JEREMIAH 31 - LEKHARABU INTHENG (BSI)

Israel Innting A’nle

¹ Rōngpu’n ahri, “Israel phung rakip hei Pathen kha kachangna sik, khana anmani kami anchangna sik pha kha hong katlung jo.

² Thina inphut a akasōksōt nêrdiram a ka-om hei hneng ke’n kalungsetna kaleimalâr. Israel mipui he’n châm inhngatna anrangei jo pha,

³ hmun kahlatak a inphut anhnenga inlârpek hei eng. Israel mihei, ke’n ahei tik chenna kalungset chei, khava jâra kalungset inthlengmak kha kamalârpek ṭhak cheia kae.

⁴ Ave nôk a kasyemther sik chei kae. Avea khōng nansuk a inpâktak a lakalâm nôk sik chei.

⁵ Samaria tlâng panga vomhrui rahōn avea nansyem sik a kha vomhrui kaling hei khan athei kara kha anlasâk sik a kae.

⁶ Ôk, mi ka-en inthlip he’n Ephraim tlânga hinga anhei ôngna sik pha kha heikatlung jo, ‘Zion Tlânga, Rōngpu ni-Pathen hneng se rih.’”

⁷ Rōngpu’n ahri, “Jât-hei kâra akalenpen, Israel sik a inpâkna hla sak ruh. Nanmanpâkna hla kha, ‘Rōngpu’n amihei ahuk jo hei; ama’n dahlona ka-om hei seng kha asansōt jo hei,’ tia sak ruh.

⁸ Ke’n anmani sak tinga inphut kaheiṭhōi sik hei ralei inchaina heia inphut kamantûp sik hei. Hmitkacho leh ke katlek hei leh kahongsap sik hei, chung kahrik hei leh nai kanei sik jo he’m kahong sik hei. Anmani jât kalentak inkhat a he’nle sik hei.

⁹ Kamihei kaheiṭhōi male hei pha, anṭap pum a derna annei pum a he’nle sik hei. Anmani an-insuk inpaimakna sik a, kavakōk tuidung heia, hlam inne heia kaheiṭhōi sik hei. Kei hi Israel pa kapō eng kae, Ephraim hi kasapa upapen kapō kha kae.”

¹⁰ Rōngpu’n ahri, “Jât-hei, kaṭong hri hi rangei ruh khana kaṭonghei hi akahlatak tui-ôngpui pang heia vahri manthang ruh. Ke’n kamihei kaleichai kathek hei, tâk-kha ke’n kamantûp nôk sik hei, kemōng kakhem inkhat in ankemōnghei akhem kapōa kakhem sik hei.

¹¹ Ke’n Israelhei anning anhnōma kamasō hei, ratha kahrat jât-heia inphut kahuksōt heia kae.

¹² Anmani kahong sik hei Zion tlâng chunga inpâkna hla ansak sik, kakutchoi pek hei chunga anmani katlâi sik hei sâng, ju, olive thai, kemōnghei leh sehei seng chunga. Anmani tui kaṭhatak a a’nchap rahōn kapō inkhat kachang sik hei; anmani’n antamadu rakip annei sik.

¹³ Khava pha nuhngâk-hei inpâk a kalâm sik hei, pase, rether leh upa inpâk sik jo hei. Ke’n anmani lungmōng kapek sik hei, anṭapna kha inpâkna an-inrengna kha hōina kamanchang pek sik hei.

¹⁴ Thempuhei kha sâk katui vânga kavei mankhop sik hei kamihei tamadu rangei seng kamanchen sik hei. Rōngpu ke’n kahri jo kae.”

Israel Chunga Rōngpu Lungsetna

¹⁵ Rōngpu’n ahri, “Rama khōa rasa inkhat inthei, ratha kasintek a ṭa rasa kae. Rachel in asahei sik a kaṭap; anmani kase jo hei, khana akaṭap kha mathlem sik hnōm mak a kae.

¹⁶ Naṭapna bâng roh, nahmit rathli hni roh. Nasahei sik a natlona rakip kha tloman kase emak ning; anmani indōipuihei ram a inphut hong inle sik hei.

¹⁷ Nang sik a hnunga inhōrna laka-om; nasahei kha inna hong inle sik hei. Rōngpu ke’n kahri jo kae.

¹⁸ “Israel mihe’n malung inrimtak a antahri kha ke’n kathei, Rōngpu, keini hi antalâk manhnem mak ranhring kapō kachang ung, tâk-kha ṭongpek jui sik kha namanthei ung. Aṭhōi male roh; Rōngpu kan-Pathen nahnenga jōng inle sik a intluk ung.

¹⁹ Keini nanga inphut a le’nhesōt jo ung, tâk-kha inrangtak a he’nle hnōm jo ung. Nang in karâkna napek sō jo ung pha, kanmalung inrima kanlu kanmankun. Keini hnōise kanchen, inzak ung ajârchu kansinlai khan leikaset jo unga kae.’

