JEREMIAH 25 - LEKHARABU INTHENG (BSI)

Sak tinga Inrepui

¹ Josiah sapa Jehoiakim in Judah reng achang kum 4 tlukna, Judah mi rakip hei chungchânga Rōngpu a inphut ṭong kalei thei. (Hivahi Nebuchadnezzar in Babylon reng achangna a’nphutna kum a kae.)

² Ke’n Judah leh Jerusalema ka-om mi rakip hei hneng kahri,

³ “Amon sapa Josiah’n vai arônna kum 13 tlukna inphut tuning katlunga kum 23 shung hi Rōngpu’n kahnenga ṭong ahei phôngpek ṭhak eng, aṭong hri kha ke’n nanhnenga manthei loa hong om mak eng.

⁴ Rōngpu’n asōk sânkathemhei ahei tir ṭhak he’num nangni’n rangei mak chei khana donmak chei.

⁵ Rōngpu’n nanpa-nanpuhei hnenga aleipek hei ram kha nankarōi achang thangna sik a khana ram a khan nan-om thangna sik a anmani’n nanhringkhō akaṭhamak hlam leh akaṭhamak ṭōn heia inphut nanhong inhesōtna sik anmanthei chei.

⁶ Anmani’n pathen ralak nankamuk makna sik leh nanrazen makna sik a khana nankut a nantasyem limhei kha nankamuk pha Rōngpu kha ahnuk nanmannat makna sik a anmanthei chei.

⁷ Tâk-kha Rōngpu khet in, nangni’n aṭong rangei hnōm mak chei ati. Khava kanek a, nanlimhei khan anhnuk nanmannat pek a, nanbing chunga karâkna kha nantamathlung kae ati.

⁸ “Khava jâra, nangni’n aṭong hri nanrangei pek mak jâra, Chunghnung Rōngpu’n ati,

⁹ ‘Ke’n sak tinga mi rakip hei hnenga leh kasōkpa, Babylon Reng Nebuchadnezzar hnenga ṭong kapek sik hei. Ke’n anmani kha Judah leh ashunga ka-om hei khana ahneng vena ka-om jât rakip hei dōina re katuk sik a kaheiṭhōi sik hei. Hiva jât leh ahnenga ka-om hei hi kasuk manhmang sik hei khana ahei tik a kamanram cher sik hei, ṭit ka-om leh hmit-enna malung tônna kachang sik hei. Rōngpu, ke’n kahri jo kae.

¹⁰ Anmani inpâk leh kahōia ankapeng rasa, khana anhmōi ṭhōina reveia anningṭhatna hei kha kamandai hnger sik hei. Anthaihmei hei sik a thaitui neimak hei ning khana hmuchi neimak jo hei ning.

¹¹ Hiva ram pumpui hi hleiram kachang sik, hmit-enna malung tônna kachang sik, khana ram hnenga ka-om jât he’n kum 70 Babylon rengpa sepa antlo sik.

¹² Khava sōa Babylon leh arengpa kha ansetna jâra karâkna kapek sik hei. Khava ram kha kasuk manhmang sik khana ahei tik a inhmanga ka-om sik.

¹³ Jeremiah hnenga kalei hrisōt pha, jât-hei chunga masō sik a maṭhitna kalei tlona hei, hiva lekha shunga a’nzet inrengna rakip vânga Babylon kha karâkna kapek sik kae.

¹⁴ Ke’n Babylonhei kha antlona kara kha kapek male sik hei kae, khana jât-hei leh rengkalen he’n ansōk anmanchang sik jo hei.’”

Jât-hei Chunga Pathen Ṭongtan

¹⁵ Israelhei Pathen, Rōngpu’n kahnenga ahri, “Hinahin kahnuk natna vânga akasiptak ju kōklei ka-om. Ke’n katirna che jât rakip hei hnenga hivahi man in hei roh.

¹⁶ Ju kha an-in pha anphei anpheia kalôn sik hei khana anmani kadōia re kalei tir hei jâra anmalung kha invai sik jo.”

¹⁷ Khava jâra Rōngpu kut a inphut kōklei kha kalo jo, khana Rōngpu’n atirna eng jât-hei hneng kapek jo hei, khana anmani kaman-in jo hei.

