ISAIAH 37 - LEKHARABU INTHENG (BSI)

Rengpa’n Isaiah Mantheina sik Ader

¹ Rn Hezekiah khan anṭong hri kha athei pha, amalung inrim reia apōnsihei akei hlera bora a’nkhusia Rōngpu Bek-inna kase jo.

² Khan chu ama’n reng-innpui ṭōnkarôn Eliakim, karôt katinta Shebna leh thempu upa, Amoz sapa Isaiah sânkathem hneng atir jo heia kae. Anmani’n bora pōnse an-inkhua kase jo hei.

³ Hivahi Isaiah hnenga ama ṭong manrôn antahri sik kha kae. “Tuning hi inrengna kani inkhat kae. Inzakna leh karâkna nihmu ning kae. Eini hi nuhmei inkhat nai amatet sik tinga anaiha kaphu kapō, tâk ratha aneihêr mak jâra amatet tor mak ka-ang jo me.

⁴ Assyria rengkalen khan aṭōn karôn kalenpen kha akahring Pathen inzak kapek sik ajōngtir. Khava inzak pekna kha Rōngpu na-Pathen khan thei sona khava akahri chunga karâkna pek rasoh. Khava jâra nimihei akahring hei seng sik a Pathen hneng der roh.”

⁵ Isaiah’n reng Hezekiah ṭong manrôn kha athei jo pha,

⁶ ama’n hing’hin masônna ṭong amanrôn, “Rōngpu’n, Assyria he’n huk tor mak che ning tia anmaṭhitna che jâra ṭimak roh.

⁷ Rōngpu’n rengkalen kha aram a re buhluna ṭong amanthei sik a kha inle sik jo, khana khan Rōngpu’n ama athat sik kae.”

Assyria he’n Maṭhitna Ahlop Antatir

⁸ Khana Assyria rehlam kakeipa khan rengkalen in Lachish adahlona Libnah hnenga ka-om khōpui kadôia re atuk a ka-om jo ti ṭong athei pha, ama vakasea ava’nbekpui jo.

⁹ Assyriahei hneng ṭong hong katlung jo, ti chu Egypt remihei Ethiopia reng Tirhakah in ahongṭhōi heia anchunga re katlo sik kahong jo. Rengkalen in khava ṭong kha athei pha ama’n chithi inkhat Judah reng Hezekiah hnenga aleitir.

¹⁰ Aṭong chu, “Nang in nataksen pathen in ahri khachu nang kakut a tlûkmak tin atipekna che khan hōnmathlâk mak che rasoh.

¹¹ Assyria rengkalen in ram inkhat chunga suk manhmang sik tia amandon pha atlona hei kha nathei jo. Nang in katlânsōt tor sik eng tia namandon mo?

¹² Kapa-kapu he’num Gozan, Haran, khana Rezeph, khōpui anleisukset a, khana Betheden a ka-om mihei leh Telassar ram a ka-om hei athatsō hei, an-pathenhei khan lei huksōt tor mak hei.

¹³ Hamath, Arpad, Sepharvaim, Hena leh Ivva khōpuihei renghei kha kho jo heihmen?” ati.

¹⁴ Reng Hezekiah’n chithi kha ahei tirpa hnenga inphut aloa atei jo. Khava pha ama Bek-inna kasea, Rōngpu hmaikunga ada a,

¹⁵ ama’n Rōngpu hneng ader jo.

¹⁶ “Akahratpen Rōngpu, Israel Pathen, Cherubim hei chunga len in-ongna chunga a’n-ong, raleichunga renghei ram vai rônna chunga vaikarôn Pathen kha nang rōk che kae. Nang in raleichung leh chungvân nasyem kae.

¹⁷ Tûn Rōngpu’n arangei pek ina ei-en roh, heimo, kanchunga akasōk jo hi! Rangei roh, heirakip a Sennacherib in akahring Pathen nang chunga hnōisena ṭong ahri heirakip hi.

¹⁸ Rōngpu keini’n kanmanhret et, Assyria rengkalen in jât katamtak asuk manhmang jo, anram rakip um hmangna kase amanchang sō jo.

¹⁹ Khana an-Pathen he’m aro manvâm sō jo. Khava Pathen um aka-emak hei kha, thing leh hlung vâng mihringhei kut a ansyem hei kae.

²⁰ Tûn Rōngpu kan-Pathen, Assyrianheia inphut ahuksōt roh, raleichunga jât rakip he’n nang rōk Pathen nachang kha anmanhret sik jo.”

