JEREMIAH 13 - LEKHARABU INTHENG (BSI)

Hruipōn innem Tōka Kabong

¹ Rōngpu’n kahnenga, kei kase leh hruipōn innem tōka kabong ajing karachôk a kaneina sik, tâk-kha tui shunga chu kanei makna sik a amanthei eng.

² Khava jâra ke’n kava rachôk heia kanei jo hei.

³ Khava pha Rōngpu’n kahnenga ahri nôk a ati,

⁴ “Nang Euphrates Tuidunga vase ina hlungkhur kave inkhat shunga tōka hei kha vathup hei roh.”

⁵ Khava jâra ke’n Euphrates Tuidung hnenga vakase enga kavathup jo hei.

⁶ Pha bongkhat sōa Rōngpu’n Euphrates a kavase leh tōka hei kha kavalo male nôkna sik a amanthei eng.

⁷ Khava jâra kei kase nôk enga kaleithupna hmun kha katlung pha, pōnhei kha kaṭetsō jo hei, heite ṭhamak jo hei.

⁸ Khava pha Rōngpu’n kahnenga ahri nôk. Ama’n ati,

⁹ “Hing’hin Judah inlensakna leh Jerusalem inlensakna pui akatluk jo kha kasukset sik kae.

¹⁰ Hiva mikaṭhamak-hei hin kaṭong jui sik hnōm mak hei. Anmani alerchet a anracham kase khana ṭhamak jo hei, pathen hlop hei ankamuk a anrazen jo hei. Khava jâra tûnchu, anmani hei hi anṭhatna heite aka-om mak jo tōka kabong hei kapōa kachang sik jo hei.

¹¹ Tōka kabong vânga nikhōn nisui manhnet tlit kapōa, hiva Israel leh Judah mihei seng in kahnenga anmatu manhnet tlitna sik a karei heia kae. Ke’n hinga katlona hi, anmani kami anchangna sik khana karahming kajana leh choi ka-ânna anhei choina sik a kae, tâk anmani’n kaṭong juimak jo hei.”

Vomhrui Jube

¹² Rōngpu Pathen in kahnenga ahri, “Jeremiah, Jube rakip ju anmansip petna sik a Israel mihei kha hripek hei roh. Anmani’n jube rakip ju mansip sik hichu kanmanhret jo tia anmasôn sik che.

¹³ Khava pha manthei hei roh, Rōngpu ke’n, hiva ram shunga mihei seng: David sōn leh pârhei, renghei, thempuhei, sânkathemhei, khana Jerusalema mi rakip an-inrui mak hma seng, ju kaman-in sik hei kae.

¹⁴ Khava pha ke’n anmani inkhat leh inkhat upa leh naipang ṭhenloa, bephu kapōa kavōk-khōi sik hei. Lungsetna, lungkhamna, khana maritna hei khan anmani that manramna kha akhartor mak ning.”

Jeremiah’n Inlensakna chunga Agîkna

¹⁵ Israel mihei, Rōngpu’n ahri jo! Insinsak una aṭong rangei ruh.

¹⁶ Rōngpu nan-Pathen kha kaja ruh, ama’n khō amanthim mak hma hin, khana tlângbung heia nan-inpai mak hma hin; nan-inhōrna vâr kha khō inthimpak amanchang pek mak hma chei hin.

¹⁷ Nangni’n nanrangei mak inchu, Nan-inlensak jâra, marûk a kaṭap sik eng; Inhnaktak a kaṭap sik eng, kahmit rathli kalōng sik ajârchu Rōngpu mihei kha rekahringa ankeisôn jo heia kae.

¹⁸ Rōngpu’n kahnenga ahri, “Rengpa leh anu kha anlen in-ongna inphut anjōng ṭumna sik a manthei hei roh, ajârchu anlukhu ret kaṭhahei kha anlu chunga inphut jōngkatla jo hei.

¹⁹ Judah thlâng tinga khōpuihei ankakekhumsō jo hei; tûte tlânsōt tor mak jo hei. Judah mi rakip rekahringa anṭhōi jo hei.”

²⁰ Jerusalem enroh! Sak tinga inphut na’nrepui nakadōihei kajōng jo hei! Khō jo mo nakahrung sik a nganse hei kha, na’nlensak pui namihei kha?

²¹ Nang in naṭhōnhei tia namandon mihei khan antor chea nachunga vai anrôn jo che’nchu, heimo nahri sik? Nuhmei naiha kaphu kapōa nade sik jo kae.

²² Heisa mo hiva rakip hi nahnenga ajōng kasōk, heisa mo napōnsi hei a’nhlersō, heisa mo mi’n rumhrat a antasetpui che tia derna nanei inchu-nasetna kha ṭit ka-om tak achang jo jâra kae.

²³ Mihe’n anvun lâr antathleng tor sik mo achangmak leh rûtnu’n aje kaṭe amanhmang tor sik mo? Anmani’n anthleng tor inchu, setna rōk akatlo nangni he’num akadik tlona inthemchûk thei sik chei.

²⁴ Rōngpu’n nangni, nêrdiram thōia thli’n sapôt asêm manjōng kapōa akathek sik chei.

²⁵ Khavakha nangni vâng chen sik kae ati. Khavakha ama’n nanhnenga tlo sik a amandon jo kae, ajârchu nangni’n ama nanmahngia pathen kadikmak hei nantaksen jo heia kae.

²⁶ Rōngpu ama khet in nan-inzakna sik, nanpōn nander asōtpek sik chei.

²⁷ Ama’n amater ṭōn nantlona kha ahmu jo chei. Khōvelhei pathen chingbunga leh phaichama, pase inkhat in a-inn sirpa nuhmei amadu achangmak leh shakor chere kahur in arala atajui kapōa nansena hei kha ama’n ahmu sō cheia kae. Jerusalem mihei, nangni inhmang jo chei! Heitiktâk leh mo nangni a’ntheng sik chei?