JEREMIAH 32 - LEKHARABU INTHENG (BSI)

Jeremiah’n Hlei Inkhat Arachôk

¹ Zedekiah’n Judah reng achangna kum 10 ajōng tluk pha, khan nôk chu Babylona Nebuchadnezzar in reng achangna kum 18 atluk pha Rōngpu’n kahnenga ahri.

² Khava pha Babylon rengpa remi he’n Jerusalema re anhong tloa kae, khana kei chu innpui sumpuk a anleikhum enga kae.

³ Reng Zedekiah’n khava hmun a aleikhum eng khana Rōngpu ṭonghri kha ke’n kaphôngsōt jâra ama’n themmô aleipek eng, khachu, “Ke’n Babylon rengpa kha hiva khōpui hi kamanhlō sik,

⁴ khana Reng Zedekiah kha inlepsōt tor mak ning. Ama kha Babylon rengpa hnenga kapek sōt sik, ama’n hmaisō leh hmaisōa ama kha ahmu sik khana atak-khet in a’nbekpui sik.

⁵ Zedekiah kha Babylona anṭhōi sik, ke’n achunga ṭōn katlomak kârseng ama khana khan ka-om sik. Ama’n Babylonhei kha re atuk he’num, hmesōna chenmak ning. Rōngpu ke’n kahri jo kae.”

⁶ Rōngpu’n kahnenga ahri,

⁷ ti chu, kapa kasin Shallum sapa Hanamel in Benjamin ram a Anathoth a ahlei kha rachôk roh tia kahnenga akahri sik a kahong sik ajârchu, a’nhnai puipen a-u leh anai a’nchôkdôr kasōk kha kei eng kae.

⁸ Khava sōa, Rōngpu tahri pek eng kapōa, Hanamel kha sumpuk a khan kahonga, ahlei kha rachôk jo roh tia ahong hri. Khava jâra Rōngpu’n inchêntak a amanthei eng kae ti kha kamanhret jo.

⁹ Hanamel hlei kha karachôk a aman kha kateipek jo; aman kha dangka 17 kae.

¹⁰ Ke’n sôi katloa rachôkna lekha chunga mêrchîkna kanam jo, sâkhi kada jo hei, khana aman kha kantei joa kae.

¹¹ Khava pha ke’n rachôkna lekha pheng 2 – aje ajâr mazetna mêrchîkna innam apheng kha leh a’nzer apheng kha kaloa,

¹² Mahseiah tupa, Neria sapa, Baruch hnenga kapek hei. Khahei kha Hanamel leh rachôkna lekha chunga rahming inzet sâkhi a’nṭang hei leh sumpuk a a’n-ong mipuihei seng hmaikunga kapek jo.

¹³ Anmani seng hmaikunga ke’n, Baruch hneng kahri,

¹⁴ “Chunghnung Rōngpu, Israelhei Pathen khan hiva rachôkna lekha 2, mêrchîkna innam leh a’nzer inhlâng hei hi, hnunga kumhei katlunga a-omtheina sik a bephu inkhat shunga nada sik a ṭong apek che.

¹⁵ Chunghnung Rōngpu, Israel Pathen khan ahri khachu, hiva ram a innhei, hleihei, khana vomhrui rahōnhei hi rachôk male alakachang sik hei kae.”

Jeremiah Derna

¹⁶ Rachôkna lekha kha Baruch hneng kapeksō pha, ke’n derna kanei,

¹⁷ “Chunghnung, Rōngpu, naratha neina leh nahratna vâng ralei leh marvân nasyem hei; nang sik a heite a’ntak om mak.

¹⁸ Nang in lishing lishing hei hneng nalungsetna kha namalâr, tâk nang in mihei kha annu anpahei set jâra karâkna’m napek hei. Nang akalen leh akahrat Pathen che kae; nang Chunghnung Rōngpu che kae.

¹⁹ Nang in kasing tak a ṭōn namantluk khana ṭōn kalentak natlosōt hei; mihei ṭōntlo rakip nahmu sō, khana anṭōntlo dungjuia tloman napek hei.

²⁰ Hmalai Egypt a ṭōn-inlak leh det-hla ka-om naleitlo hei, khana tûn katlunga natlo manjōm hei, tûnhin um hmuntina mihe’n anmanhretna sik che Israel leh jât rakip kâra nalatlo ṭhak a kae.

²¹ Ṭōn-inlak leh det-hla ka-om tlona vâng khan kan-indōipuihei khan ṭit leh inpirna annei, nang in Egypt a inphut namihei heiṭhōisōtna sik a narathahrat leh natorna kha nahmang heia kae.

²² Nang in anpu anpahei hneng nalei intepna kapōa, hiva ram kahōi leh ralei ṭhatna hi napek hei.

²³ Achang ravâng anmani hiva ram a anhei tlunga khana anhlō jo pha hin, anmani’n naṭongpek juimak hei, naman theina dungjuia om mak hei; antatlo sik a ṭong napek hei kha anmani’n heite tlomak jo hei. Khava jâra anchunga hiva ṭōnse seng hi namasō pek jo hei.

