ISAIAH 41 - LEKHARABU INTHENG (BSI)

Israel hnenga Pathen Manchênna

¹ Pathen in ati, “Kadai hngera om ina kahri rangei ruh, nangni ram kahla hei! Nanṭong sōk kha ṭongtan hmun a hrisōtna sik a intlukdek ruh! Nangni ṭong hrina sik pha kaṭha nanchen sik. Eini intluk et me sona tu mo akadik ṭong mathlâkna nei rih.

² “Nisō tinga inphut torna kaneipa ahei kaṭhōi kha tu mo, asena hmun rakip a hmesōna inchangpa kha? Renghei leh jât-hei chunga retorna kapek kha tu mo? Anmani vaiphinhei kapōa, ama chemjâm in akalek hlon jo hei. Ama the khan anmani kha sapôt thli tasêm manjōng kapōa akathek hei.

³ Ama’n anmani kahnung ajui heia ahnong hei khana inhuktak a injôk a kae, inrang reia ralei chōnleoloa katlân!

⁴ Hiva omchen insōk hi tu mo kae? Thuhming hlamjui hi tu tamantlukna mo kae? A’nphutbia khan Rōngpu kei leika-om eng, khana Rōngpu Kei a’nchaina khan ka-om sik eng.

⁵ “Ram kahlatak a ka-om mihe’n kaṭōntlo rakip kha anleihmu; anmani kaṭi heia innok jo hei. Khava jâra anmani ankhenga intûp heia kahong hei.

⁶ Kut kathemhei inkhat leh inkhat inbômtō hei khana malung mathokna innei jo hei.

⁷ Thingṭōn katlo khan sana kakhengpa hneng ati, ‘Kaṭhatak a nakheng jo!” Limsyem akakheng innepa khan jôtpi kahempa kha mathokna apek a kae. Anmani’n, ‘Thir mansur manhnet kha kaṭha’ antia khan anmani’n limsyem kha adana hmun a ankir mankop a kae.

⁸ “Tâk-kha, kasōk Israel nangni chu, kakadeisōt mipui kha nangni chei kae, kaṭhōn Abraham, sōn leh pâr chei kae.

⁹ Ke’n ralei inchaina inphut a kaheiṭhōisōt chei kae; Ke’n akahlapen arakira inphut kahong beksōt chei khan nanhnenga kati, ‘Nangni kasōk chei kae.’ Ke’n nangni hlonsōt mak chei eng, tâk-kha kakadei chei kae.

¹⁰ Nangni ṭimak ruh – ke’n ka-ompui chei! Kei nan-Pathen eng kae — heite inkhatbek in maṭhitmak chei rasoh! Ke’n ka’nṭangpui sik chei khana kamanhrat sik chei; Ke’n kahrung sik chei khana kahuk sik chei.

¹¹ Nanchunga hnuk kanahei kha hmaimôkna inzakna kha anratō sik. Nangni kadōia re katlohei kha kathi sik hei.

¹² khana raleichunga inphut inhmu mak hei ning.

¹³ Kei Rōngpu nan-Pathen eng kae; Ke’n rathahrat kapek cheia kahri, ‘Ṭimak ruh; ke’n ka’nṭangpui sik chei.’”

¹⁴ Rōngpu’n ati, “Akatlômtek leh ratha katlasam, Israel, nangni ṭimak ruh; ke’n ka’nṭangpui sik chei. Israelhei a’ntheng Pathen kei hi, nankahuk inhring eng kha kae.

¹⁵ Ke’n nangni savōk maṭhina cheirông, atherbia arahling kangei akakop kapōa kasyem sik chei. Nangni’n tlângbunghei nanvōk sik khana nanmanhmang sik hei; khana hmebunghei kha ahar-ahak a, vaiphina, nanmasō sik hei.

¹⁶ Nangni’n thli chunga nankathok sik hei; thli’n anmani kha atlen sik jo hei. khana thlipui thlihrem in asêm kachek sik jo hei, Khava pha nangni inpâk sik jo chei ajârchu kei nan-Pathen eng kae; Israel Pathen intheng kei hi nanchoi ka-ân sik jo eng.

¹⁷ “Kami he’n tui in sik anmadu pha, khana tuihre jâra ankadang achar pha, khava sōa Rōngpu ke’n anderna kha kamasôn sik; Israel Pathen ke’n anmani dahlon hêrmak hei ning.

¹⁸ Ke’n bung kachâr heia tuidung kaman lōng sik. khana phaicham heia tuiri kamanpût sik Nêrdiram kha tuikhura kasyem sik hei khana ram kachâr hei kha tuiri pûtna kamanchang sik hei.

¹⁹ Ke’n nêrdiram a cedar thing, khana acacia leh mistle khana olive thing hei kamanhmông sik hei. Ram kachâra thing leh rō hongkakek sik, hmeila thing leh phân thing khana Cypress thing kahmông sik hei.

²⁰ Mihe’n khahei kha anhmu sik khana anmanhret sik Rōngpu kei tatlo kae tia. Anmani’n Israelhei a’ntheng Pathen in hihei hi amasō kae tia anhong manhret sik.”

Rōngpu ’n Akadik mak pathenhei A’nrepui

²¹ Israel rengpa, Rōngpu’n hinga ahri: “Nangni jât-hei pathenhei, nanṭong heihri jo ruh. Nanṭhat theina ṭonghri jo ruh!

²² Hinahin hong ruh khana heimo akasōk sik sânsōt ruh. Omchen kha ahei sōk pha nimanhretna sik a. Ṭongtan hmun a aleikasōksa hei kha hrimanchên ruh, khana heitina heimo amanthei ruh.

²³ Hnung kakhôra heikhonga sik mo amanthei ruh– kha achang inchu nangni pathen chei kae tia kanmanhret sik chei! Ṭōn kaṭha ajing tlosōt ruh a-emak leh ṭōnse ṭhahrep heitlo ruh; kanmalunga ṭit leh kajana amannei ruh!

²⁴ Nangni leh nanṭōn tlosōt rakip kha heite emak; nangni inmuk hei kha mater ka-om hei!

²⁵ “Ke’n nisōtinga ka-om mi inkhat kakadeisōt jo; Sak tinga inphut re kabuhlu sik a kaheiṭhōi sik. Ama’n vaikarônhei kha bōn rachia arachi sik hei, be kakheng in matlak arachi kapōa arachi sik hei.

²⁶ Nangni kadik chei kantina sik, nangni tu’n mo hinga kasōk sik tia nanta sânsōt dek aka-om jo? Khang khava chunga tûte inkhat in heikhat hrimak chei; tûte inkhat in heikhat nanhrina theimak hei!

²⁷ Rōngpu kei hi Ziona ṭongphông inthei hma-inkei eng kae; ke’n Jerusalema tirle inkhat hinga avakahri sik a kalei tir, ‘Namipuihei kha kahong sik hei!’

²⁸ Ke’n pathenhei kâra ka-en pha, inkhatbek in hri sik heite neimak hei; inkhatbek in kaṭongder hei masôn tor mak hei.

²⁹ Hiva pathenhei seng hi hmangna kase rōk hei kae; anmani’n heite tlotor mak hei, hiva limsyemhei hi katlasam hei khana ratha neimak hei.”