ISAIAH 33 - LEKHARABU INTHENG (BSI)

Inṭangpuina sik a Derna Inkhat

¹ Eini kadōihei kha inhmang jo hei! Anmani kha tûte’n anchom mak heia anhōn mak hei inum, anmani’n mi anchom heia anhōn heia kae. Tâk-kha anmani’n mi antahōnna leh anchomna sik pha kha ho’nchai sik jo, anmani khet kha chom sik leh hōn sik jôk kha hongkachang sik jo hei.

² Rōngpu, keini alungset roh. Kan-inhōrna nang chunga kannei. Ani tina ahrung roh, khana khōdengthei pha ahuksōt roh.

³ Nang in keini sik re natuk pha, re tuk rasa antheia jât-hei katlân hei.

⁴ Anmani karōihei kha anvōk mathlâk pek heia ankasut hei.

⁵ Rōngpu kha heituk-hrep a akalen jo mo? Ama’n heirakip chunga vai arôn. Ama’n Jerusalem kha kadik a inrônna leh malung inrena khan amansip sik,

⁶ khana jât hnenga ngir inhnetna apek sik. Ama’n ahei tik a amipuihei ahrung hei khana singna leh manhret theina apek hei. Anmani karōi manbukna khachu Rōngpu kajana antanei kha kae.

⁷ Mi kahrânghei khan inṭangpui sik a anbek. Intōk inchamna ṭōnkarôn palaihei kha inhnaktak a kaṭap jo hei.

⁸ Hlam thlurpui hei kha ṭit ka-om tak anchang jâra, tûte inkhat in hlam kha hromak hei. Ṭongkam hei kha ansukkhōi khana inhnōmtōna ṭong juimak hei. Tûte inkhatbek kajana om nôk mak jo.

⁹ Ramhei thlō loa ka-om khana indahlon jo hei. Lebanon ratua thing kachâr jo hei, Sharon ralei thai tamna phaicham nêrdiram ka-ang jo, Bashan leh Carmel Tlânga thingkunga inphut anbō kaṭi jo hei.

Rōngpu ’n A’nrepuihei Agîk

¹⁰ Rōngpu’n jât-hei hneng ahri, “Tûnchu ṭōn katlo sik jo. Ke’n heituk-hrep a ratha kanei mo ti kha kamalâr sik jo.

¹¹ Nangni’n akahnem mak ṭōn nanmantluk khana natatlo heirakip kha hmangna kase kae. Karathla hi nangni kasuk inset sik hmei kapō kae.

¹² Sunu syemna hmeia ro mankang sik hlungpui kapōa, khana rahlingbuk a’nro invâm kapōa nangni ahar-ahak a vōk sik chei kae.

¹³ Akahnai leh akahla a ka-om hei seng in ke’n heimo katlo hi thei hei rasoh khana karathahrat hi manhret hei rasoh.”

¹⁴ Ziona ka-om mikaset-hei anṭit lôt a innok jo hei. Anmani’n anti, “Pathen ṭongtan hi ahei tik a hmei kakâng kapō kae. Eini khava hmeia inphut akahringtor nâk sik me mo?”

¹⁵ Nangni’n ṭongdik nanhria akaṭha nantlo’nchu kahringtor sik chei. Sarahei hōnna sik a nanratha hmangmak ruh, khana sêrmarûk sâk mak ruh. Mi thatna sik leh ṭōnse tlona sik a mantlukna kaneihei kâra invei mak ruh.

¹⁶ Kha achang inchu nangni inhuk sik chei; kur kahnettak shunga aka-om chei kapōa inhukna nanchen sik. Tui in sik leh busâk sik nannei sik.

Hnunga Lûrna

¹⁷ Ave nôk a ramkei rakip a abâk kanei ram inkhat reng inkhat in kalûrtak a vai arôn nanhmu sik.

¹⁸ Nangni’n ramsêr kaṭheihei leh mi ka-en inthlip hmalaia nantaṭit hei kha malunga mandonsōtna hnâm kachang sik jo.

¹⁹ Nangni’n êngkase ram hlop mi nantamanhret mak ṭong vânga ṭong kahrihei kha hmu nôk mak jo tin.

²⁰ Eini’n beklang tinga revei nileihmangna, Zion kha enruh. Jerusalema enruh! Omna sik a heituk a inhukthei akachang jo mo! Khavakha pōn-inn a’nhling hêrmak, hemmanhlut thing hei a’nphoisōt hêrmak, ahrui hei a’ntan hêrmak kha ka-ang sik.

²¹ Rōngpu’n alûrna amanhmu sik jo me. Eini tuidung kalen leh kavadung panga ka-om sik me, tâk-kha ni’nrepui he’n khana khan rakōng hongtôr mak hei ning.

^22-23 Khava anrakōng heia pōnzâr makhei kha ahnemna om mak; rakōng intôr theimak ning! Ni-inrepuihei nei rakip nisur sik jo, khangtuk hrep a katam sik, ke kangōi kapha’num chen anei tor sik. Rōngpu kha nireng kachang sik jo; ama’n nichunga vai arôn sik khana ahrung sik me.

²⁴ Niram shunga ka-om mi inkhatbek inum dammak eng tia inphin hêrmak jo ning, khana setna rakip inngei indam sik jo.