JAMES 4 - LEKHARABU INTHENG (BSI)

Vânhnōi Ralei leh Ṭhōnchang

¹ Nankâra innâk-inse rakip hei hi khona inphut ahong kasōk mo? Khavakha nanmalung shunga a’nseṭhak hei, hōina maduna inphut ahong kasōk changmak mo?

² Nangni’n heikhat nanmadu, tâk nei tor mak chei, khava jâra mi that sik a intluk chei; neinâk-hei nanmaduhêr, tâk nei tor mak chei, khava jâra innâk chei khana inse chei. Nanta madu kha chenmak chei ajârchu khavakha Pathen hneng dermak chei.

³ Khana nangni’n nander pha hmumak chei ajârchu nanmalung rôn dikmak a kae; nanbing hōina sik a nandera kae.

⁴ Eh taksenthei kachangmak mihei! Vânhnōi ṭhōn changna hi Pathen kadōi kae ti manhret mak chei mo? Tu achang inum vânhnōi ṭhōn chang sik indu khan Pathen kadōia a’nsyem hei kae.

⁵ Ṭong intheng in hinga ahri hi adikna heite om mak tia mandon mak ruh, “Pathen in nishunga adapek me rathla khan ṭit ka-om tak madu rangeina kasip hêra kae.”

⁶ Tâk-kha Pathen tapek maritna kha kangar chet jôk. Ajârchu ṭong intheng in hinga ahri, “Pathen in a’nlensak kha akhar, tâk a’nsinsak kha maritna apek.”

⁷ Khava jâra nangni Pathen hneng hlut ruh. Diabol kha ting ruh, khan chu nangnia inphut katlân sik jo.

⁸ Pathen heihnai ruh, khan chu ama’n ahei hnai sik chei. Eh mikaset-hei; nankut sôp mantheng ruh! Eh a’nhri inṭhat hei, nanmalung mantheng ruh!

⁹ Inrim una peng ruh, ṭap ruh, nanmanuina kha ṭapna vâng, nan-inpâkna kha malung natna vâng manthleng ruh!

¹⁰ Pathen ângshunga insinsak ruh, kha achang inchu ama’n akadom manshâng sik chei.

Sōpui Inkhat Chunga Ṭongtan makna sik Mansena

¹¹ Kasōpuihei, nangni inkhat leh inkhat inhri insettō mak ruh. Tu achang inum asōpui kahri inset khana ṭongkatan mi khan Dân kha ahri maset a a-ensin kae. Nangni’n Dân chunga ṭong nantatan achang inchu nangni Dân kajui kha changmak chei, tâk aka-ensin chei kae.

¹² Pathen rōk kha dân kapek leh ṭongkatan kae. Ama rōk in ahuk manhring tor khana asuk manhmang tor. Tu mo inkhat chunga ṭongkatan nang tu eng mo kae tia a’ndon che?

In-orna Chunga Mansena

¹³ Hinga, “Tuning a-emak leh jîng kania sova khōpuia sōn vase me sona tûnkum chu va’nvei rih,” tia akahri nangni tûn rangei ruh.

¹⁴ Jîng kania nanhringkhō kha hei-achang sik nangni’n manhret mak chei! Nangni chu pha bongkhat rōk a’nhmua a’nhmangloi hmeikhu bobkhat kapōhrep chei kae.

¹⁵ Nanta hri sik khachu: “Rōngpu’n ahnōm pek mea achang inchu, kahring kadam sik me khan chu kha leh kha nitlo sik,” ti ruh.

¹⁶ Tâk-kha tûn nangni inlensak chei khana in-or chei; khang khava in-orna rakip kha dikmak.

¹⁷ Khava jâra akaṭha tlo sik a inhret, akatlomak hei kha setna ṭhena akaneihei kae.