ISAIAH 36 - LEKHARABU INTHENG (BSI)

Assyria He’n Jerusalem Antamaṭhit

¹ Hezekiah Judah reng achang kum sôm leh 4 atluk kum Assyria rengkalen Sennacherib khan Judah khōpui khâr kahnet hei kha re ahong tloa ankhōpuihei alo jo.

² Khava pha Assyria reng kalenpa kha arehlam kakei kalenpen kha remi hingja leh inṭhōia Lachish a inphut Jerusalema Reng Hezekiah hneng atir jo. Khana sak tinga tuikhur, tuihlam panga hlampui, pōn kakhông hei omna hmun a anmani’n anhlōa ka-om jo hei.

³ Reng-innpui katinta Hilkiah sapa Eliakim, karôt a lekha kasun inhlut Shebna, khana inloikhômna ka-ensui Asaph sapa Joah hiva Judea mi 3 hi ahnenga kase hei.

⁴ Khava pha rehlam kakeipa khan anhnenga ahria, Assyria rengkalen khan amanhret hnōm ti chu Hezekiah’n heimo a’nngamna aka-om.

⁵ Ama’n ader, “Ṭonga inbektōa hri hnâm hin rekahrat rekathem inchangsak tor sik tia mo namandon. Khavakha ahnemna kase kae. Assyria inrepuina sik, tu’n mo nang a’nthōpui sik che?

⁶ Egypt in a’nthōpui sik eng tia inngam che, tâk-kha peng khōnghre kapōhrep kae, khavakha katlek sik a kha nakut asun kathi sik. Egypt rengpa hnenga akahlut mi seng kha khanga kati sik.

⁷ Assyria hlamkakeipa khan ahrisa nôk a, “A-emak leh Rōngpu nan-Pathen nanta’n ngampui ka-om tia kahnenga nanta hri tor sik mo? Hezekiah khan Judah leh Jerusalema mihei hnenga kamukna inkhat rōk ninei sik kae atia, aleisukset hei kha Rōngpu kamukna leh maichâmhei kae.

⁸ Rengkalen rahminga ke’n nanhnenga in-erna neipui chei rong. Nangni’n Shakor katôr thei hingja nannei inchu, shakor lishing hni pek chei rong.

⁹ Assyria hlamkakeihei kâra akasinpen inkhat leh an-ang um omlo cheia Egypt he’n Shakor gâri leh shakor remi anteitir sik nanlamandon.

¹⁰ Rōngpu inthōpuina kasea nanrama re katloa kasuk manhmang kae tia, nantamandon mo? Rōngpu khet in hivahi re tlo ina suk manhmang roh ati eng kae.”

¹¹ Khava sōa Eliakim, Shebna, khan Joa he’n hlamkakeipa hneng khan anti, “Keini hneng Aramaic ṭonga hri roh, keini’n khava ṭong kha kanmanhret, Hebrew ṭonga hrimak roh; kurbang chunga ka-om mi rakip in anrangeia kae.”

¹² Ama’n amasôn heia, “Ani hongkatir rengkalen khan nangni leh rengpa rōk hnenga ṭong kahri sik a ajōngtir eng tia nantamandon mo? Changmak, bangrape chunga a’n-ong hei seng hnenga’m kahri kae, anmani leh nankhenga nan-ek nantasâk a nanmajun tui nanta-in sik kae,” ati.

¹³ Khava pha hlamkakeipa kangira Hebrew ṭonga ka-ônga ahri, “Rangei ruh, Assyria rengpa’n nanhnenga ṭong ahong hri hi hripek chei rong.

¹⁴ Ama’n Hezekiah ṭong nanta juimak sik a gîkna anei chei. Hezekiah khan nangni huksōt tor hêrmak tin.

¹⁵ Khan chu Rōngpu’n ahuk sik me tia amathlem chei hnōm mak ruh. Khana Assyria remi he’n niram hi lotor mak ning ni-Rōngpu’n ahuk sik me tia’m mandon hêrmak ruh.

¹⁶ Hezekiah ṭonghri rangei mak ruh. Assyria rengkalen tahri kae, heisōk una nangni kahnenga heihlut ruh, nanvomhrui theikung nan-in lōk sik, khana nantheichang kunghei kha’m nan-in lōk a nansâk sik, khana nantuikhurhei kha’m nantuikhur akachang sik hei kae.

¹⁷ Rengpa’n nangni aṭhōisōt mak hma chei, nanram vomhrui theitui leh konim katluk a nanneia buhlom katluk a nan-inna nansyem thei lai hin mandon ruh.

¹⁸ “Rōngpu’n, ahuk sik me tia Hezekiah’n manmo mak chei rasoh. Jât-hlop, pathenhei khan Assyria rengkalen a inphut anram anhûk tor jo hei mo?

¹⁹ Hamath leh Arpad mihei pathenhei kha khon mo aka-om jo hei? Sepharvaim hei Pathen kha’m khon mo aka-om jo? Samaria kha khahei khan antahuktor mo?

²⁰ Khava ram pathenhei khan ankhōpuihei kha rengkalen kut a inphut anta leihuk tâk mo? Kha achang inchu Rōngpu’n Jerusalem ahuk sik tia hei-inmo mandonna amannei chei?”

²¹ Rn Hezekiah taleihri pek hei kapōa mipuihei kha kadâi hnger heia, heite masôn mak hei.

²² Khava pha Eliakim, Shebna, khana Joa he’n malung inrim malârna anpōnsi hei ankeihlera Assyria ṭong karônpa ṭonghri rakip kahri sik a reng hneng kase jo hei.