ISAIAH 8 - LEKHARABU INTHENG (BSI)Isaiah Sapa Mihei sik a Chîkna Inkhat 1 Rōngpu’n kahnenga ahri, “Mazetna sik heikhat apheng kalen lo roh; achunga amazek kalen vâng mazet roh: ‘Inranga minei kachom, Inranga suk manhmangna ke kayâng tia’. 2 Khana taksenthei sâkhi mi 2, Uriah thempu leh Jeberekhia sapa Zechariah da hei roh.” 3 Khava sō pha ṭhahrep kahnunga kanuhmei in nai avon jo. Kansapa kha a’nte pha, Rōngpu’n kahnenga ahri, “Arahming hi ‘Inranga Minei kachom, Inranga Suk manhmangna ke kayâng,’ tia phō roh.” 4 Naite khan, ‘Apa,’ leh ‘Anu’, atithei mak hma Damascus nei rakip leh Samaria neichom rakip akhenga Assyria rengpa’n anrônsō sik jo.” Assyria Rengkalen Jōng sik 5 Rōngpu’n kahnenga kaṭong nôk a. 6 Ama’n ati, “Hiva mihe’n Shiloa kavadung tui kadaineng kha anmadu mak jâra, Reng Rezin leh Reng Peka hmaikunga anratha innok jo. 7 Rōngpu ke’n Assyria rengkalen leh aremi rakip Judah re kasō sik a kajōngṭhōi sik. Anmani kha Euphrates Tuidung in tui alen pha tuipang achûmsō kapōa hongkahlut sik hei. 8 Anmani tuikalen in nidâr katlunga achûma heirakip amakhusō kapōa, Judah ram shunga heikahlut sik hei.” Pathen in a-ompui me! Ama mathla zâr thōia ram hi aka-unsia kae. 9 Jât rakip ṭittak a intûp ruh! Ram hmun kahlatak a ka-om nangni’n, rangei ruh! Re katuk sik intluk ruh, tâk ṭit ruh. Kadik, intluk ruh, tâk ṭit ruh! 10 Nanṭōn mantluk ruh! Tâk anmani hmesō hêrmak hei ning. Nanmadu chenna ṭong ruh! Tâk akhenga ahnemna kase kae, ajârchu Pathen in keini athlop unga kae. Rōngpu’n Sânkathem Agîk 11 Mihei tajui hlam kha kahro makna sik Rōngpu’n aratha neina kalentak vâng khan agîk eng. Ama’n ahri, 12 “Mihei ṭōnmantluk a khan inveisa mak roh, khana anmani taṭit a khan ṭitmak roh. 13 Mandon sōt roh, Rōngpu Chunghnungpen kei intheng eng; nantaṭit nger sik kha kei eng kae. 14 Kei ṭit ka-om tak inthengna jâra, kei hi mihei inpaina hlungpui inkhat ka-ang eng; kei hi Judah leh Israel rengram khana Jerusalem mihei in-ôkna sik châng ka-ang eng. 15 Mi katamtak inpai inthlûk sik hei; katlu sik hei khana insuk kachip sik hei. Anmani chânga in-ôk sik hei. Akathi leh Ṭong inlo jâra Gîkna 16 Kasonle nangni’n, Pathen tapek eng ṭongpek nantahngâk a nantahrung sik kae. 17 Rōngpu kha ami heia inphut inthup a kae, tâk ke’n ama kataksen, khana ama inhōrna kanei. 18 Hinahin, Rōngpu tapek eng naipanghei leh kei ka-om ung. Chunghnung Rōngpu alen in-ongna Zion Tlâng chunga intungpa khan Israel mihei hneng akahring ṭong thangkōi sik a ajōngtir ung kae. 19 Tâk-kha mi he’nchu kutze ka-en hei leh rathla inbekpui hei, tla kasânhei der hei ruh, anti sik chei. Anmani’n anti sik, “Hei-achang inum, mihe’n akahring hei kahlanga, ṭong thangkōi kha rathla leh akathihei hneng antader sik kae.” 20 Nang in hing’hin masôn hei roh, “Rōngpu’n amanthei chei kha rangei ruh! Rathla inbekpui mihei kha rangei mak ruh, anmani mantheina khan akaṭha kha sōk mak ning.” Insuk Inbōina Pha 21 Mipuihei kha ram shunga kalôn inhmak sik hei, khana anmalung katla sik, anvon kaṭâm sik. Anvonṭâm leh anhnuknat jâra anreng leh an-Pathen kha anhâksêr sik. Marvân chungting an-en sik, 22 khana ralei thōiting an-en sik, tâk khō inthim leh inchokna, ṭit ka-om khō kajingpak shunga ṭhōi manhlutna tei loa heite hmumak hei ning. |
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
Bible Society of India