ISAIAH 51 - LEKHARABU INTHENG (BSI)

Jerusalem Lungmōng Thlâkna Ṭonghei

¹ Rōngpu’n ahri, “Kaṭong hri rangei ruh, hukna indu hei, inthōpui sik a kahnenga akahong nangni. Nanhong inphutna hlungpui kha mandon ruh, nangni inchômsōtna hmun kha jongsōt ruh.

² Nanpusōn, Abraham, leh Sarah nanhong kōnna hei kha mandon ruh. Ke’n Abraham kabeksōt lai, ama sa leinei mak a kae, tâk-kha ke’n mahâmṭhat kapek a sa leh nai kaleipek; atu asa anja kamantam pek hei.

³ “Ke’n Jerusalem hneng, khava inhmangna shunga aka-om hei seng hneng lungsetna kamanhmu sik hei. Aram kha nêrdiram aleichang jo’num, rahōn inkhat a kasyem sik, Eden rahōn kaleisyem kapōa. Inpâkna leh ningṭhatna, khana khan ka-om sik khana kei choi ka-ânna leh manpâkna hla ansak sik.

⁴ “Rangei ruh, kamihei, heimo kahri hi rangei ruh: Ke’n jât-hei hnenga kaman theina hi kapek hei; kadânhei hin vâr ahong rôn pek sik hei.

⁵ Kei inranga kajōng sik eng khana kahuk sik hei; kei retorna sik pha kahnai jo. Kei khet in jât-hei chunga vai karôn sik. Ram kahla mihe’n kei jōng sik kha anhngâk eng; anmani’n ankahuksōt sik a inhōrtak a anhngâk eng.

⁶ Enroh, chunga marvânhei so, enroh raleichung um! Marvân kha hmeikhu kapōa inhmu mak jo ning; raleichung hi pōn marō kapōa kaṭetdâk sik jo, amihei seng kha mathōi kapōa kathisō sik jo hei. Tâk-kha kajōng rôn hukmanhringna khachu ahei tik a ka-om ṭhak sik; karetorna kha achaina kachang sik.

⁷ “Kaṭong rangei ruh, nangni akadik inhret hei, nanmalunga kaman theina kahnet a a’nvon hei. Mihe’n êngset antlo cheia inzakna anpek chei pha ṭitmak ruh;

⁸ anmani kha ra-nge’n asâk pōn kapōa inhmang sik jo hei! Tâk-kha kajōng rôn hukmanhringna khachu ahei tik a ka-om ṭhak sik; karetorna kha pha rakip a ka-om ṭhak sik jo.”

⁹ Thōi roh, Rōngpu, keini a’nṭangpui roh! Nahratna hmang inna keini ahuk manhring roh; khang marōlaia naleitlo kapōa khavakha hmang nôk roh. Tuipui ranhring kalen Rahab kha ahar-ahak a alei katuktan kha nang che kae

¹⁰ Tuipui inchâr leh ashunga hlam kasyem kha nang che kae, nahuk manhring hei khan anrakan torna sik a.

¹¹ Nang in nahuksōt jo hei khan ningṭhat pum a Jerusalem katlung sik hei, inpâk a hla ansak a ka-ông sik hei. Anmani ahei tik a inpâk sik jo hei. Inrengna leh lung dongna inphut ahei tik a masōsōt kachang sik jo hei.

¹² Rōngpu’n ahri, “Nangni rathahrat kape kha kei eng kae. Heisa mo akathithei kha nantaṭit, kahar kanek a akasôt aka-om mak hei kha?

¹³ Nangni kasyem Rōngpu kha nantamahngi jo mo, marvânhei inzersōtpa kha, khana ralei innhmun kadengpa kha? Nankasuk inrim hei leh nakasukset a a’ntluk ṭhak hei hnuk natna kha ṭit ṭhak pum a heisa mo akahring sik chei? Anhnuk natna khan nangni tôn tor mak jo tin.

¹⁴ Khava kurkhum a ka-om hei kha inranga masō sik hei kae; anmani kasôttak a kahring sik hei, khana sâk leh in katluk a annei sik.

¹⁵ “Kei nan-Rōngpu Pathen eng kae; Ke’n tui-ôngpui kakachok atui in-nông kha rasa kamantlira kae. Karahming kha Chunghnung Rōngpu kae!

¹⁶ Ke’n marvânhei kamazer khana ralei innhmun kadeng; Ke’n Jerusalem hneng kahri, ‘Nangni kami chei kae! ke’n kaman theina kha kapek jo chei, khana kakut vâng kahrung cheia kae.’”

Jerusalem Khōdengthei Inchaina

¹⁷ Jerusalem, thōi roh! Nabinga ṭhang inna thōisōt roh! Rōngpu’n ahnuknat a nata in sik a apek che, karâkna kōklei kha nalei in jo; nang in ju nalei in joa amanlôn manvet jo che

¹⁸ Nakaṭhōi sik tûte om mak, namihei kâra tûte om mak, nakut a nakakei sik a.

¹⁹ Inhmangna kop hni nachunga katla jo: naram kha re’n achōn rachi jo, khana namihei vonṭâm ande jo. Nahnenga lungset inlâr sik tûte om mak jo hei.

²⁰ Hlamsō rakir rakip a namihei kha kangōi heia katlu jo hei; anmani shachâng kahe hei chânga a’n-ôk shakhi ka-ang jo hei. Anmani’n Pathen hnuknat rathahrat kha anchen jo.

²¹ Nangni Jerusalema khōdeng kathei mihei, ju inrui kapōa akalôn invek nangni.

²² Rōngpu, nan-Pathen in ahrung cheia ahri, “Ke’n kahnuknat a kapek chei kōklei kha kalosōt jo. Khava ju nanlôn invekna kha nangni’n in nôk mak jo tin.

²³ Khavakha nangni kasuk inrim hei, hlamdunga anmanje cheia, khana akabōk chei kapōa nanchunga anikachōn hei hnenga kapek sik jo hei.”