ISAIAH 46 - LEKHARABU INTHENG (BSI)

¹ “Hivahi Babylon Pathenhei inchaina jo kae! Bel leh Nebo pha khat a anleikamuk hei, tâk tûnchu khahei kha shakōrtung tarôn sik a anmantluk jo hei, akachâm neng ranhringhei ṭhōm chunga phurhrik inkhat kae jo hei.

² Limhei khan anbinga inhuksōt tor mak hei; khahei kha ansur heia anchoisōt jo hei. Hivahi Babylon pathenhei inchaina kha kae!

³ “Jacob sōn leh pârhei, kaṭong hri rangei ruh, kami inhlei akahring hei seng! Nan-intet bia inphut ke’n ka-ensui chei.

⁴ Kei nan-Pathen eng kae; katinta ṭhak sik chei. nanter mak hma seng khana nansam abangmak hma seng. Ke’n nangni kasyem chei khana ka-ensui sik chei; ka’nṭangpui sik chei, khana kahuksōt sik chei.

⁵ Rōngpu’n ati, “Tu leh mo nangni’n nanta-ente sik eng? Kei kapō tu inkhat aka-om nâk mo?”

⁶ Mihe’n ansêrkōk anmahlânga sana anbun mathlâk; anmani’n khartena vâng dangka kha akahrik ante. Anmani’n Sana kakheng mi inkhat pathen kasyem sik annek; khava sōa inkun heia ankamuk jo!

⁷ Anmani’n andâra ankadoma anchoi: anmani’n hmun inkhat a anda, khana khan kangira ka-om, angirna hmun a inphut inhling theimak. Mi inkhat in ahnenga ader inum masôn tor mak, achangmak leh inrimna inphut huk tor mak.

⁸ “Nangni mikaset-hei, hivahi mandon ruh; ke’n heimo katlo jo mandon ruh.

⁹ Tenlaia omchen kasōk kha mandonsōt ruh; kei rōk hi Pathen eng kae khana kei kapō tûte ralak om mak ti hi hnōm ruh.

¹⁰ A’nphutbia inphut ahong kasōk sik kha kalei hridek; tenlai khan ahong kasōk sik kha kahri masadek. Kaṭōn mantluk hei kha sôihêr mak ning, khana tlo sik a kamandon hei seng kha katlosōt sik tia kaleihri.

¹¹ Ke’n nisōtinga mi inkhat ahongna sik kabek; ama kha hmukhai kapōa hong kajōng inthla sik khana kamantlukna kha ama’n pui amathluk sik. Ke’n kahri jo, kha a’ntlosōt sik kae.

¹² “Kaṭong hri rangei ruh, malung kasak nangni, retorna kha kahlajap a ka-om tia a’ndon hei.

¹³ Ke’n retorna kani kha kahnaitek a kahei rôn sōt sik khavakha akahlatak a ka-om chang hêrmak. Kei retorna kha in-êng mak ning. Ke’n Jerusalem kahuk sik khana khan Israel kajana kahong rôn manhlut sik.”