ISAIAH 60 - LEKHARABU INTHENG (BSI)

Hnunga Jerusalem Lûrna

¹ Thōi roh, Jerusalem, khana kanivâr kapōa, vâr roh; Rōngpu lûrna kha nachunga jōng kavâr jo.

² Jât-hlop hei khachu inthim in amakhusi sik hei, Tâk-kha nang chunga chu Rōngpu vâr khan aser manvâr sik jo che; Ama omna vâr ra-âng khan nang a-ompui sik che.

³ Jât-hei kha navâr khan nahnenga ahongkei sik hei, Khana renghei kha’m nakani ther ting kahong sik hei.

⁴ Nakimve kha enroh heimo akasōk enroh: Namihei kha inna kahong sik a intûp jo hei! Nasahei kha ram kahlatak a inphut kahong sik hei; Nasanuhei kha’m naipang kapōa anheiṭhōi sik jo hei.

⁵ Nang in hivahi nahmu sik a kha namalunga inpâkna kasip sik jo. Inpâk lôtna natak innokleo sik che. Jât-hei nei leh hao nahnenga anhongrôn manhlut sik; Tui-ôngpui rea inphut annei leh hao kha kahong sik.

⁶ Midian leh Ephah ram a inphut sharîngsei katamtak kahong sik hei, Sheba ram a inphut, sana leh marim katui anhongrôn sik. Mihe’n Rōngpu ṭōntlo ṭong kaṭha kha anhri sik.

⁷ Cedar leh Nebaioth ram a kemōng rakip Inthoina sik nahnenga anhongṭhōi sik hei. Khana Rōngpu tlaina sik a maichâma antōk sik hei. Rōngpu’n a-Bek-inn kha hma kanek a kalûra asyem sik.

⁸ Sumtuk intôr kapōa, Vaṭhu hei anrabua ajōng inle hei kapōa, rakōng heiso hei rakōnghei mo?

⁹ Sohei so ram kahlatak a inphut akahong rakōnghei kae, Pathen mihei innlangting anta heiṭhōi hei kae. Anmani’n Israel Pathen intheng, Amihei kha jât rakip takaja sik a ankasyempa Rōngpu rahming kha kajana sik a, Anmani’n sana, dangka anhei rônsa a kae.

¹⁰ Rōngpu’n Jerusalem hneng ahri, “Ramlak mihe’n nakur bang kha anhong syem manther sik, Khana anreng he’n nang anhong razen sik che. Kahnuknat a kalei karâk jo che. Tâk-kha tûnchu ke’n kalungsetna leh kamaritna kha kamanhmu sik jo che.

¹¹ Asûn-ajâna nakekot inhlang sik, Jât-hei renghei khan, Annei anhao nahnenga anhongrôn manhlut theina sik.

¹² Tâk-kha nang inzenmak jât-hei khachu Suk manhmang cher sik hei kae.

¹³ “Lebanon ratua thing kaṭhapen Hmeila thing, juniper thing, khana Cypress thing hei, Jerusalem, nang sak mantherna sik a anta heichoi sik kae, Kabek-inn syem manṭhatna sik a, Kakhōpui kalûrtak a syemsōtna sik a kae.

¹⁴ Nangni kasuk inrim hei sōn leh pârhei kha kahong sik hei kajana malârna hong-inkun sik hei. Pha khat a nang hnōisea nakatlo hei seng nakekunga antakamuk sik che kae. Anmani’n, ‘Rōngpu khōpui,’ ‘Israel Pathen Intheng khōpui Zion,’ tia anphō sik che.

¹⁵ “Nang dahlon nôk mak jo hei ning, khana ahōt nôk mak jo ning, Khōpui andahlon leh akarōksai kha changmak jo ning. Ke’n kamanlen sik che, nahme kamanṭhat sik, Ahei tik a inpâkna hmun kahōia kasyem sik jo che.

¹⁶ Jât leh reng he’n antinta sik che, Anu’n asa kaṭha nenga arazen kapōa Rōngpu ke’n, kahuksōt che Ratha kahrat Israel Pathen khan ning leh hnōma amasō jo che ti hi nahong manhret sik jo.

¹⁷ “Ke’n sum-êng kahlanga sana Thir leh thing kahlanga dangka leh sum-êng, Khana hlung kahlanga thir nang sik a kahong rôn sik. Navai karôn he’n asuk manrim nôk mak jo hei ning; Ke’n anmani kha dikna leh inchamna katloa kasyem sik hei.

¹⁸ Hnuknat rasa inthei nôk mak jo ning; Naram kha suksetna khan sukkhōi nôk mak jo ning. Ke’n nang bang kapōa kahrung sik chei; Nang in kei namanpâk sik eng ajârchu ke’n nang kahuksōt jo che.

¹⁹ “Sûna kani kha nang sik a vâr chang nôk mak jo ning Achangmak leh jân a thla kha nang sik a vâr chang nôk mak jo ning; Rōngpu kei hi nang sik a kumleikōa vâr kha kachang sik jo eng; Kei lûrna vâr khan nachunga asêr manvâr sik jo.

²⁰ Nakhōdeng theina kani kha inchai sik jo. Rōngpu kei hi are-rea navâr kachang sik eng, Kani leh thla kanek a ka-omsôt sik eng.

²¹ Nang mihei seng in ṭōn kadik antlo sik, Khana ram kha ahei tik a anhlō sik jo. Ke’n anmani kaling hei, Ke’n kasyem hei, Vânhnōia kalenna phôngsōtna sik a kae.

²² Nang akasinpen leh thōi katōngpen innshunghei kha’m Ratha kaneitak jât kalen kapō hongkachang sik hei. Aphatak kha ahong tlung leh, Ke’n hivahi inrangtak a ahong sōkna sik kasyem sik. Kei Rōngpu eng kha kae!”