JEREMIAH 16 - LEKHARABU INTHENG (BSI)

Jeremiah Hringkhō sik a Rōngpu Lungdo

¹ Khana Rōngpu’n kahnenga ahri nôk a ati,

² “Hinghiva hmun a hin nuhmei neimak roh, khana sa neimak roh.

³ Hiva hmun a a’nte naipanghei leh, annu anpahei chunga heimo ahong kasōk sik ke’n hripek che rong.

⁴ Anmani ṭit ka-om hrisea kathi sik hei, khana anmani hei sik a tûte inkhat in ṭajai suimak ning, vûmmak hei ning. Ankathi kalōng kha raleia akabōk manbukṭak kapōa inte lele sik hei. Anmani re shunga a-emak leh vonṭâma kathi sik hei, ankalōng hei kha vahei leh ramshahei sâk leh in kachang sik hei.

⁵ “Nang ṭajai suina inn inkhat a hlutmak roh. Tûte sik a namalung manrim mak roh. Kamihei chunga lungsetna, maritna khana lung mōngna inti kha manhmu mak jo hei ning.

⁶ Hiva ram a mikanei leh misara kathisō sik hei, tâk ankavûm sik leh ankaṭa sik tûte om mak ning. Anchunga malung inrim malârna tûte inkhat in abinga ataksa in-âttan mak ning khana asam kha vomak ning.

⁷ Mi inkhat in alungset mi athi pha, lungngam pekna sik a bu leh thlai akasâkpui sik inkhatbek om mak ning. Mi inkhat in anu leh apa athi jo kapha tûte inkhat in lungset malârmak ning.

⁸ “Mihei revei sâktlâng tlona inn inkhat a semak roh. Anmani leh sâksap insap sik a in-ongsap mak roh.

⁹ Chunghnung Rōngpu, Israel Pathen ke’n, kahri ṭong hi rangei roh. Hmōiṭhōi revei sâktlâng, hōina leh inpâkna kare rasa kamandai hnger sik. Hina ka-om mihei hi omchen kasōk kha aka-en hnâm sik a kahring sik hei.

¹⁰ “Nang in hivaseng hi nahri pek hei pha, anmani’n heisa mo hinghrep a karâkna inhnak hi pekna sik unga amantluk tia ander sik che. Anmani’n Rōngpu, an-Pathen dōina hei setna mo antatlo jo khana hei sukṭhena mo antanei jo tia ander sik che?

¹¹ Khava pha Rōngpu’n hinga ahri tia manthei hei roh, ‘Nanpa-nanpu he’n kei andahlon enga, pathen ralak-hei ankamuk a anrazen hei. Kei andahlon enga, kamansena hei juimak hei.

¹² Tâk-kha nangni’n nanpu sōnhei kakhe chet a ṭōnse nantloa kae. Nankhenga nanracham kase khana ṭhamak chei, kaṭong juimak cheia kae.

¹³ Khava jâra tûnchu hiva ram a inphut nangni leh nanpu sōnhei tamanhret phungmak ram a kahnong sōt sik chei. Khana khan nangni’n sûn leh jân pathen ralak-hei kha nanrazen sik jo hei, ke’n lungsetna kha manhmu mak chei ning.’”

Rehring surna inphut He’nlena

¹⁴ Rōngpu’n ahri, “Israel mihei Egypt a inphut anhei kaṭhōisōt akahring Pathen, kei rahming pan a mipui he’n ṭong an-intep makna sik pha kha kajōng jo.

¹⁵ Khava kanek a, sak ting ram a inphut a leh kalei kathek manchaina ram rakip heia inphut Israel mipuihei anhei kaṭhōisōt akahring Pathen, kei panna anmani ṭong intep sik jo hei. Ke’n anpu anpahei kaleipek jo anrama hin kaheiṭhōi male nôk sik hei. Rōngpu ke’n kahri jo kae.”

Akahong sik Karâkna

¹⁶ Rōngpu’n ahri, “Ke’n hiva mihei kasur sik, nga kasur mi katamtak kajōngtir sik hei. Khava sōa shachâng kaleng katamtak, tlângbung leh hmebung khana hlungkhur shung heia inphut ankahnong sōt sik a kajōngtir sik hei.

¹⁷ Ke’n anmani tatlo rakip kahmu sō. Kei hnenga inphut heite inthup theimak, ansetnahei kahmit hmua inphut tlânsōt tor mak.

¹⁸ Ke’n ansetna leh anṭhatmakna jâra chen inhnia karâkna kapek sik hei, ajârchu karamshung hi akahringmak jo taksa kalōng kapō, anlimsyem hei khan anmanbōk jo khana akadik mak an-pathenhei kha anmansipsō jo.”

Rōngpu hnenga Hlamrintak a Jeremiah Ngekna

¹⁹ Rōngpu, nang karatha ngarna leh ani kahrung che kae, inrengna pha na’nthōpui eng. Raleichung inchaina inphut jât-hei nahnenga kahong sik hei khana anhri sik, “Kanpu kanpa he’n pathen kadikmak kha tei loa heite leinei mak hei, akahnem mak limhei tei loa heite leinei mak hei.

²⁰ Mihe’n an-pathen kha anbinga antasyemthei sik mo? Changmak, ansyemthei inchu, khavahei kha pathen kadik changmak hei ning.

²¹ Rōngpu’n ahri, “Khava jâra kei ratha neina leh kahratna hi vōi khat rōk a a’nchaina hêra anmanhretna sik a kamanthei sik hei; anmani’n kei hi Rōngpu eng kae ti hi anmanhret sik jo.”