²⁰ “Eh Israel, nang kasa marit che kae, kalungset pen inkhat che kae. Ke’n narahming kapan akaia, lungset leh inṭhōia kamandon che. Kamalung hi nachunga ka-om; kamarit sik chea kae.

²¹ Hlamlen kha amerchîkna matung roh, nalei sōksōtna hlam kha jongsōt roh. Israel mihei hong inle ruh, Nantadahlon nankhōpuia hong inle ruh.

²² Taksenna kaneimak mihei, heituk kasôt mo ala’nkei chio sik chei? Ke’n a’nlak heimo khat, athera kasyem jo, nupui inkhat in pase inkhat ahrung kapōa athera kasyem kae.”

Pathen Mihei Hnunga Haona

²³ Chunghnung Rōngpu, Israelhei Pathen khan ahri, “Ke’n mihei kha anrama kaheiṭhōi male hei pha, Judah ram a leh ankhōpui heia, anmani’n, ‘Rōngpu’n Jerusalem hmebung intheng, a-omna hmun intheng kha mahâmṭhat pek rasoh,’ anti nôk sik.

²⁴ Mihei kha Judah ram a leh ankhōpui heia ka-om sik hei, khana khan hlei kathlōhei, khana kemōng kakhem he’n ankemōnghei leh ka-om sik hei.

²⁵ Ke’n akaṭōiber hei kha kamanngar sik hei khana vonṭâma akatlasam hei kha kamankhop sik hei.

²⁶ Khava pha, mihe’n, “Kei kaje jo eng, kahongthōi pha kangar chet eng,” anti sik.

²⁷ “Rōngpu ke’n kahri kae, Judah ram leh Israel ram kha mi leh sha kamansip phetna sik pha kha kahong sik.

²⁸ Ke’n arajung phoisōtna, keimathlûkna, hlon maletna, suk manhmangna leh ṭhetsōtna chunga ka-ensui kapōa, anmani lingna leh syemsōtna kha’m ka-ensui sik hei kae.

²⁹ Khava pha kha ajongtlung pha, mihe’n hing’hin timak jo hei ning, ‘Nu leh pa he’n vomhrui theithûr ansâk, tâk-kha ansa he’n anha kakim anmanhret.’

³⁰ Khava kanek a, theithûr kasâk mihei khan anbinga anha kakim sik; khana mi rakip anbinga anset tlo jâra kathi sik heia kae.”

³¹ Rōngpu’n ahri, “Ke’n Judah leh Israel mihei leh intepna ather inkhat kasyemna sik pha kha kahong jo.

³² Hivahi ke’n anpu anpahei Egypt a inphut ankut kamatua kaheiṭhōisōt hei pha intepna marō kha leh in-ang mak ning. Kei hi anpuise kapō kha kachang inum khava intepna kha nitmak hei.

³³ Israel mihei leh intepna ther kaneipui sik jo hei khachu hi kae: Kadân kha anshunga kada sik khana anmalunga kamazet sik. Kei an-Pathen kachang sik eng, khana anmani kami kachang sik hei.

³⁴ Anmani tûte’num akhō-aven inkhat hnenga Rōngpu kha amanhretna sik a manthei mak jo ning, ajârchu akasina inphut akalen katlunga kei anmanhret pet sik jo eng. Ke’n ansetna karangei mandam sik hei, khana anṭhena hei mandon mak jo hei ning. Rōngpu ke’n kahri jo kae.”

³⁵ Rōngpu’n sûna vâr sik a kani kha asyem thla leh ârsihei kha jân a akavâr sik heia asyem. Ama’n tui-ôngpui akachok a aman-ông; ama rahming kha Chunghnung Rōngpu kae.

³⁶ Ama’n ṭong atep ti chu raleichung hi angaia a-omlai seng, Israel hi jât inkhat kachang ṭhak sik.

³⁷ Ni khat bōirōk hi tesōt torna a-om pha, khana raleichung inhngatna kung jongsōt tor achang ning, khava pha rōk a khan Israelhei kha anṭōn tlohei rakip jâra khan ahlon sōt sik hei kae. Rōngpu’n ahri jo kae.

³⁸ Rōngpu’n ahri, “Jerusalem akhenga kakhōpui inkhat a Hananel Ber inshâng tlaitlâk intonga inphut Rakir Kot katlunga sakmanther sik pha kha kahong jo.

³⁹ Khana aramri kha khava hmun a inphut a tlaitlâk tinga Gareb tlâng katlung khana Goa akakebit a akatlung sik kae.

⁴⁰ Ashunga phaicham, kathi hrena leh akachok hlonna, khana Kidron Kavadung chunga hleipuk seng, nisōtinga Shakor Kekot katlung hi kei sik a hmun intheng akachang sik kae. Khōpui kha ave nôk a sukkhōi leh suk manhmang chang hêrmak jo ning.”