ISAIAH 38 - LEKHARABU INTHENG (BSI)

Reng Hezekiah Anat Khana Ahongdam

¹ Khava lai khan reng Hezekiah kha kana a akathi sik a ka-om jo. Sânkathem Isaiah, Amoz sapa kha aka-en kasea khana ama’n ama hneng ahri, “Rōngpu’n nahnenga amanthei che, heirakip kaṭha bân kaneia syem mantōk jo roh, ajârchu nanat hi dammak jo tin che. Akathi sik a intluk jo roh.”

² Hezekiah kha bangting inheia derna aneia kae:

³ “Amandonsōt roh, Rōngpu, ke’n nang taksen theitak a kahei razen jo che khana insinsak tak a ka-om eng. Khana ke’n ahei tik a namadu naṭōn tlosōtna sik intluk ṭhak enga kae.” Khana ama malung kana tak a kaṭap inphut jo.

⁴ Khava pha Rōngpu’n Isaiah kha Hezekiah hneng,

⁵ A’nle sik a ṭong apek a ahri, “Kei napu napa David Rōngpu, Pathen eng kha kae, ke’n naderna katheia khana nahmit rathli kasōk kahmu jo, ke’n nang kum 15 nahringkhō kabesa pek jo che.

⁶ Ke’n nang leh Jerusalem khōpui hi rengkalen Assyria inphut kahuk sik. Khana ke’n hiva khōpui hi kahuk ṭhak sik.”

²¹ Isaiah khan rengpa damna sik khōihlia amankop sik theichang kara a ansyem hlei ahri pek jo.

²² Khana reng Hezekiah’n ader, “Heikhonga mo ke’n mêrchîkna kahmua Bek-inna akase tor sik eng?”

⁷ Isaiah’n amasôna, “Rōngpu’n khava aṭongtep kha amathlung nger sik, khava chîkna sik apek sik che.

⁸ Reng Ahaz taleisyem kechōnna chunga Rōngpu’n rahle kha kethon 10 akahnungting amanle sik.” Khana rahle kha kethon 10 inle jo.

⁹ Khava sōa Hezekiah kha anatna inphut adam jo pha, ama’n hiva hla hi choi ka-ânna aleimazet a kae:

¹⁰ Ke’n kamandon, kahringkhō hôi laitak hin Kei thina ralei shunga leikase jo eng, Akahring hêrmak sik a ka-om jo eng.

¹¹ Ke’n kamandon, hiva raleichung hringkhōa, Rōngpu hi hmu nôk mak jo ning, Mi kahring he’m hmu nôk mak jo ning.

¹² Kahringkhō kha tuktanna le’nchai jo, Pōn-inn inkhat a’nṭhōt sōt kapōa, pōnkhông a’nchaia âttan jo kapōa Ke’n kamandon, Pathen in kahringkhō Amanchai jo kae.

¹³ Jânsôt kanat dehla jâra inkōi eng, shabakkai in karu kachâng ase rabun pek eng ka-ang. Ke’n kamandon, Pathen in kahringkhō anmanchai jo kae.

¹⁴ Karasa sōk tor mak jo, kakare ka-îng jo, Vaṭhu kapōa in-ôi eng marvân ka-ena kahmit kakham jo, Rōngpu kei ahuk roh, Hiva khōdeng theina inphut hin.

¹⁵ Ke’n heimo kahritor sik? Rōngpu’n hiva atlona chunga hin. Kamalung kana hranghra, jethei mak eng.

¹⁶ Rōngpu, kei nang sik rōk a hring rong; Amandam ina amanhring roh.

¹⁷ Kamalung inrimna kha malung mōngna inle sik, Nang in kahringkhō insuksetna thei hei senga inphut nahuksōt jo, Kasetna rakip narangei mandam jo eng.

¹⁸ Kathi khōa tûte’n nang manpâk tor mak jo hei tin; Akathi jo khan taksen theitak nachang kha taksen mak jo hei ning.

¹⁹ Akahring he’n nang antachoi ka-ân che kae, Tun ke’n kamanpâk che kapōa: Taksen theitak nachang hi nu leh pa he’n ansahei anmanthei hei.

²⁰ Rōngpu nang in, kei namandam jo eng. Serângdâr leh inṭhōia hla vâng kanmanpâk sik che. Kanhring lai seng serângdâr leh inṭhōia na-Bek-inna hla vâng kanchoi ka-ân sik che.