¹⁸ Anmani kha nêrdiram, ṭit ka-om leh hmit ena malung tôn ka-om anchangna sik, tuning katlunga antatlo ṭhak kapōa anrahming kha hâksêrna ṭong inkhat a mihe’n anhmangna sik a Jerusalem leh Judah khōpui rakip, anrenghei leh anhlam kakeihei kha, hiva kōklei hi aman in jo hei.

^19-26 Aralak kōkleia inphut aka-in sik hei rahming kha: Egypt rengpa, aṭōn katlohei leh hlamkakeihei seng. Egypt mi leh Egypt a ka-om ram hlop mihei seng; Uz ram a renghei seng; Philisti khōpuihei, Ashkelon, Gaza, Ekron khana Ashdod a alaka-om hei seng, Edom, Moab khana Ammonhei seng, Tyre leh Sidon renghei seng; Mediterranean ram a renghei seng, Dedan, Temah khana Buz khōpuihei seng, Ansam kabongtek a kavo hei seng; Arabia renghei seng; nêrdiram a ka-om jât-hei seng; Zimri, Elam khana Media renghei seng, sak intongtinga renghei, akahla leh akahnaia ka-om hei, abân bâna renghei seng. Raleichunga ka-om jât rakip in hinna inphut anta-in sik kae. Achaina pena, Babylon reng in hinna inphut a-in sik kae.

²⁷ Khava sōa Rōngpu’n kahnenga ati, “Mihei kha hripek hei roh, Chunghnung Rōngpu Israel Pathen ke’n ṭong kapek hei kae, anmani kadōia re kahei tir jo jâra, anmani’n an-inrui leh anmalōksōt mak kârseng ju kha in hei rasoh, anpûr leh anthotor mak lai seng in hei rasoh.

²⁸ Anmani’n nakut a inphut kōklei kha anloa an-in hnōm mak inchu hinga tipek hei roh, Chunghnung Rōngpu ṭongpek kae, hivahi anmani’n anta-in nger sik kae tia manthei hei roh.

²⁹ Ke’n kakhōpuitak a suk manhmangna ṭōn kha kaphut sik jo kae. Anmani karâkna kasea ka-om sik ung tia antamandon mo? Changmak, anmani karâk sik hei kae, ajârchu raleichunga mi rakip chunga ke’n re kahei tir sik kae. Chunghnung Rōngpu ke’n kahri jo.

³⁰ “Jeremiah, nang in kahri rakip hi naphongsōt sik kae. Nang in hiva mihei hneng nahri pek sik hei kae, marvâna inphut Rōngpu kha heika-ông sik, marvân inshânga inphut hei-inhrung sik. Amihei chunga hei-inhrung sik, vomhrui thei ka-ep mi inkhat kapōa heika-ông sik. Raleichunga mi rakip in arasa kha anthei sik,

³¹ khava rasa kha raleichung kekung keler katlung bit a inthông sik. Jât-hei chunga Rōngpu’n ratha anei jo. Ama’n mi rakip chunga ṭong atan sik, mikaṭhamak-hei kha athat sik hei. Rōngpu’n ahri jo kae.’”

³² Chunghnung Rōngpu’n ahri ti chu jât inkhat bâna jât inkhat hneng inrengna kha hong katlung sik, raleichung kekung kelera thlipui inhnaktak inkhat intûp a ka-om jo.

³³ Khava ning khan Rōngpu’n athasōt mihei kalōnghei kha raleichung achaina hmun inkhat a inphut inkhat katlunga inthek inchai sik hei. Tûte’num anmani sik a ralûm demak hei ning, khana ankalōng hei kha vûmmak hei ning. Anmani kha chommanbuk pi ka-ang sik hei.

³⁴ Ṭap ruh, nangni hlamkakeihei, kamihei kemōng kakhemhei, rasa inshângtak a ṭap ruh. Ralûm de una vaiphin kâra inkhōn ruh. Nangnihei thatna sik pha kha kahong jo, kemōngche kapōa anrachen sik jo chei.

³⁵ Nangni nan-inphesōtna sik ahlam om mak.

^36-37 Rōngpu hnuknat in nanjât asuk manhmang joa nanram kamōnga aleika-om kha amanram jo jâra, nangni’n ṭajai sui unna inrengtak a ṭap ruh.

³⁸ Shabakkai in akhur adahlon kapōa Rōngpu’n amihei adahlon jo hei. Ṭit ka-om re leh Rōngpu hnuknat khan ram kha nêrdiram amanchang jo.