JEREMIAH 3 - LEKHARABU INTHENG (BSI)

Taksenthei Kachangmak Israel

¹ Rōngpu’n ati, “Pase inkhat in anuhmei a’nṭhenpui joa, khana amanu khan pase hlop inkhat lômnu avachang jo’nchu, avea ompui theimak jo ning. Hivahin ram kha amanbōk sik kae. Tâk-kha, Israel, nang chu indupui katamtak nanei jo hei sōa, tûnchu kahnenga hong inle hnōm jo che!

² Hmebung chung heia enroh. Notinu kapōa nachôn makna hmun aka-om mo? Arab he’n nêrdiram a mi that sik a antahlō hei kapōa nang in hlamlen dunga nalungset hei kha nahngâk hei. Na-noti changna khan ram kha namanbōk a kae.

³ Khava jâra khō sûrmak jo, zerkhōa khō pherpher kha jōngtla mak jo. Nang hi noti hmaisō napō, inzak ti hi’m manhret mak jo che.

⁴ “Khana nang in kahnenga nati, ‘Nang kapa che, naipang kachang laia inphut nahei lungset eng kae.

⁵ Nang chu pha rakip a nahnuk natṭhak mak ning; ahei tik a kachunga narahe seṭhak mak ning?’ Israel, nang in khang’khan nati, tâk-kha nator chen a akaṭhamak khachu natlo ṭhak a kae.”

Israel leh Judah Malung Thleng nger sik

⁶ Reng Josiah’n reng achanglai, Rōngpu’n kahnenga ahri, “Taksenthei kachangmak nuhmei, Israel tatlo hei hi nahmu mo? Amanu kahnenga inphut kasesōt jo, chingbung inshâng heia khana thing bur rakip hnōia noti kachanga kae.

⁷ Ama’n khaseng atlosōa, kahnenga hong inle nger sik tia kaleimandon. Tâk-kha ama hong inlemak, khana taksenthei kachangmak anainu Judah um khava seng kha aleihmu.

⁸ Ke’n Israel ka’nṭhen puia katirsōt kha Judah’num aleihmu ajârchu ama’n kahnenga inphut inhesōt a noti vakachang joa kae. Tâk-kha taksenthei kachangmak Israel nainu Judah kha, ṭitna neimak. Ama’m noti hongkachang jo

⁹ khana heite inkhat inzak mak a kae. Amanu’n ram kha amanbōk jo, thing leh hlung akamuk a mikajông kachang jo.

¹⁰ Khana hiseng so leh taksenthei kachangmak Israel nainu Judah khan kahnenga ahong inle inhlemsak a kae; ama amalung intheng mak a kae. Rōngpu ke’n kahri jo kae.”

¹¹ Khava sōa Rōngpu’n kahnenga ahri, ama inphut Israel in a’nhesōt inum, taksenthei kachangmak Judah kanek a chu kaṭhachet ti hi amalâr.

¹² Israel hneng vasea ṭong vahrina sik a amanthei eng, “Taksenthei kachangmak Israel, kahnenga hong inle roh. Kei lungset kathem eng, kahnuknatmak ning. Nachunga kahnuk mannat ṭhak mak ning.

¹³ Nang in naṭhe jo khana Rōngpu na-Pathen navadōi jo ti rōk kha hnōm roh. Thingbur in-êm rakip thōia pathen hlop hei hneng nalungsetna kha napek jo hei khana kei ṭongpek juimak jo che ti hi hrisōt roh. Rōngpu ke’n kahri jo kae.

¹⁴ “Taksenthei kachangmak mihei, hong inle ruh; nangni kami chei kae. Khōpui rakip a mi inkhat ṭim, khana phung rakip a mi 2 ṭim kakadei sik chei, khana ke’n Zion Tlânga kaheiṭhōi male sik chei.

¹⁵ Kaṭong kajui vaikarôn kapek sik chei, khana anmani’n themna leh singna vânga vai anrôna ankei sik chei.

¹⁶ Khava ram a nangni nanhei pung jo pha leh, mihe’n kei Intepna Bôm chungchânga vōi khat hrimak jo hei ning. Khava chungchânga anmani’n ngeitō mak jo hei ning khana mandon mak jo hei ning, khana rangei mak jo hei ning, ahlop inkhat um syem mak jo hei ning.

¹⁷ Khava pha kha ahong tlung pha Jerusalem hi ‘Rōngpu len in-ongna’ inti sik, khana jât pumpui in khana khan kei ankamuk sik jo eng. Anmalung kasak leh akaṭhamak in amanse hei kha tlomak jo hei ning.

¹⁸ Israel in Judah leh inchun sik hei khana sak tinga ka-om ram a rehringa keina inphut kahong sik hei, khana nanpu sōnhei hneng ahei tik a ankarōi sik a kaleipek jo hei ram a khan hong inle sik hei.”

Pathen Mihe’n Lim Antakamuk

¹⁹ Rōngpu’n ahri, “Israel, kasa kapōa karahlâng hnōm che, ke’n raleichunga ram kaṭhapen, leh ram kahōipen kha kapek hnōm che. Apa tia nabek sik eng hi kamadu, khana keia inphut aheitik a na-inhesōt mak sik hi kamadu.

²⁰ Tâk-kha taksenthei kachangmak lômnu kapōa kei hneng taksenthei changmak che. Rōngpu ke’n kahri jo kae.”

²¹ Hmebung chunga rasa inthei: Israel mihei ṭap rasa leh peng rasa kae ajârchu anmani’n setna hringkhōa ka-om hei, an-Rōngpu Pathen kha anmahngi jo.

²² Rōngpua inphut a’nhesōt hei nangni seng hong inle ruh; ama’n nangni amandam sik chei khana taksenthei amanchang sik chei. Nangni’n nanhri, “Ôk keini Rōngpu hneng kahong sik ung, ajârchu ama kan-Pathen kae.”

²³ Hmebung chunga keini limsyem kamukna khan keini heite abômmak. Israel sik a inthōpuina khachu Rōngpu kan-Pathena inphut rōk kahonga kae.

²⁴ Tâk-kha inzakpui ka-om pathen Baal kamukna khan tenlaia inphut a kanpu kanpahei ṭōn leitlona hei seng ti chu–kankemōng, kankerup, kansanu kansapahei inhmangna amannei jo ung.

²⁵ Inzaktak a katlu sik unga kha kan-inzakna khan amakhusi jo rasoh. Keini leh kanpu kanpa he’n Rōngpu kan-Pathen kadōia setna kanleitlo ṭhak jo; aṭongpek-hei kha juitet mak jo ung.”