ISAIAH 35 - LEKHARABU INTHENG (BSI)

Hlamlen Intheng

¹ Nêrdiram kha inpâk sik, ramhânga rei kapâr sik hei.

² Nêrdiram in hla asak sik, khan inpâk a ka-ông sik Lebanon tlâng enhnōm ka-om tak a aṭhatna kapōhrep kachang sik, khana Carmel ram leh Sharon ram a hleiheia ralei thai aṭhat kapōa kachang sik. Mi rakip in Rōngpu lûrna leh lenna anhmu sik, Alenna leh arathahrat anhmu sik jo.

³ Kut kangōi hei kha ratha ngar pe roh, Markhup innok hei kha manngar pek roh.

⁴ Malunga akatlasam hei kha manthei hei roh, khana hinga hri roh, “Ṭimak roh, namalung manngar roh! Pathen kha nakahuk sik kajōng jo, Kajōng jo, na’ndōipui hei karâkna kapek sik a.”

⁵ Hmitkacho khan khō ahmu sik jo, Khana kor kaset khan khō athei sik jo.

⁶ Ke inkhôi in inchôma kalâm sik, Akaṭong theimak mi kha; inpâk a ka-ông sik jo.

⁷ Ramhâng kachâr kha kavadung tui kalōng sik. Ram-uihei leiomna ram kachâr kha, Peng leh mahre hongkakek sik jo.

⁸ Khava hmun kha hlampui hongkachang sik “Hlamlen Intheng”, anti sik. Mikaset in khava hlamlena khan hrothei hêrmak ning; mikamohei khan khava hlam a kase hei kha hōn mathla tor mak hei ning.

⁹ Shakahrâng inti’n khava hlam kha rakan theimak ning, shabakkai khava hlam a om mak ning. Rōngpu’n ahuk manhring jo hei rōk khan An-inn jōnna khava hlam kha antahro sik kae.

¹⁰ Anmani Jerusalema inpâktak a katlung sik hei, Inpâk pum a hla ansak a ka-ông sik hei. Anmani ahei tik a kahōi sik jo hei, ahei tik chenna malung inrengna leh Khōdeng theina inphut masōsōt akachang jo hei kae.