ISAIAH 40 - LEKHARABU INTHENG (BSI)

Inhōrna Ṭonghei

¹ Ni-Pathen in ati, “Kamihei kamōnga da hei ruh. Manmōng hei ruh!

² Jerusalem mihei mathok hei ruh. Ankhōdeng theina kasôt jo, khana tûnchu ansetnahei rangei mandam jo kae tia hripek hei ruh. Ansetna jâra ke’n katluk set a karâkna kapek jo hei.”

³ Kare rasa inkhat aka-ông in, Rōngpu hlamlen inkhat ramhânga mantluk ruh! Ni-Pathen sik a nêrdiram a hlam kha mantheng ruh!

⁴ Phaicham rakip mansip ruh, Hmebung rakip mancham ruh, Hmebunghei kha phaicham inkhat manchang sik hei kae, ram kaphok hei kha ram innea syem sik hei kae.

⁵ Khava pha Rōngpu lûrna kha inphông sik, khana mihring rakip in anhmu sik. Rōngpu amatak in hiva ṭong hi a’ntep kae.

⁶ Kare rasa inkhat ka-ônga, “Ṭongphông inkhat hrimanthang ruh!” ati. Ke’n kader, “Hei ṭongphông mo kahri manthang sik?” “Mihring inti rakip hi hardông kapō kae; ram kâra reipâr hei kanek a omsôt mak hei.

⁷ Hardông invōi hei khana reipâr kachi ri hei, Rōngpu’n thli kha ahei tira anchunga amansêm jo hei pha khan. Mihei kha hardông nek a desôt mak hei.

⁸ Kadik, hardông invōi hei, khana reipâr kachi ri hei, tâk-kha ni-Pathen ṭong khan chu ahei tik a adesôt a kae.”

⁹ Jerusalem, tlâng inshânga ketou roh, khana ṭong kaṭha kha hrimanthang roh! Zion, rasa inshângtak a ông roh; ṭong kaṭha kha phôngsōt roh! Hrisōt roh, ṭitmak roh. Judah khōpuihei kha manthei hei roh, an-pathen kha kajōng jo tia.

¹⁰ Chunghnung Rōngpu kha ratha kaneitak a vaikarôn sik a kajōng jo, ama’n ahuksōt jo mipuihei kha leh inṭhōia kajōng.

¹¹ Ama’n kemōng kakhem kapōa akemōnghei kha a-en kaṭha sik hei; Ama’n kemōnghei kha akhôm manchun sik hei khana abân vâng akadom sik hei; malung innemtak a anpui hei kha hlam akei sik hei.

Tepui thei Kachangmak Israel Pathen

¹² Tui-ôngpui kha tu’n mo akut maja vâng ate tor sik a-emak leh bōirōk kha akut vânga ate sik? Mi inkhat in raleichunga pi hi kōkleia athōn tor sik mo? a-emak leh tlâng leh bung hei hi akahrik tena kher vâng amakhei tor sik mo?

¹³ Mi inkhat in Rōngpu kha heikhonga ṭōn tlosōt sik amanthei tor sik mo? Tu mo ama intheitor sik achangmak leh inse tor sik?

¹⁴ Pathen in tu hnenga mo ama inse sik a, heikhat manhretna sik leh lotheina sik a, khana heikhonga ṭōn tlosōt sik inthem chûkna sik a ṭong ader?

¹⁵ Rōngpu sik a chu jât-hei hi heite emak hei, tui rahme khat khemak hei; akahlatak a tuikekhum ramhei kha pidi kapōa vaiphinhei kae.

¹⁶ Lebanon ratua ramshahei seng kha ni-Pathen hnenga inthoina sik a tlukmak hei, khana thingkunghei seng kha’m hmeia ti sik a katlôm hêr hei.

¹⁷ Ama hnenga jât rakip hei hi heite emak hei.

¹⁸ Pathen hi tu leh mo tekâkthei sik? Ama hei leh mo a’n-ang nang in heikhonga nahri tor sik?

¹⁹ Ama khachu kut kathem he’n antasyem lim kapō kha changmak, thir kakheng he’n sana vânga antakatōm kapō dangka intungna chunga antamanngir kapō kha changmak.

²⁰ Sana leh dangka vânga akasyem tor mak he’n, akaṭop mak sik thing kha ankadeia kae. Akatlumak sik jo lim kasyem sik a, ama’n kut kathem ajongsōt a kae.

²¹ Nang in manhret mak che mo? Tenlai khan mi’n amanthei mak hei mo? Raleichung heikhonga a’nphut theiphung mak che mo?

²² Hivahi ralei achungting bōirōk chunga, alen in-ongna a’n-ongpa khan aleisyem kae; thōia ka-om mihei kha akasintek sihling kapō hei kae. Ama’n bōirōk hi pōnzâr kapōa amazer mi omna pōn-inn kapōa amanngir.

²³ Ama’n ratha kaneitak vaikarônhei kha akei mathlâk hei khana heite kaemak a ada hei.

²⁴ Anmani kha hardông kapō hei kae, raleia rajung anṭhōlim leh keisōt hei kapō kachang hei. Rōngpu’n thli ahei mansem pha, khahei kha kachâr heia sapôt kapōa asêm manjōng hei.

²⁵ A’ntheng Pathen kha tu leh mo nitekâk sik? Ama kapō alak aka-om mo?

²⁶ Bōirōk chungting khi enroh! Tu’n mo nang in nahmu ârsi heikhi asyem? Remihei kapōa anhlam kaṭhōi inkhat kha kae, anja heija hrep hei mo ti amanhret hei, khana anrahming et a abek hei! Ama ratha kha kahrat hêr– inkhatbek um inhmang hêrmak!

²⁷ Hinga achang inchu, Israel, heisa mo rōi chaper natlo Rōngpu’n nakhōdengthei kha amanhret pek mak tia, khana akadik mak a khōdengthei nathōk pha a-en kaṭhamak tia?

²⁸ Manhret mak che mo? Theiphung mak che mo? Rōngpu kha kumleikōa Pathen kae, ama’n raleichung pumpui hi asyem kae. Ama ahei tik chen a châmmak, aratha tlasam mak. Tûte inkhatbek in amandona manhret mak.

²⁹ Ama’n ratha katlasam hei leh akachâm hei kha amanhrat hei.

³⁰ Khangdông kachang hei kapha’m anratha hong katla; khangdônghei kha anratha katlang renga katlu ri hei.

³¹ Tâk-kha Rōngpu inṭangpuina sik a taksenna kaneihei khachu, anratha kahrat chet-chet sik hei. Marhmu kapōa anmathla vâng kajōng sik hei; katlân sik hei khana châmdek mak hei ning; kalôn sik hei khana tlâksam dekmak hei ning.