ISAIAH 34 - LEKHARABU INTHENG (BSI)

Pathen in A’nrepuihei Karâkna Apek

¹ Jât rakip amihei, hong intûp unna hong rangei ruh! In-gôr una rangei ruh, raleichung ashunga aka-om mi rakip hin hong una ṭong hi hong rangei ruh.

² Rōngpu kha ajât rakip chunga leh anremihei seng chunga ahnuk kana jo. Ama’n maset amanchen jo hei kha suk manhmang sik kae.

³ Ankathi kalōnghei kha hreloa khanga kathua kaṭop inthla sik hei, khana anthisen kha tlâng chunga kasensō sik.

⁴ Kani leh thla, khana ârsihei kha ahar-ahak a vaiphin kapōa innoi sik jo hei. Marvân kha lekha inze kapōa inze sik joa kha inhmang sik jo, khana ârsihei kha theichangbō achangmak leh vomhrui theibō ṭi kapōa kaṭi sik jo hei.

⁵ Rōngpu kha marvâna inphut achemjâm amantluk jo, khana tûnchu maset aman chensa Edom mihei kha atuk sik jo kae.

⁶ Ama chemjâm kha inthoina kemōng leh ketak thisen leh anthai in akatōm kapōa anthisen leh anthai khan akatōm sik, Rōngpu’n hiva inthoina hi Bozrah khōpui shunga atōk sik, khana Edom ram a tha manramna hi amasō sik kae.

⁷ Mipuihei kha ramseche leh se chere kapōa kaje inchap sik hei, anthisen khan ralei amavûra kasensō sik, khana anthai khan ralei ajosō sik a kae.

⁸ Hiva pha hin Rōngpu’n Zion kha ahuk a a’ndōipui hei chunga aphu ahlo pek sik kae.

⁹ Edom ram tuidunghei kha ârkatara inchang sik, khana aralei thai kha kât inchang sik jo. Ram pumpui kha koila akânga hmei kasûk kapōa akakâng sik jo kae.

¹⁰ Khavakha asûn-ajâna kakâng sik, khana akhu kha khana inphut ahei tik a akasōk sik kae. Aram kha akhang akhanga kachi sik jo, tûte khana khan khōhme kase lôn nôk mak jo ning.

¹¹ Simbu hei leh va-âk hei omna ram kachang sik jo. Rōngpu kutsyem phut mak hma kapōa, ram kha kachia asyem nôk jo kae.

¹² Khana khan anhlam kakeihei leikase sōpet sik jo hei, khana ram vai karôn sik reng om mak jo ning.

¹³ Khōpui shunga reng-innpui heia leh kurbanga khan rahling kakek sik jo, ram-ui leh simbu hei omna hmun kachang sik jo.

¹⁴ Ramshahei kha khava hmun a khan kalôn lele sik hei, khana rathla kaṭhamak-hei kha inbetō sik hei, khana jân a pinu kahong sik a kha rekna sik hmun ahong jong sik.

¹⁵ Simbu pui he’n khan rabu achom sik a kha ratui anthlâk sik ante ankhek a anvei sik hei khana hmuthong he’n inkha-khat a hong intûp sik hei.

¹⁶ Rōngpu lekha ranhring rabu kha jong una tei ruh, khana khan heimo ahri. Ranhring inkhatbek um inhmang mak jo ning, khana asap ajâr kasea inkhatbek om mak. Rōngpu’n khanga akoptōa aka-om sik heia ṭongpek aleinei kae; amatak in akop-kop a ahong rôn sōt a aleimanchun hei kae.

¹⁷ Rōngpu ama khet in anmani anchen sik et ankâra ram hmun sempekna kha amanchen hei kae. Anmani hiva ram shunga hin akhang akhanga ka-om sik jo hei, khana aram hi ahei tik a anmani chen akachang sik jo kae.