JAMES 1 - LEKHARABU INTHENG (BSI)

¹ Rōngpu Jesu Christa leh Pathen sōk James a inphut: Vânhnōi raleichunga inchek-chaia ka-om Pathen mi rakip hneng chibei kahei tlochei.

Taksen leh Singna

² Kasōpuihei, mathlemna rakip nanchunga ahong tlung pha leh kanmahâm kaṭha tia mandon ruh,

³ khang khava mathlemna kha nantaksen in ator pha, khana inphut detorna ratha nannei ti kha nanmanhret.

⁴ Nande hratna khan heite katlasam mak, pui katluk kha nanchangna sik nanhlam hrona tlâksamloa aṭhōi chei ti kha manchên ruh.

⁵ Tâk-kha nankâra tu achang inum singna tinga akatlasam a-om inchu anikapek sik Pathen hneng ama’n der rasoh, ajârchu Pathen in mi rakip malung kalentak a leh marittak a apek hei kae.

⁶ Tâk-kha nander pha leh nanta taksen nger sik khana malung inkei-chiona nantanei hêrmak sik kae. Tu achang inum malung inkei-chiona kanei mi khachu tuipui chunga thli tasêmlele tui in-nông kapō kha kae.

^7-8 Khang khava mihei, anmalung syem manṭhat torlo hei khana antlona rakip a ṭong chaisōt torlo hei kha’n Rōngpua inphut heikhat kanhmu sik tia mandon mak hei rasoh.

Sara leh Akahao

⁹ Christian sara kachang hei kha Pathen in akadom manshâng hei pha ala’npâk nger sik hei kae,

¹⁰ khana Christian mikahaohei kha Pathen in asuk manhnem hei pha ala’npâk sik hei kae. Ajârchu nei leh hao kha kaharpâr aṭōi kapōa ala’nhmang sik kae.

¹¹ Kani ahong inshâng pha, kahar kha aset mankânga, apâr kha amanvōi, khana aṭhatna kha kaṭi jo. Khava kapōa mikahao kha’m inveina sik anse anhongna a’nhmang sik hei kae.

Enmansinna leh Mathlemna

¹² Enmansinna shunga taksenthei kachang ṭhak kha mikahōihei kae, ajârchu enmansinna kha anrakan tor inchu, Pathen in alungset hei hneng pek sik a aṭong tepsa hringna lenlukhu kha tloman antarahlâng sik kae.

¹³ Khang khava enmansinna khan amathlem he’nchu, “Hiva mathlemna hi Pathena inphut akahong kae,” tia antatimak sik kae. Ajârchu akaṭhamak in Pathen mathlem tor mak, khana ama khet inum tûte mathlem mak.

¹⁴ Tâk-kha mihei kha anbing ṭhatmak madu rangeina khan châng akam heia aṭhōi hei pha mathlemna akatla hei kae.

¹⁵ Khana anmani ṭhatmak madu rangeina kha hong injōra setna amatet, khana setna khan pui ahongtluk pha, thina amatet a kae.

¹⁶ Kasōpui marit hei, hōnmathlâk a om mak ruh!

¹⁷ Kutchoi kaṭha rakip leh kutchoi pui katluk rakip marvâna inphut kae; khavakha marvâna vârhei kasyem, inthlengtik kaneimak khana ahmai amahea inthim insōmak, Pathena inphut kae.

¹⁸ Akutsyem rakip kâra eini’n hma inkeipen kha nichang theina sik, ṭongdik vâng khan alungdotak a ajōngṭhōi jo me.

Ṭong Rangei leh Ṭōntlo

¹⁹ Kasōpui marit hei, hivahi mandon ruh! Mi rakip in rangeina ting chu inrang ruh, tâk ṭonghrina ting leh hnuk natna ting chu in-êng ruh.

²⁰ Mihring hnuk natna hin Pathen tamantluk dikna kha chenthei mak.

²¹ Khava jâra a’nthengmak leh akadik mak omchen rakip a inphut tlânsōt ruh. Pathen hneng hlut ruh, khana nankahuk inhringtor sik ṭong nanmalung shunga aling jo kha rahlâng ruh.

²² Ama ṭong nantathei hnâm vâng khan nangni nanbinga inhōn inthla mak ruh.

²³ Ajârchu tu achang inum aṭong kathei jo tâk ṭōnna akatlomak mi kha thle enna ahme ka-en mi inkhat kapō kae.

²⁴ Ama’n athle kha kaṭhadek a a-en jo khana kasesōt jo khana khatak khan ahme pō kha amahngi jo.

²⁵ Tâk-kha mihring ning leh hnōma a’nsō puikatluk dân chunga malung akahlut ṭhak hei, môk a anrangei leh antamahngi bât changlo, tâk ṭōn vâng akatlosōt hei kha, anṭōn tlona chunga Pathen in vângṭhat apek sik hei.

²⁶ Nangni tu inkhat in bektinga malung kahlut eng tia a’ndon mo? Nangni’n nanmalei nankhim tor mak inchu, nangni bekṭong kha ahnemna kase leh nanbinga a’nhōn inthla chei kae.

²⁷ Pa Pathen in akadik leh a’ntheng bekṭong tia alo khachu hi kae: nu leh pa kasehei leh renghmeihei khōdengthei pha ensui sik khana raleichung hōn mathlâkna inphut binga sōksōt sik hi kae.