JEREMIAH 18 - LEKHARABU INTHENG (BSI)

Be-kakhengpa Inna Jeremiah

¹ Rōngpu’n kahnenga ahri,

² “Ke’n ṭong thangkōi kapekna sik che, be-kakhengpa inna nang vase roh.”

³ Khava jâra kei vakase eng, be kakhengpa’n abe maherna ṭōn aleitlo kha kavahmu.

⁴ Ama’n abe kheng aṭhat makna hmun a khan dôp kha aloa ahlop inkhat akhenga kae.

⁵ Khava pha Rōngpu’n kahnenga ahri,

⁶ “Be kakhengpa’n matlak chunga ratha anei kapōa, ke’n nangni Israelhei chunga ratha neimak eng mo? Be kakhengpa kut chunga matlak a-om kapōa, nangni’m kakut chunga ka-om cheia kae.

⁷ Pha heikhat a jât inkhat achangmak leh rengram inkhat kha ke’n, kaphôisōt sik, kasuk khōi sik, kasuk manhmang sik kati’num,

⁸ tâk-kha khava jât khan aṭhat makna hlam a inphut anmani an-inhesōt jo’nchu, katlo sik kati kha ke’n tlomak ning.

⁹ Inkhat ting nôk chu, ke’n jât inkhat achangmak leh rengram inkhat kaphunsōt sik, kasyem manṭhat sik kati’num,

¹⁰ tâk-kha khava jât khan kaṭong ajuimak a, akaṭhamak atlo’nchu, katlo sik kati kha tlomak ning.

¹¹ Khava jâra tûnchu, Judah mihei leh Jerusalema ka-om mihei hneng anmani dōina sik a khana karâkna sik a intlukdek jo eng tia hripek hei roh. Anmani anset tlona kha anbângna sik, an-omchen leh anṭōn tlohei kha anthlengna sik a manthei hei roh.

¹² Anmani’n anmasôn sik, ‘Ethei mak, heisa mo kantabâng sik? Keini kankhenga racham intak leh akaṭhamak kha kantamadu dungjuia kantlo sik.’”

Mipui he’n Rōngpu Antahnōm mak

¹³ Rōngpu’n ahri, “Jât rakip der hei roh, hinghiva omchen hi tûn mak hma aleikasōk jo mo. Israel mihe’n ṭit ka-om tak ṭōn antlo jo!

¹⁴ Lebanon hlungkare inshâng kha kavur kasea aka-om mo? Khava tlâng kadai kavadung kha akachâr phunghei mo?

¹⁵ A-e ravâng, kami he’nchu anmahngi jo eng; milimhei hnenga marim katui anro mankhut a kae. Ansena sik hlam a inpai inthlûk jo hei; hlam marō kha hromak jo hei, anmani’n kebi inhmulo hlam anhro jo.

¹⁶ Anmani’n hiva ram hi ṭit ka-om tak, ahei tik a donmak sik anmanchang jo. Ahneng kahro he’n anhmu pha anmalung kana sik anmandon-hla jâra anlu ankachuk sik a kae.

¹⁷ Ke’n kamihei hi an-indōipui hei kâra kachai kathek sik hei, nisōtinga thli’n vaiphin asêm kapōa. Ke’n hnung kasungsi sik jo hei; Khōdengthei ahong pha inthōpui mak hei ning.”

Jeremiah Dōina Ṭōnmantluk

¹⁸ Khava pha mihei khan anhri, “Eini’n, Jeremiah chunga heimo inkhat mantluk rih! Ani’nthei sik thempu, ani-inse sik mikasing, khana Pathen ṭong thangkōi kahrile sik ahei tik a ninei ṭhak sik hei kae. Ama chunga masetna pek rih khana aṭong rangei pek mak jo rih.”

¹⁹ Khava jâra ke’n kangek, “Rōngpu, kaderna che athei pek roh, kakadōi he’n kei chunga antahri hi rangei roh.

²⁰ Ṭōn kaṭha tloman pekna kha akaṭhamak hi mo kae? Tâk-kha anmani’n mathlâk inhlutna sik khur anchoa kae. Nang in hnuk nattak a anchunga ṭōn natlo makna sik, ke’n heikhonga mo anmani kahlanga akahong enga ṭong kavahri kha mandonsōt roh.

²¹ Tâk-kha Rōngpu, tûnchu, ansahei vonṭâma thi hei rasoh; rehmun a thi hei rasoh. Nupui he’n anpuisehei leh ansahei manhmang hei rasoh; pase he’n natsea thi hei rasoh, khana rether he’n re intukna that hei rasoh.

²² Gîkna pek loa mipui in an-inn anvachomna sik tir hei roh; ṭit inpira peng hei rasoh. Anmani’n kei tlâk inhlutna sik khur anchoa, ka-in-ôkna sik châng ankama kae.

²³ Tâk-kha, Rōngpu, kei thatna sik a anṭōn mantluk rakip nang in namanhret. Anṭhatmakna leh ansetnahei rangei mandam mak hei roh. Tor hei inna hlon mathlâk hei roh khana nahnuknatpuma razen hei roh.”