ISAIAH 52 - LEKHARABU INTHENG (BSI)

Pathen in Jerusalem Ahuk sik

¹ Jerusalem, ngar roh, len nôk roh! Pathen khōpui intheng, pōnret kalûrtak a invon roh! Pathen ka-ôimak he’n nakekot a avea hlut nôk mak jo hei ning.

² Jerusalem, nabinga inthengsōt roh! Vaiphin kâra inphut thōisōt roh khana nalen in-ongna in-ong jo roh! Ziona sura ka-om mihei, nan-inkhitna kha sōt jo ruh!

³ Chunghnung Rōngpu’n amihei hneng ahri, “Nangni sōk nanchang pha khan, nangni sik a sêr heite le’npek mak chei; khava kapōa nansōksōtna sik a heite inpek mak ning.

⁴ Nangni khōhmea Egypt a omna sik a nanleise pha, nanrachama leikase cheia kae; achang ravâng Assyria he’n rumhrat a anleikeisōt chei khana nangni sik a heite aleipek mak hei.

⁵ Khana tûn Babylona hinum khang kapōhrep a kasōk a kae: Nangni rehringa ansur chei, nangni sik a heite apemak hei. Nanchunga vaikarônhei kha inlensak heia ṭong er ansō khana kei anhnōise ṭhak eng.

⁶ Akahong sik pha khan kei hi Pathen eng kae khana nanhnenga ṭong kahri kae ti hi nanhong manhret sik jo.”

⁷ Ṭongphông karôn inkhat tlâng ahei rakan a kahong, ṭong kaṭha, mōngna ṭongphông ahei rôn ama hmu sik kha heituk a a’nlak jo mo! Ama’n retorna aphônga Zion hneng ahri, “Na-Pathen kha reng kae.”

⁸ Khōpui repa kahngâk-hei khan ka-ông hei, inpâk a khōtlâng an-ônsap! Rōngpu’n Ziona ahong inle kha, anhmit khet in anhmu tor a kae!

⁹ Jerusalem suk manset a aka-om nang, inpâk a peng jo roh! Rōngpu’n akhōpui kha asansōt sik, khana amihei lungmōng apek sik hei.

¹⁰ Rōngpu’n arathahrat intheng kha ahmang sik; amihei ahuksōt sik hei, khana vânhnōi pumpui in antahmu sik kae.

¹¹ Babylon nantadahlon sik a manchên ruh, nangni bek-inn hmangchâk karônhei! Akaser neinâk tônmak ruh; nanbing et a insu intheng ruh khana heidahlon ruh.

¹² Tûna pha hinchu inhnottak a nantadahlon mak sik kae; tlânsōtna sik a a’nrei mak sik chei kae. Rōngpu nan-Pathen in hlam akei sik chei. khana ramkei rakip a akahuk sik chei.

A’nreng Sōkpa

¹³ Rōngpu’n ahri, “Kasōkpa kha aṭōn tlona khan hme asō sik; ama kha inshângtak a kajana achen sik.

¹⁴ Mi katamtak in ama anhmu pha anmalung atôn sik; ataksa kha inthleng hêr joa mihring hme pōmak jo.

¹⁵ Tâk-kha tûnchu jât katamtak in achunga inlak ansak sik, khana renghei kha inhmak heia ṭongmak hei ning. Antamanhret phâk hêrmak kha anhmu sik khana anhong manhret sik jo.”