JEREMIAH 35 - LEKHARABU INTHENG (BSI)

Jeremiah leh Rechab-hei

¹ Josiah sapa Jehoiakim in Judah reng achang pha, Rōngpu’n kahnenga ahri,

² “Rechab phung mihei hneng se ina ṭong vahri roh. Khana anmani Bek-inn den inkhat a ṭhōi manhlut hei ina anta-in sik ju ajing pek hei roh.”

³ Khava jâra ke’n Rechab phung senga, Jaazaniah (Habazziniah sapa, Jeremiah ahlop inkhat sapa kae) leh asōpuihei leh ansahei seng kavaṭhōi hei

⁴ khana Bek-inna kaṭhōi manhlut hei. Igdaliah sapa sânkathem Hanan sonlehei innden shunga kaṭhōi manhlut hei. Hiva innden hi Bek-inn ṭōnpui karôn Shallum sapa Maaseiah omna den chunga khana ṭōnkarôn ralak-hei innden hnenga aka-om kae.

⁵ Khava pha ke’n Rechap hei hmaikunga kōklei kasip phet ju kamatungpek heia anhnenga, “Ju ajing in ruh,” kati hei.

⁶ Tâk-kha anmani’n anmasôn eng, “Keini ju inphung mak ung. Kanpu kanpa Rechab sapa Jonadab in keini leh kansa he’num ju inti anta-inmak sik kae tia ahri pek ung.

⁷ Khan nôk chu inn sakmak sik, hlei thlō mak sik, vomhrui lingmak sik, ram um rachôkmak sik a amantheisa ung. Keini hi khōhme kapōa kan-omna ram a hin ahei tik a pōn rabuk-inna kan-omna sik amanthei unga kae.

⁸ Keini’n Jonadab ṭongpek rakip kha kanjuia kae. Keini, kannuhmeihei, kansapahei khana kansanuhei ju inphung hêrmak ung.

^9-10 Keini’n kan-omna sik innhei sakphung mak ung, pōn rabuk-inna ka-om ung, khan chu vomhrui rahōn, hleihei, khana hmuchi neimak ung. Kanpu Jonadab ṭongpek rakip pui katluk a kannit a kae.

¹¹ Tâk-kha reng Nebuchadnezzar in ram a re ahongsō pha Syriahei leh Babylon sepei heia inphut sōksōtna sik a Jerusalema hong sik a intluk ung. Khava jâra kae keini Jerusalema aka-om jo ung hi.”

^12-13 Khava sōa Chunghnung Rōngpu, Israel Pathen khan Judah leh Jerusalem mihei hnenga vasea hinga vahri sik a amanthei eng, “Rōngpu ke’n kader chei, heijâra mo kaṭong nanta rangei mak a kaṭong pek nanta juimak.

¹⁴ Jonadab tu leh sahe’n anpu anpa ṭongpek anjuia, tuning katlung tûte inkhat in ju leh thlai inmak hei. Tâk-kha ke’n tûn katlung nanhnenga ṭong kahri ṭhak, nangni’n ajuimak cheia kae.

¹⁵ Ke’n nanhnenga injônjet a kasōk sânkathemhei kajōngtir hei, anmani’n nanhlam jui kaṭhamak masōna sik, akadik kha nantlona sik anhri pek chei. Nangni leh nanpu sōnhei hneng kapek chei ram a hin, nan-om ṭhak theina sik a, nangni’n pathen ralak kamuk mak ruh khana razen mak hei ruh tia an-gîk ṭhak chei. Tâk-kha nangni’n kei ṭonghri chu rangei mak chei, heitea donmak cheia kae.

¹⁶ Jonadab tu leh sa he’nchu, anpu anpahei ṭongpek anjui, tâk nangni’nchu kaṭong juimak chei.

¹⁷ Khava jâra tûnchu, Chunghnung Rōngpu, Israel Pathen ke’n, Judah leh Jerusalem mipuihei chunga ṭongtepna kaneidek jo inhmangna kha kahong masō sik jo kae. Hivahi kamasō sik kae ajârchu, ṭong kahri pha rangei mak chei, khana kabek chei pha amasôn mak cheia kae.”

¹⁸ Khava pha ke’n Rechab phung mihei hneng kahri pek hei khachu, Chunghnung Rōngpu, Israel Pathen in hinga ahri, “Nangni’n nanpu Jonadab ṭong pek chei kha nanjuia kae; nangni’n amansena chei rakip nanjui, khana aṭongpek chei rakip nantloa kae.

¹⁹ Khava jâra Chunghnung Rōngpu, Israel Pathen ke’n Rechab sapa Jonadab in aheitik a kasepa akatlo sik a sapase aneiṭhakna sik a ṭong katep pek jo kae.”