JEREMIAH 28 - LEKHARABU INTHENG (BSI)

Jeremiah leh Sânkathem Hananiah

¹ Khava kumtak a khan Judah reng Zedekiah’n vai arônna kum 4 thla 5 tlukna khan Azzur sapa Hananiah, Gibeon khōpuia inphut sânkathempa khan Bek-inn shunga kahnenga ahei hri. Thempuhei leh mipuihei hmaikunga amanthei eng

² khachu Chunghnung Rōngpu, Israel Pathen in ati: “Babylon rengpa ratha hratna kavōk-khōi jo.

³ Kum 2 shunga Babylona reng Nebuchadnezzar tachoisōt karōi rakip hiva hmun a hin kahei choi malepet sik.

⁴ Ke’n Judah rengpa, Jehoiakim sapa Jehoiachin leh inṭhōia Babylona rehringa antakei Judah mihei seng kha kaheiṭhōi male sik hei. Ôk, ke’n Babylon rengpa rathahrat kasuk khōipek sik. Rōngpu ke’n kahri jo kae.”

⁵ Khava pha Bek-inn shunga akangir thempuhei leh mipuihei hmaikunga Hananiah hneng ke’n kahri,

⁶ “A’nlaktak kae! Rōngpu’n hivahi atlosōt sik tia inhōr eng! Nang in nasânsōt hei kha amathlung sik khana Babylona inphut Bek-inn karōi rakip khana surmi antaṭhōi hei seng kha aheiṭhōi male sik hei tia inhōrkhet eng.

⁷ Tâk-kha ke’n nahnenga leh mihei hnenga kahri hi rangei roh.

⁸ Nang leh kei mak hma hmalaia ṭong aleikasânsōt sânkathemhei khan re, vonṭâm, khana hrisehei kha jât katamtak hnenga leh rengram kahrat hei chunga hong kasōk sik tia anleiphôngsōt.

⁹ Tâk-kha mōngna ka-om sik tia alei kaphôngsōt sânkathem inkhat ṭong kha hui atlung jo pha ama rōk kha sânkathem inkhat a manhretna anleineia kae.”

¹⁰ Khava pha Hananiah’n kahrak a rîngke kha alosōt a ahar-ahak a avōkkhōi jo,

¹¹ khana mipui hma a ahri, “Rōngpu’n hinga ati, Reng Nebuchadnezzar in jât-hei hrak a rîngke aman-or hei kha hing’hin ama’n asukkhōi sik, khana khavakha kum 2 shunga atlosōt sik kae.” Khava pha ke’n kadahlon jo.

¹² Hivasōa pha chomkhat sō leh Rōngpu’n kahnenga

¹³ Hananiah hneng kavase leh kavahrina sik a amanthei eng, “Nang in thing rîngke chu navōkkhōi tor thei, tâk khavakha ama’n thir rîngke vâng athleng sik kae tia Rōngpu’n ati.

¹⁴ Chunghnung Rōngpu, Israel Pathen in ahri ti chu hiva jât rakip hei hneng thir rîngke aman-or sik hei, anmani’n Babylon Reng Nebuchadnezzar anrazen sik. Rōngpu’n ati, ramshahei kapha’num Nebuchadnezzar sepa antlo sik.”

¹⁵ Khava sōa ke’n Hananiah hneng hivahi kahri pek, kahrisa nôk a, “Rangei roh, Hananiah! Rōngpu’n nang heitir mak che, nang in hiva mihei hi maleisei naman taksen hei kae.

¹⁶ Khava jâra Rōngpu atak-khet in nang hi alosōt sik che kae ati. Hiva kum hi athleng mak hma nang kathi sik jo che, ajârchu nang in mipuihei kha Rōngpu dōina sik namathok heia kae.”

¹⁷ Khava kum a thla 7 tlukna Hananiah kha kathi joa kae.