JEREMIAH 34 - LEKHARABU INTHENG (BSI)

Zedekiah sik a Ṭongrôn

¹ Babylona Reng Nebuchadnezzar leh asepeihei, khana ama thōia ka-om jât leh phung rakip in Jerusalem leh ahnenga khōpuihei chunga re anhong sōlai khan, Rōngpu’n kahnenga ṭong ajōng hri.

² Rōngpu, Israel Pathen khan Judah Reng Zedekiah hnenga sea ṭong vahrina sik a amanthei eng, “Rōngpu ke’n hiva khōpui hi Babylon rengpa kut chunga kapek sōt sik, khana ama’n aro khum sik kae.

³ Nang tlânsōt tor mak tin che; nang ansur sik che, akut chunga anpek sōt sik che. Nang in hmaisō leh hmaisōa ama nahmu sik, natak khet in na’nbekpui sik; khan chu Babylona kase sik jo che.

⁴ Zedekiah, nang chunga kahri ṭong hi rangei roh. Nang rehmun a that mak hei tin.

⁵ Nang kadaia kathi sik che, nang hma reng leikachang hei, napa-napu hei anthi pha bero antaro mankhut kapōa, nathi ning marim katui anro mankhut pek sik che. Anmani’n nachunga ṭajai ansui sik a kha, ‘Ni rengpa kathi jo!’ anti sik. Rōngpu ke’n kahri jo kae.”

⁶ Khava sōa ke’n Jerusalema reng Zedekiah hneng hiva ṭong hi kaleipek

⁷ Babylon remi he’n khōpui kha re anbuhlu laitak a kae. Remihei khan Judah ram shunga rekur tukkhum dahlona ka-om khōpui, Lachish leh Azekah rōkte hei kha’m anbuhlu heia kae.

Sōk-hei Chunga Hōnpuma Razenna

⁸ Reng Zedekiah leh Jerusalem mihe’n,

⁹ an-Hebrew sōk-hei, nuhmei leh pasehei masōna sik, tûte inkhatbek inum Israel mi inkhat kha sōk a anei makna sik inhnōmtō hei.

¹⁰ Mi rakip leh anhlam kakei he’n ansōk hei ning leh hnōma masōna sik, avea sōk manchang nôk makna sik a kahnōm jo hei. Anmani’n anmasō jo hei,

¹¹ tâk-kha hnung leh chu anmalung anthlenga, ansur nôk heia rumhrat a sōk anmanchang nôk jo heia kae.

¹² Khana Rōngpu,

¹³ Israel Pathen in mipuihei hnenga hri sik a amanthei jo eng, “Nanpu-nanpahei leh Egypt ram a ansōk changna inphut kahuksōt hei pha khan intepna kaleineipui hei. Ke’n anhnenga kamanthei hei khachu

¹⁴ anhnenga kum 6 sepa akatlo jo Hebrew sōk inkhat kha kum 7 kataia antamasō sik hei kae. Tâk-kha nanpu nanpa he’n leidon mak hei khana kaṭong hri kha leirangei mak hei.

¹⁵ Kani ṭhahrep rōk lakae, nanmalung nanthlenga kamalung tlaina sik nantlo jo. Nankhenga nan-Israel changpui hei masōna sik kahnōmpet chei, khana kei hmaikunga, kei kamukna Bek-inn shunga intepna inkhat nansyema kae.

¹⁶ Tâk-kha khava sō leh nanmalung nanthleng nôk a, kei akaja mak cheia kae. Nansōk-hei maduna dungjuia nantamasō jo hei kha rumhrat tak a nansōk nanmanchang male nôk heia kae.

¹⁷ Khava jâra tûnchu, Rōngpu ke’n kaṭong juimak chei kati kae; nansōpui Israelhei kha ning leh hnōmpek mak hei chei. Khan chu kaṭha hêr jo, ke’n nangni ning leh hnōmpek jo chei rong: re shunga, hrisea khana vonṭâma thina sik a ning leh hnōm kha pek jo chei rong. Nanchunga katlo hei hin vânhnōia jât rakip kamanpir sik hei.

^18-19 Judah leh Jerusalem vaikarônhei, reng-innpui shunga ṭōnpui karônhei, thempuhei, khana hlamkakei seng he’n sehratche inkhat anthat a aṭim hnia antuk khōia, alang hnia anda, akâra khan kalôn kase heia kei leh intepna inkhat ansyema kae. Tâk-kha anmani’n khava intepna ṭonghei kha juimak heia ansukkhōia kae. Khava jâra anmani’n sehrat chunga anta leitlo kapōa khan ke’n hiva mihei chunga katlo sik kae.

²⁰ Ke’n anmani ankathat hnōm, an-inrepuihei kut a kapek sōt sik hei, ankalōng hei kha ramshahei leh vahe’n ansâk sik hei.

²¹ Ke’n Judah Reng Zedekiah leh avaikarônhei hi, ankathat hnōm hei kut a kapek sik hei. Nanchunga dōina akahai jo hei, Babylon remihei kut a kapek sōt sik hei.

²² Anmani ṭong kapek sik hei, anmani hiva khōpuia he’nle sik hei. Anmani’n anbuhlu sik, anhlō sik khana hmei vâng anro mathlâk sik. Ke’n Judah khōpuihei hi, tûte om makna nêrdiram inkhat kapōa kasyem sik hei. Rōngpu ke’n kahri jo kae.”