JEREMIAH 10 - LEKHARABU INTHENG (BSI)

Lim leh Akadik Kamukna

¹ Israel mipuihei, nangni sik a Rōngpu ṭong thangkōi hi rangei ruh!

² Ama’n ahri, “Jât-hlop hei omchen kha juimak ruh; marvâna a’nlak hmun a hei khan manbōi mak chei rasoh, jât ralak he’n an-inpirna jo’num.

³ Hiva mihei bekdân hi hmangna kase kae. Ratu shunga thingkung inkhat anphûra, thingsui kathemhei hmangchâk vânga, lim kha anhem rabek

⁴ khana sana leh dangka vâng aret ansyema kae. Khava aret hei kha atlâk makna sik, jôtpi vâng ankir mankop a kae.

⁵ Hinghiva limhei hi dônkho hleia, va leh shahei taṭit sik a lim matung kapōhrep kha kae; ṭongthei mak hei; anmani hi kadom lele sik hei kae ajârchu ke choithei mak heia kae. Khahei kha ṭitmak hei ruh: anmani’n heite manlotor mak tin chei, nanṭhatna sik heite tlotor mak hei.”

⁶ Rōngpu, nang kapō inkhatbek om mak; nang chu kahrat che, khana narahming kha kalen khana ratha kaneitak kae.

⁷ Jât rakip reng nang hi tu’n mo akaja mak sik che? Nang chu kaja sik a narahōi kae. Nang kapō tûte om mak, jât rakip a mikasinghei kâra, khana anrenghei kâr a’m om mak.

⁸ Ankhenga kamohei khana invet hei. Thinga lim syem heia inphut anmani’n heimo themna antahmu sik?

⁹ Anlimsyem hei kha Spaina dangka vânga, khana Uphaz a sana vânga, kut kathemhei tasyem rakip hei kha ankatōm hei; anmani kha vapuirei machu pōn leh sendup pōnhei, pōnkhông kathemhei takhông vânga khan anmanret hei.

¹⁰ Tâk-kha Rōngpu nang chu akadiktak Pathen che kae, akahring Pathen che kae, kumleikōa reng che kae. Nang nahnuk anat pha, raleichung hi innok; jât he’n nahnuknat kha detor mak hei. (

¹¹ Nangni mipui chei in anmani manthei hei ruh ti chu ralei leh marvân kasyem mak, pathenhei kha suk manset sik hei kae. Anmani kha raleichunga hin omsôt mak hei ning.)

Pathen Choi ka-ânna Hla

¹² Rōngpu’n aratha neina vânga ralei hi asyem, asingna vânga vânhnōi ralei hi asyem, khana marvânhei azersōt heia kae.

¹³ Ama ṭongpek a bōirōk chunga tui kha khō amanri; ama’n ralei inchaina inphut sumtuk ahei choi. Khōsûr kâra khō inphe asyem, khana akarōi bukna inphut thli kha ahei tirsōt a kae.

¹⁴ Hiva anhmuna hin, mipuihei kha mona leh invetna annei; lim kasyem hei kha inhmakna annei, ajârchu antasyem pathenhei kha dikmak hei khana hringmak heia kae.

¹⁵ Khahei kha hnemna kase hei kae donmak sik hei kae; anmani enmansinna sik a Rōngpu kha ajōng pha, suk manhmang sik jo hei kae.

¹⁶ Jacob Pathen khachu, khavahei kapō changmak; ama chu heirakip kasyem kae, Israel kha ama mikhet sik a akadeisōt jo hei kae. Chunghnung Rōngpu kha ama rahming kae.

Rehring Surna sik a Akahong

¹⁷ Jerusalem mihei, nangni surkhum jo chei kae! Nanneinâk-hei inchom intûp jo ruh.

¹⁸ Rōngpu’n hiva ram a inphut ahlon sōt sik jo chei; inkhatbek ṭhenloa asuk rachen sik chei. Rōngpu’n ahrisōt jo kae.

¹⁹ Jerusalem mihe’n ka-ông heia anti, “Heituk-hrep a a’ntôn jo me mo! Ni’ntônna bi hi dammak jo ning. Khana hivahi nidetor sik tia eini’n nilei mandon!

²⁰ Nipōn innhei inhlersō jo hei; ankhit mankeina hrui hei intansō jo hei. Nisahei kase sō jo hei; nipōn-inn ani’n tungpek sik tûte om mak jo; pinden ani’n kheipek sik om mak jo.”

²¹ Ke’n kamasôn hei, “Nihlam kakeihei kamo hei; anmani’n Rōngpu hlamkeina sik a dermak hei. Hiva jâra hin antator mak kae, khana nimihei inthek inchai jo mea kae.

²² Rangei ruh! Ṭong kajōng jo! Sak tinga jât inkhat kâra mipui inhângna kalentak ka-om jo; anremihei khan Judah khōpuihei kha ram-uihei omna nêrdiram anmanchang sik jo.”

²³ Rōngpu, mi inkhatbek hi abing hringkhō tlunghmun katinta om mak ti hi ke’n kamanhret jo; tûte inkhatbek in abing hringkhō hi inkhimtor mak.

²⁴ Rōngpu, namihei manse hei roh, tâk-kha kanchunga khôkrei mak roh, khana nahnuk anat pha leh karâkna apek mak roh; khava khachu keini inchaina kachang sik.

²⁵ Nahnuk natna kha nang inmukmak jât-hei chunga, nang kahlonsōt mipuihei chunga mahe roh. Anmani khan namipuihei anthat hei; anmani’n keini pui katluk a ansuk manhmang ung khana kanram kha suk manrama anda joa kae.