JEREMIAH 37 - LEKHARABU INTHENG (BSI)

Jeremiah Hnenga Zedekiah Ngekna

¹ Babylon Reng Nebuchadnezzar in Josiah sapa Zedekiah hi Jehoiakim sapa Jehoiachin kahlanga Judah reng amanchang jo.

² Tâk-kha Zedekiah leh aṭōn karônhei khana mipuihei anchanga, Rōngpu’n ṭong apek eng kha juimak hei.

³ Reng Zedekiah’n Shelemiah sapa Jehucal leh Maaseiah sapa thempu Zephaniah hei kha kanjât-hei kahlanga Rōngpu kan-Pathen hneng derna kaneina sik, kahnenga akangek sik a ahei tir hei.

⁴ Hiva pha hin kei khuma la-om mak eng, mihei kâra kaning kahnōma lakalôn eng.

⁵ Babylon remi he’n Jerusalem kha ankekhum jo, tâk Egypt remi he’n anramri anhei rakanna kahong jo hei ti ṭong anthei pha, anmani inle jo hei.

⁶ Khava pha Rōngpu, Israel Pathen khan kahnenga Zedekiah hneng hri sik ṭong amanthei eng,

⁷ “Egypt remihei nang inthōpui sik a kahong hei, tâk an-innting inle sik hei.

⁸ Khava pha Babylonhei he’nle nôk sik hei, khōpui hi anbuhlu sik, anhlō sik, khana hmeia anro sik.

⁹ Rōngpu ke’n, nang karakôk che kae, ti chu Babylonhei hong nôk mak jo hei ning tia nabinga mandonna khan hōnmak che rasoh, ajârchu anmani lakahong sik hei.

¹⁰ Nang in Babylon remihei nator heia, a’ntôn rōk hei kha rephōra anjea an-om inum, khahei kha kaṭhōisōt nôk sik heia kha khōpui hi anlaro mankâng manvâm sik.”

Jeremiah Antasur khana Antakhum

¹¹ Egypt remihei kha anhong injôk jo jâra Babylon remihei kha Jerusalem andahlona inle jo hei.

¹² Khava jâra kei Benjamin ram shunga ka-innshung karōi kahlō sik a Jerusalem dahlona se kaphut jo.

¹³ Tâk-kha ke’n Benjamin Kekot kaphâk pha, remi kot kahngâk rehlam kakeipa arahming Irijah intipa Hananiah tupa, Shelemiah sapa khan aleiting enga ati, “Nang Babylonhei hnenga akatlânsōt che kae.”

¹⁴ Ke’n kamasôn, “Kha changmak! Kei tlânmak eng.” Tâk-kha Irijah khan kahri kha rangei mak. Khava kanek a, asur enga ṭōnkarônhei hneng aṭhōi eng.

¹⁵ Anmani kachunga anhnuk kana hêr, anvōk enga karôt a ṭong inzet Jonathan inn, mi khumna antahmang den a khan ankhum eng.

¹⁶ Kei ralei khur shunga ankhum enga, pha kasôttak anda eng.

¹⁷ Hnungpet a Reng Zedekiah’n kei kabek sik a mi ahei tir, reng-innpui shunga ahlop binga, “Rōngpua inphut sânsōt ṭong akajōng heikhat ka-om mo?” tia ader eng. “Ka-om,” tia kamasôn, khana kahri nôk, “Nang Babylon rengpa kut chunga pek sōt sik che kae.”

¹⁸ Khava sōa kader, “Nang leh ṭōnkarônhei, khana mipuihei dōina, ke’n heiṭōnse mo katlosōt aka-om joa hinga nakhum eng?

¹⁹ Babylon rengpa’n nang leh hiva ram hi re hongsō mak ning tia ani kahri pek sânkathemhei kha heihmen akachang jo hei?

²⁰ Khana tûnchu, Rengpa, kaṭong hri narangei sik leh kamansena che kha natlo sik a kangek che kae. Lungsettak a kei Jonathan inna khum sik a atir male mak jo roh. Natir nôk eng inchu, sona son avakathi nger sik eng kae.”

²¹ Khava jâra reng Zedekiah’n kei kha reng-innpuia sumpuk a khum sik a ṭong apek jo eng. Khana khan ka-om enga ani tina buhlom syemna inphut buhlom inkhat sâm, khōpui shunga buhlom atlang mak kârseng anpek enga kae.