ISAIAH 64 - LEKHARABU INTHENG (BSI)

¹ Heisa mo chungvân hei nakei hlera ajōng kaṭum mak che? Tlângbung he’n anhmu sik a kha kaṭi heia anratha innok sik.

² Anmani hmei kaluma tui kachōr kapōa innok inthing sik hei. Jōng ṭum ina narathahrat kha na’nrepuihei hneng malâr roh, khana jât-hei hi na-âng shunga mannok hei roh.

³ Pha khat a nang kajōng chea keini’n kantamandon phakmak ṭit ka-om ṭōn naleitloa kae; tlângbung he’n anhmu chea anṭit a le’nnok hei.

⁴ Nang chunga inhōrna kanei mihei hnenga khang khava ṭōn katlosōt, nang kapō Pathen chu tûte inkhat in hmuphung mak, thei um lathei phungmak.

⁵ Ṭōn kadik katloa inpâkna kahmuhei leh nang tamadu dungjuia hringna sik a’ndon hei kha nang in naralam hei. Kanchunga nahnuk kana, kha’num kasetsa chet-chet ung; inhnaktak a nahnuk anat inum tenlaia inphut akadik mak kantlo manjōm a kae.

⁶ Keini kankhenga mi kasettak leikachang ung; kanṭōn tlosōt akaṭhapen hei kapha kha’m akachok dâk kapō kae. Kansetna hei jâra thingbō invōia thli’n asêm manjōng kapō kachang ung.

⁷ Tûte nahnenga derna ahong kanei om mak; tûte inkhatbek inṭangpui sik a nahnenga akahong om mak. Keini kansetna jâra nadahlon jo unga keinia inphut nabinga inthup jo che.

⁸ Tâk-kha nang kanpa, kan-Rōngpu che kae. Keini ralei matlak kapō ung kae, khana nang be kakheng kapō che kae. Nang in keini nasyemsōt ung,

⁹ khava jâra kanchunga nahnuk mannat reimak roh achangmak leh keini dōina sik kansetna hei kha ahei tik a mandonṭhak mak roh. Keini nami ung kae; keini marit arôn roh.

¹⁰ Nakhōpui intheng hei kha nêrdiramhâng ka-ang jo hei; Jerusalem kha dahlona a’nsetsō kachang jo,

¹¹ khana kan-Bek-inn intheng hmun kaṭha kanpu kanpa he’n nang anleichoi ka-ânna che hi hmei in akângsō jo. Keini’n kanta lungset hmun seng insetsō pet jo.

¹² Rōngpu, hiva katlunga hinum inhling loa alaka-om sik che mo? Heite tlo loa alaka-om sik che mo, khana kanta detor mak sik katlunga khōdeng namanthei sik ung mo?