ISAIAH 15 - LEKHARABU INTHENG (BSI)

Pathen in Moab Asukset sik

¹ Hivahi Moab chungchânga ṭongpek kha kae. Ar leh Kir khōpui jân khat rōk a suk manhmang jo hei kae, khana Moab ram kha kadai rep a ka-oma kae.

² Dibon mihei kamukna hmun a akaṭap sik a tlânga kake hei. Moab mihei Nebo leh Medeba khōpui sik a malung inrenga kaṭap hei; malung inreng malârna ansam, anhnerhme anvo.

³ Hlamdunga mihe’n borapōn an-insi: khōpui tetlânga khan innchunga mihe’n ṭajai ansuia kaṭap a ka-ông hei.

⁴ Heshbon leh Eleale a mihei ka-ônga kaṭong hei, khana anṭap rasa kha Jahaz katlunga inthei. Remihei kapha anratha innok; anngarsōna kha inhmang jo.

⁵ Moab sik a kamalungria kaṭap eng! Mihei kha Zoar khōpuiting leh Eglath Shelishiya khōpuiting katlân jo hei. Ṭhahrep Luhith hlampui ting, anṭap pum a kake hei; ṭhahrep khat in Horonaim ting, malung natpuma ka-ông heia katlânsōt hei.

⁶ Nimrim kavadung kachâra ka-om, apanga kaharhei invōi hei, kahar kadông inkhatbek om mak.

⁷ Mihei kha annei rakip leh tlânsōtna sik a antloa Huisum Phaicham kha anpetan.

⁸ Moab ramria hmun rakip a ṭap rasa inthei. Eglaim leh Beerelim khōpui heia ṭa rasa kha intheia kae.

⁹ Dibon khōpuia tuidung kha thisen kalōng, khana Pathen in khava mihei sik a khan akakhe chet akaṭhamak alada pek hei. Kadik, Moab ram a dahlon rakip that manrampet sik hei kae.