JAMES 3 - LEKHARABU INTHENG (BSI)

Malei

¹ Kasōpuihei, nangni mi katamtak mi’nthei akachangmak sik chei kae. Nantamanhret kapōa, eini mi’nthei me hi milak-hei kanek a kakhôk chet a niṭong antan sik kae.

² Eini mi rakip in ṭhena ninei ri. Tâk-kha mi inkhat in aṭong hrina ṭhena aneihêr mak inchu, ama kha ataksa pumpui insur tor pui katluk mi inkhat kae.

³ Eini’n niracham manjuina sik beirâk hrui kha shakor beia nithōna kae, khana nimaduduna ting nimanse tor.

⁴ Khan chu rakōng so mandon ruh: akalen hlok chu kae, khana thlihrâng inhnak inchu asemtlentor, tâk akatôrpa’n rakōng makhe vâng amadu-duna atôra kae.

⁵ Khava kapōa malei hi’m kae: akasintek chu kae, tâk akalentak chunga in-orna ṭong ahrisōt tor. Heituk kalen ramthip kha hmeirasi inkhat in aro mankângsō tor kha mandon ruh!

⁶ Khana malei hi hmei kapō inkhat kae. Hivahi akaṭhe omna hmun inkhat kae, nitaksa shunga hmun ahlōa akaṭhamak kha nihringkhō katlung bit a asemsōt kae. Hivahin nihringkhō katlung bit a kathi hmeikhura inphut ahong kasōk hmei leh inthoia kakânga kae.

⁷ Mihring in ranhring rakip alâk mannema aracham amanjuitor, ramshahei, vahei, abok a insônhei, khana ngahei.

⁸ Tâk-kha tûte inkhat in malei hichu lâk mannemtor mak. Hivahi ṭhamak khana lâktor changmak, thina tûr kasip a kae!

⁹ Eini’n malei hi ni-Rōngpu leh ni-Pa choi ka-ânna nihmang, khan chu Pathen kapōa asyem, jo milak-hei hâksêrna’m nihmanga kae.

¹⁰ Bei inkhat rōk a inphut manpâkna ṭong leh hâksêrna ṭong kasōk a kae. Kasōpuihei, hivahi akachangmak sik kae!

¹¹ Tuiripût inkhat rōk in akathlum leh akakha tui pûtsap mak!

¹² Kasōpuihei, theichang kunga olive inramak, khana vomhrui jâma theichang inra phungmak; a-emak leh chikhura inphut tuitak sōk theimak a kae.

Chungtinga Inphut Singna

¹³ Nankâra mikasing, manhretna kanei ka-om mo? Anmani’n singna leh malung innem vâng ṭōn kaṭha tloa, hringkhō kaṭha vâng khan antamalâr sik kae.

¹⁴ Tâk-kha nanmalung shunga thangsetna, enkadana, tabinga ngeitōna a-om inchu, nansingna chunga in-orna ṭongsō vâng akadik kadōia set nôk mak ruh.

¹⁵ Hinghiva singna hi marvâna inphut akajōng changmak; raleichung ta kae, hiva hichu rathla aka-emak ṭai kae.

¹⁶ Ajârchu thangsetna leh tabing ngeitōna omna khan akaṭhamak rakip leh inhmakna kha aka-om kae.

¹⁷ Tâk-kha chunga inphut a singna khachu, hma inkeipena a’ntheng kae; khan chu mōngna kasip, nunkahōi, ṭhōn changtheina kha kae; hivahin lum lona kasip khana ṭōn kaṭha kara khômna kha amannei; hivahi inṭhat hlemsakna leh ôtum aka-om hêrmak kha kae.

¹⁸ Khana intōk inchamna katlo he’n malung kadaia antavor hmuchi kara antakhôm khachu ṭhatna hi kae.