Isaiah’n Reng Hnenga Ṭong Amanrôn

²¹ Khava sōa reng Hezekiah derna kha amasôna ṭong inthlung sik Isaiah’n tirle reng hnenga aleitir.

²² Rōngpu’n ahri jo, “Jerusalem khōpui in Sennacherib, nang, amanuisō jo che, khana ahnōise jo che.

²³ Nang in tu mo nahnōise tia namandon? Nang in Israel Pathen intheng kei na-êse eng nakaja mak eng kae.

²⁴ Nang in kahnenga inlensaktak a akaṭong sik a nasōk-hei nahei tir hei, shakor gâri katamtak vânga, Lebanon tlâng nator hei nati. Cedar thing cypress thing kaṭha leh inshâng tatak natuk thlek hei, khana ratuhmang inthûk katlung um vakatlung jo che.

²⁵ Nang in miram heia tuikhur nakhōr heia na-in, khana naremi he’n Nile tuidung ankea anchōn manhi tia inlensaktak a nahri.

²⁶ “Nang in lathei phungmak che mo? Hihei seng hi amak hma kaleimantluk sahei kae. Khana tûn ke’n nang kaman tlosōt che kae. Nang in rekur kahnet khōpui rakip a ravutbuk namasōna sik a ratha kha kapek che kae.

²⁷ Khava hmun a aka-om hei khan ratha rahnak heite nei tor mak hei; anmani kha kaṭi heia ka-îng jo hei. Anmani kha hlei laia kahar inkhat kapōa, achangmak leh inn chunga kakek kahar inkhat kapōa nisōtinga akalum thli takâng manvōi hei kapō kae.

²⁸ “Tâk-kha ke’n nachungchâng ṭong kamanhret sōpet, heimo natlo, khon mo akase che ti kamanhret che. Nang kei kadōia nahnuknat um kamanhret.

²⁹ Nahnuknat leh inlensak ṭonghri hei kalei thei, khana ke’n nahnar kavit pek chea kōikim kathōn sik, khan chu nabeia shakor beirâk a kamansekam chea nahong inphutna hlam a nakahnung ting kakei male sik jo che,” ati.

³⁰ Khava sōa Isaiah’n reng Hezekiah hneng ahri, “Hivahi nang sik a heimo ahong kasōk sik ti mêrchîkna akachang sik kae. Tûnkum leh abâna kum a ram thōia ahong inra kara kha nansâk sik, tâk abâna kum nôk joa khan chu nang in naram shunga hmuchi thlaichi nanvora nankhôma nantasâk sik kae. Khan chu vomhrui rahōn nanthlōa akara nasâk sik.

³¹ Judah ram a aka-om kahringa alaka-om hei seng kha thingkek kapōa anrajung ralei ria antaṭhōa ankara ahong kapung sik hei kae.

³² Jerusalema leh Zion Tlânga ka-om hei kahring sik hei, ajârchu akahratpen Rōngpu’n khanga amantluk jo kae.

³³ “Hivahi Assyria rengkalen chungchânga Rōngpu’n ahri kha kae. ‘Ama hiva khōpuia hin hlut hêrmak ning, achangmak leh thesang inkhatbek um kâpsōt mak ning. Sepeihei tûte anphō leh khōpui hi honghnai mak hei ning. Khan chu re-kekhumna pibung inshâng akimvea deng mak hei ning.

³⁴ Ama ahong hlutna hlamting khan a’nle nôk sik kae, hiva khōpui hi hlut hêrmak ning; Rōngpu ke’n kahri jo kae.

³⁵ Ke’n hiva khōpui hi kahrung sik, khana kahuk sik, ajârchu karahming kajana sik a leh kasōk David hneng kaṭong jâra kahrung sik kae.’”

³⁶ Khana marvân ngeva inkhat Assyriahei ṭhumhmuna kasea remi 185,000 athat jo hei. Khang’khan ajing jîng khōvâr pha mihei kha ankhenga kajea kathisō jo hei.

³⁷ Khava pha, Assyria rengpa Sennacherib kha Nineveh ting inle jo.

³⁸ Ni khat ama’n apathen Nisrokh Bek-inna akamuk laitak asapa 2, Adrammelech leh Sharezer khan chemjâm vâng ama kha anthat a Ararat ting katlân jo hei. Asapa ahlop, Esarhaddon, khan rengkalen kha athleng jo.