ISAIAH 19 - LEKHARABU INTHENG (BSI)

Pathen in Egypt Karâkna Apek sik

¹ Hivahi Egypt chungchânga ṭongpek kae. Rōngpu kha sumtuk achōnga inrangtak a Egypt a kajōng. Egypt hei limhei kha ahmai kunga anratha innok, khana Egypt hei kha ahmai kunga anngarsōna kha inhmang jo.

² Rōngpu’n ahri, “Ke’n Egypt ram shunga mipui-re kamasō sik, sōpui leh sōpui, ven leh ven indōina kamasō sik. A’ndōi khōpuihei kha khat leh khat, a’ndōi renghei kha khat leh khat akahrat in-erna intuk sik hei.

³ Ke’n Egypt mihei ṭōnmantluk hei hme masōpek mak hei ning, khana an-omchen kamaset pek sik hei. Anmani’n anlim hneng inthōpuina ander sik, khana rathla inbekpui hei hneng leh akathi rathlahei hneng ṭong kader sik a kase sik hei.

⁴ Ke’n Egypt mihei kha ankasu inrim sik, anchunga vai karôn sik êng kasetak reng inkhat kut chunga kapek sōt sik hei. Akahrat Rōngpu ke’n kahri kae.”

⁵ Nile tuidunga tui hong katlôm sik, tuidung abân bâna hong kachâr sik.

⁶ Tuidung tuikōk hei kha jajâma anhongchâr jo jâra hong kathu sik hei. peng leh mahre he’m hong invōi sik hei.

⁷ Nile tuidung panga hmuchi rakip hong kachâr sik heia kha thli’n atlensō sik hei.

⁸ Nile tuidunga nga vânga hringna sik inveina kanei rakip ka-ông ngurngur a kaṭap sik hei; ankhôi leh anlenhei hmangna kase kachang sik hei.

⁹ Hruipōn innem kakhông he’m anmalung kana sik jo;

¹⁰ Pōn kakhông leh ṭōntlo kathemhei anmalung kakōi sik khana kachâm sik jo hei.

¹¹ Zoan khōpuia hlamkakeihei kamo jo hei? Egypt a mikasingpen he’n akanimak ting anmanmo jo hei! Heikhonga mo reng hnenga, anmani hmalaia akathemhei leh renghei sōn leh pâr ung kae tia antahri ngam sik?

¹² Egypt Rengpa, kho jo heihmen nang inse nami kasinghei kha? Egypt sik a Akahrat Rōngpu’n amantluk ṭōn kha anmanthei tor khâk sik che.

¹³ Zoan leh Memphis hlamkakeihei kamo jo hei. Anmani’n jât-hei hlam antakei sik kae, tâk anmani’n mi hlamleting anṭhōi hei.

¹⁴ Rōngpu’n anmani kha inhmakna sik mansena kha aman pek hei. Khava jâra, Egypt in ṭōn kadikmak rōk atloa ju inrui inkhat in amalōkna chunga akatlu kapōa kachang jo.

¹⁵ Egypt shunga sara leh mikahao, mikalûr leh mi manhret mak, tûte inkhatbek in inthōpuina petor mak hei ning.

Egypt in Rōngpu Akamuk sik

¹⁶ Egypt mihei kha nuhmei kapōa anṭitsetna pha lakahong sik. Chunghnung Rōngpu’n anmani karâkna sik abân arazit anhmu pha, kaṭi heia anratha innok sik.

¹⁷ Egypt mihei kha, Chunghnung Rōngpu’n Judah hei sik a ṭōn amantluk pek hei kha anmandonsōt akaia ṭit a inpir sik hei.

¹⁸ Khavakha ahongtluk pha, Egypt khōpui 5 shunga Hebrew ṭong anhong jôm sik. Khava khōpuia ka-om mihe’n Chunghnung Rōngpu rahminga intep sik hei, khahei kâra khōpui inkhat rahming kha, “Kani khōpui,” inti sik.

¹⁹ Khavakha ahongtluk pha, Egypt ram shunga Rōngpu maichâm inkhat hong ka-om sik, khana Egypt ramri inchaina ahnenga a’ntōksōt hlung chopui inkhat intung sik.

²⁰ Khahei kha Egypt ram a Chunghnung Rōngpu kha ka-om ti chîkna kachang sik. Khana ka-om mihei inreng khōdengthei anratō pha, inthōpui madua Rōngpu hneng anbek inchu, anmani kahuk sik a mi inkhat atir pek sik hei.

²¹ Rōngpu’n Egypt mihei hneng ama abibinga inphông sik, khana anmani’n anmanhret a ankamuk sik, khana inthoina leh tōk sik anheichoi sik. Anmani’n ka-ôrtak a intepna anhnenga anneia, an-intepna kha antlosōt sik a kae.

²² Rōngpu’n Egypt hei karâkna apek sik hei, tâk amandam nôk sik hei. Anmani ahnenga inhe sik hei, khana anderna athei pek sik hei khana amandam sik hei.

²³ Apha ahongtluk pha, Egypt leh Assyria kâra hlampui inkhat ka-om sik. Khava ram inhnia mihei kha se leh hong antlo sik, khana jât 2 hei khan ankamuksap sik jo.

²⁴ Apha kha ahongtluk pha, Israel hi Egypt leh Assyriahei tepui kachang sik jo hei, khana hiva jât 3 hei hi vânhnōi pumpuia vâng chenna kachang sik hei.

²⁵ Chunghnung Rōngpu’n vâng apek sik heia kha ahri sik, “Ke’n vâng kapek sik chei, Egypt, kamihei; nang Assyria, kami syem hei; khana nang Israel, kakadeisōt kamihei.”