hei.

⁹ Atorna pena, Nebuzaradan, rehlam kakeipenpa khan khōpuia alaka-om mipuihei kha leh ahnenga aheikahlut hei seng kha kurkhum a da sik a Babylon ting akei jo hei.

¹⁰ Ama’n Judah ram a khan saraber, heite kaneimak hei kha adahlon hei, vomhrui rahōn leh hlei apek hei.

Jeremiah Masôna

¹¹ Tâk-kha reng Nebuchadnezzar in rehlam kakeipa, Nebuzaradan hneng hiva ṭong hi amasōna sik a ṭong pekna anei:

¹² “Se roh, Jeremiah kha vajongsōt roh, khana kaṭha heihrung roh. Ama suk manset mak roh, amadu arangei kha tlopek roh.”

¹³ Khava jâra Nebuzaradan leh inṭhōia vaikarôn kalenhei, Nebushazban leh Nergal Sharezer khana Babylon rengpa ṭōnkarôn kalenhei seng in,

¹⁴ Reng-innpui sumpuk a inphut anṭhōisōt eng. Kei kha ka-inn katlunga kaṭha katlungna sik a ani ka-ensui sik Shaphan tupa, Ahikam sapa Gedaliah tahrung sik enga anda jo eng. Khava jâra kei mihei kâra ka-om jo eng.

Ebedmelech sik Inhōrna

¹⁵ Kei reng-innpui sumpuk a khuma ka-omlai khan, Rōngpu’n kahnenga

¹⁶ Ethiopia mi Ebedmelech hneng hri sik amanthei eng khachu Chunghnung Rōngpu Israel Pathen in ati, “Ke’n kahri kapōa khan ke’n katlo sik, ke’n hiva khōpui hi kasukset sik khana khangtouna heirôn mak ning. Khana hiva omchen hi asōk pha, akahmu theia nang khana khan leika-om sik che.

¹⁷ Tâk-kha nang chu, Rōngpu ke’n kahrung sik che khana nang in naṭit mihei hnenga pek sōt mak che ning.

¹⁸ Ke’n kahuk sik che, nang that mak hei tin che. Nahringkhō inhuksōt sik che ajârchu nang in kachunga taksenna naneia kae. Rōngpu ke’n kahri jo kae.”