ISAIAH 62 - LEKHARABU INTHENG (BSI)

¹ Ke’n Jerusalem mathokna ṭong kahri sik; Amanu huksōt achangmak lai seng, Khana amanu retorna kha jân a hmeiser inkhat kapōa avâr mak lai seng sip timak ning.

² Jerusalem, jât he’n nang retorna anhmu sik jo! Anreng rakip he’n nalûrna kha an-en sik jo. Nang rahming ther inkhat a inbek sik jo che, Rōngpu amatak in apek che rahming inkhat kha kae.

³ Nang kha Rōngpu sik a lenlukhu kaṭhatak kachang sik jo che.

⁴ Nang hi “Hlonsōt” inti nôk mak jo tin, Achangmak leh naram kha “Dahlon nuhmei” inti mak jo ning. Narahming ther hi, “Pathen Malung Tlainanu” inti sik. Naram hi “Inpâktak a Lu kahông” inti sik. Ajârchu Rōngpu’n nachunga amalung katlai, Khana ama naram sik a apuise kapō kachang sik jo.

⁵ Rether inkhat in nuhngâk intheng inkhat hmōinu sik a a’nṭhōi kapōa Nakasyempa khan lu ahôngpui sik che. Hmōipa inkhat in hmōinu chunga atlai kapōa Na-Pathen kha nachunga amalung katlai sik jo.

⁶ Jerusalem, nakur bang heia, ke’n repa kahngâk kaman ngir hei; Anmani kha sûn leh jân a sip timak hei ning. Anmani’n Rōngpu hneng aṭongtep kha amandonsōtna sik antlo sik Khana ahei tik a ama’n anmani kha amahngi makna sik hei antlo sik.

⁷ Jerusalem kha asyemther mak kârseng, Khana vânhnōi tachoi ka-ân khōpui a-emak lai seng ama kha châm antamanhnga mak sik kae.

⁸ Rōngpu’n intepna marittak inkhat anei jo, Khana ama rathahrat vâng atlosōt sik jo: “Nasâng hei kha na’nrepui he’n sâk nôk mak jo hei ning, Khana ramlak mihe’n naju kha in nôk mak jo hei ning.

⁹ Tâk-kha hmuchi kavor leh kakhôm chei khan buhlom kha nansâk sik a kha Rōngpu kha nanchoi ka-ân sik jo. Vomhrui rahōn kathlō leh athei kakhôm nangni’n Kabek-inn shunga tetlânga aju nan-in sik jo.”

¹⁰ Jerusalem mihei, khōpuia inphut sōksōt ruh Khana nanmi ahong inle hei heihlutna sik hlamlen syem ruh! Hlampui mantluk ruh; hlunghei losōt hei ruh! Jât-hei manhretna sik a mêrchîkna inkhat da ruh.

¹¹ Khachu Rōngpu’n raleichung pumpuia aphôngsōt jo: “Jerusalema mihei manthei hei ruh Rōngpu kha nangni kahuk sik a kajōng jo, Ama’n ahuksōt mihei kha aheiṭhōi heia kahong.”

¹² Nangni “Pathen Mi Intheng hei,” “Rōngpu Tahuksōt mihei,” tia anbek sik jo chei. Jerusalem kha, “Rōngpu Talungset Khōpui,” “Pathen Tadahlon mak Khōpui,” inti sik jo.