²⁴ “Babylon he’n khōpui kha kekhumna sik a akimvea pi andeng manshânga anbuhlu jo. Re, vonṭâm, khana hrise natse hei khan khōpui kha ankut chunga apek sik kae. Naleihri rakip kha kadiktak a ahong katlung kha nang in nahmu jo.

²⁵ Kha’num Chunghnung Rōngpu, khōpui hi Babylon he’n anhlō sik tingtak, hlei kha sâkhihei hmaikunga karachôkna sik a ṭong anikapek kha nang che kae.”

²⁶ Khava sōa Rōngpu’n kahnenga ahri,

²⁷ “Kei hi mi rakip Pathen, Rōngpu eng kae. Kei sik a a’ntak hêr heite om mak.

²⁸ Ke’n hiva khōpui hi Babylon Reng Nebuchadnezzar leh aremihei kapek sik jo kae; anmani’n anhlō sik jo,

²⁹ khana hmeia anro sik. Anmani’n anro mankâng sik, innphu chunga Baal hnenga marim katui anroa khana pathen ralak-hei hneng ju tōkna anneia, mipui he’n kahnuk anmannatna jo innhei kha leh inṭhōia antaro manhmang sik hei kae.

³⁰ Judah mihei leh Israel mihe’n anmani thuhming a’nphutbia inphut anṭōn tlona khan kamalung manhōi mak hei khana kahnuk anmannat a kae.

³¹ Hiva khōpuia mihei hin, ansak bia inphut kahnuk anmannat a anmanthak enga kae. Suk manhmang sik a intluk jo eng

³² Judah leh Jerusalema ka-om mihei, anrenghei leh hlamkakeihei, anthempuhei leh sânkathemhei seng in ṭhatmak antlo jâra khan.

³³ Anmani’n hnung ansungsi eng, ke’n kamanthei ṭhak hei ravâng, anmani’n rangei mak hei, inthem chûkmak hei.

³⁴ Anmani’n kei kamukna sik a antasak Bek-inn shunga khan anmani mater ka-om limsyemhei kha anda heia, anmanbōk joa kae.

³⁵ Anmani’n Hinnom Phaichama Baal maichâm ansyem, Molech pathen hnenga ansapa leh ansanuhei inthoina tōkna sik a antlo. Hivahi antatlo sik a ke’n ṭong pek mak hei eng, hivahi antlona sik leh Judah mihei set tlona sik a kamalung kapha’m mandon mak eng.”

Inhōrna Ṭongtepna

³⁶ Rōngpu, Israel Pathen khan kahnenga ahri, “Jeremiah, mipui he’n re, vonṭâm, hrise natse he’n khōpui hi Babylon rengpa kut a anmathlâk sik anti. Tûnchu ke’n heimo kahri sik kha rangei roh.

³⁷ Ke’n ram rakip a kamihei, kahnuknat leh kahnuk inthak jâra kavor kachek hei seng kha hiva hmun a hin kakhôm manchun sik hei, khana anmani hiva hmun a hin kaheiṭhōi male heia inhuktak a kaman om sik hei.

³⁸ Khava pha anmani kami kachang sik hei, kei an-Pathen kachang sik eng.

³⁹ Ke’n anmani hringkhō mantlukna inkhat kapek sik hei: anmani leh ansōn anpârhei ṭhatchômna sik a, pha rakip a kei kajana atanei sik eng hi kae.

⁴⁰ Ke’n anmani leh kumsôt a intepna inkhat kasyem sik. Ke’n anmani ṭhatchômna sik a ṭōn kaṭha tlo bâng hêrmak ning, khana kahnenga inphut an-inhesōt nôk makna sik, anmalung akhenga anṭitna sik eng kasyem sik hei.

⁴¹ Ke’n anmani sik ṭhatchômna tlona khan kahōi kasak sik, hiva ram a hin an-omthangna sik kaphunsōt sik jo hei.

⁴² “Ke’n anchunga ṭōnse kamasō kapōa ke’n ṭhatna rakip pek sik a kale’ntepna kha kapek sik hei.

⁴³ Hiva ram hi mihring leh ramshahei kapha om makna, nêrdiram kapōa ka-ang sik, khana Babylon mihei inpek sōt sik hei tia mihe’n anhri. Tâk-kha hiva ram a hleihei hi rachôk male nôk sik hei kae.

⁴⁴ Mihe’n hleihei kha anlarachôk nôk sik hei, rachôkna lekha inzet sik, mêrchîkna innam sik, sâkhi ka-om sik hei. Hivahi Benjamin ram shunga, Jerusalem kimvea khōte heia, Judah khōpui heia, tlângrama khōpui heia, hmebung kung heia, thlang tinga Judah ramheia kasōk sik a kae. Ke’n kamihei hi anram shunga kala man om nôk sik hei. Rōngpu ke’n kahri jo kae.”