JEREMIAH 2 - LEKHARABU INTHENG (BSI)

Pathen in Israel A-ensui

¹ Rōngpu’n kahnenga,

² Jerusalema ka-om mi rakip hnenga hiva ṭong hi vaphôngsōtna sik a amanthei eng. “Ke’n kamandonsōt, nakhangdông changlai heituk-hrep a taksenthei aleikachang che mo, niluhông bilai khan chu heituk-hrep a nalungset eng mo; Nêrdiram a, heite kekmakna ram a khan naleijui eng.

³ Israel, nang kei rōk ta che kae; nang kakarōi inthengtak che kae. Nang chunga khōdeng theina kape hei hneng ke’n inrengna leh inhmangna kapek hei. Rōngpu ke’n kahri jo kae.”

Israel Pusōnhei Setna

⁴ Israel phunghei, Jacob sōn leh pârhei, Rōngpu ṭonghri rangei ruh.

⁵ Rōngpu’n ati: “Kei dōina nanpusōn he’n heimo anta leihri? Hei-inmo keia inphut amantlânsōt hei? Anmani’n akahnem mak limsyem ankamuk a, anbinga akahnem mak hongkachang hei.

⁶ Ke’n anmani Egypt a inphut kahuksōt heia, nêrdiram thōia: nêrdi leh khur kōk omna ram, ram chârna leh thitheina ram, khana mihring tûte omakna hmun, khana tûte lônlele makna sik ram a khan kaṭhōisōt he’num anmani’n heitea asakmak hei.

⁷ Neinâk kaṭha ralak leh theikara kahōia ansâkna sik a, ram thai omna hmun a anmani kahong ṭhōi hei. Tâk anmani’n karam kha anmanhmang jo, kapek hei ram kha anmanbōk jo.

⁸ Thempu he’n, ‘Rōngpu khon mo aka-om?’ tia inder mak hei. Kathempu khet he’n amanhret mak jo hei. Vaikarôn he’n kei kadōia inṭang hei; Sânkathem he’n Baal rahminga ṭong ansân akahnem mak limsyem ankamuk hei.

Amihei dōina Rōngpu Rasa neina

⁹ “Khava jâra, Rōngpu ke’n kamihei maherna ṭong kahri sik kae. Ansōn anpârhei chunga themmô kapek sik hei kae.

¹⁰ Cyprus tuikekhum tlaitlâk ting se roh, khana Cedar ram nisōting mi inkhat tir roh. Hiva kapō aleikasōk phung inkhatbek nang in hmumak tin che.

¹¹ Tûte jât inkhat in, akadiktak achangmak inum an-pathen kamuk kha thlengphung mak hei. Tâk-kha kami he’nchu kei hi anthleng ṭhak eng, anhnenga kajana anhei karôn pek Pathen kei hi, anmani sik a heite akatlotor mak pathenhei leh anthleng enga kae.

¹² Khava jâra ke’n bōirōk hnenga ṭittak a a’ntlirna sik, inlaktak leh det-hlatak a a’nnokna sik a ṭong kapek,

¹³ ajârchu kami he’n setna 2 antlo jo, khachu: tui intheng tuiripût kachang kei hnenga inphut anmani inhesōt jo hei, khana tui aka-om tor mak sik tuikhur kha ancho jo.

Israel in Taksenthei Achang makna Kara

¹⁴ “Israel hi sōk changmak; ama hi sōk a a’nte changmak. Heijâra mo aka-en kada he’n ama antahnong?

¹⁵ Shabakkaihei kapōa ahnenga inhrung hei; aram kha nêrdiram anmanchang pek, akhōpuihei inram kachang jo hei, dahlonpet a ka-om jo hei.

¹⁶ Ôk, Memphis leh Tahpanhe mihe’n alu kha ansekhōia kae.

¹⁷ Israel, nabinga hivahi namasō kae Ke’n hlamdunga kaṭhōi chelai, Rōngpu na-Pathen kei hi nang in nadahlon enga kae.

¹⁸ Egypt a navase leh heimo akahnem sik tia namandon, Nile tuidunga tui va-in sik mo nati? Assyria navase leh heimo akahnem sik tia namandon, Euphrates tuidunga tui va-in sik mo nati?

¹⁹ Nabinga naṭhat makna’n nang akarâk sik che, keia inphut nasesōtna khan nang themmô amanchen sik che. Na-Rōngpu Pathen kei namasō enga, kei hnenga taksenthei nachang makna hi heituk a akadik mak leh malung nat aka-om jo mo nahong manhret sik. Chunghnung Rōngpu, ke’n hivahi kahri jo kae.”

Israel in Rōngpu Akamuk Hnōm mak

²⁰ Chunghnung Rōngpu’n ahri, “Israel, nang in phat kasôttak karatha neina chunga heihnōm mak jo che. kaṭong hi juihnōm mak che khana akamuk hnōm mak che. Tlâng inshâng chung rakip a thingkung ka-êm thōi rakip a, vonchoina pathenhei kha nakamuk joa kae.

²¹ Hmuchi kaṭhapena inphut, kadeisōt vomhrui kapōa kaphun che kae. Tâk-kha enroh, heimo akachang jo che! Akahnem mak, akaṭopsa vomhrui ka-ang jo che.

²² Sâbon kaṭhatak vânga nasôp inum, naṭhena bi khachu kahmu ṭhak sik.

²³ Heikhonga mo nabinga akabōk changmak eng nati tor, Baal pathen kha kamuk hêrmak eng nati tor? Phaichama heikhonga mo akaset che, enroh; heimo natlo kha enroh. Akalum kâra akatlân lele nêrdiram a akatlân inhlut,

²⁴ ram a sharîngsei kapō che kae. Apui hur inthok kha tu’n mo akhâmtor sik? Apui indu ache abinga inrengna kathōk inkhatbek om mak; apui kha aje jōngna pha khan chu kabeitak a inhret a kae.

²⁵ Israel, Pathen hlop kahnung jui lelena khan nakadang manchâr mak roh, achangmak leh nake manchâm mak roh. Tâk-kha nang in nati, ‘Changmak! Kei hong inhetor mak jo eng. Ke’n mihlop-hei pathen kamadu jo hei, ankahnung kalajui sik.’”

Israel in Karâkna Ahmu sik Kasōk

²⁶ Rōngpu’n ati, “Inru ansur pha leh inzak aratō kapōhrep a Israel mi pumpui nankhenga nanreng hei, nanṭōn katlohei, nanthempu hei, khana sânkathemhei inzakna nanratō sik a kae.

²⁷ Thingkung kha kanpa khana hlungpui kha kannu kati nankhenga inzak nanratō sik. Hivahi hong kasōk sik ajârchu kei hnenga nanhong inhe sik kanek a keia inphut katlânsōt jo cheia kae. Tâk-kha khōdengthei nanratō pha leh chu kei hi kahong leh kahukna sik cheia nanbek enga kae.

²⁸ “Nanbing sik a nantasyem pathenhei kha khon mo aka-om jo hei? Antor inchu, nangni khōdengthei lai huk chei rasoh! Judah, nang in khōpui nanei chenna pathen um naneiheia kae.

²⁹ Nang inphinna kha heimo kae? Heisa mo kei nadōi eng?

³⁰ Ke’n karâkna kapek che, tâk ṭhatchôm dekmak; nang mandikna sik a ṭōn amantlo hnōm mak che. Hnuk kase shabakkai kapōa, nasânkathemhei kha nathat heia kae.

³¹ Israel mihei, kaṭong hri hi rangei ruh. Kei hi nanhnenga nêrdiram kapō, a’nthim leh thinathei ram kapō kha akachang jo eng mo? Kha achang inchu heijâra mo nangni’n nanracham hrep a nanchônna sik leh kei hnenga nanhong inle hêrmakna sik a nanta hri jo?

³² Nuhngâk inkhat in aret rangkachek achangmak leh hmōi inkhat in luhôngna ret amahngi tor mo? Tâk-kha kami he’nchu tei torlo kania inphut anhei mahngi jo eng.

³³ Lungdi kahnung hnongna sik chu nanmanhret. Nuhmei kaṭhamak pen inum nangnia inphut inchua kae.

³⁴ Nanpōnsi hei kha misara leh ṭhenakase hei thisen kakop jo, inn kavōk khōi inruhei thisen kha changmak. “Heirakip hi achang inum,

³⁵ nang in nati, ‘Kei ṭhena neimak eng; Rōngpu’n kei chunga ahnuknat mak ning.’ Tâk-kha Rōngpu ke’n karâkna kapek sik che kae, ajârchu nang in setna natlo ti hi hnōm mak che.

³⁶ Nang in jât-hlop pathen nasora nabinga naman namantlôm a kae. Assyria tatlo che kapōa, Egypt inum malung tlâksamna ahongpek sik che.

³⁷ Egypt a inphut inhe chea, inzak a nalu namakhup sik. Nang in nataksen hei kha, Rōngpu, ke’n kahlonsōt jo hei; anmania inphut nang in hnemna heite chenmak tin che.”