ISAIAH 14 - LEKHARABU INTHENG (BSI)

Hnongsōt a Inphut Hong inle

¹ Rōngpu’n ami Israelhei avea vōi khat alungset nôk sik hei khana ata kachang sik a akadei sik hei. Ama’n anrama ka-om sik a aheiṭhōi male nôk sik hei, ram hlop mihei leh anmani ka-omsap sik a kahong sik hei.

² Jât-hlop katamtak in anmani Rōngpu tapek anrama anhe’nle nôkna sik an-inthōpui sik hei, khana khan jât-hlop he’n Israelhei sōk kachang sik heia anrazen sik hei. Pha khat a Israel aleikasur hei kha tûn Israel he’n ansur sik hei, khana Israelhei chunga mikasuk inrim hei kha Israel he’n anchunga vai anrôn sik jo.

Kathirama Babylon Reng

³ Rōngpu’n Israelhei kha inreng khōdeng theia inphut a leh rumhrat tak a ṭōn inhnak mantlona heia inphut khan amanhnga sik hei.

⁴ Ama’n hiseng atlo pha, anmani’n Babylon reng hneng manuisōna anhri sik: “Reng êng-kasepa kha katlu jo! Ama’n tûte avea khōdeng manthei mak jo ning!

⁵ Rōngpu’n akaṭhamak vaikarônhei ratha neina kha amanchai jo,

⁶ anmani mihei chunga bânglo jena hnuk nattak a anleisuk manrim hei leh khōdeng anleimanthei heia kae.

⁷ Tûnchu a’nchaina vânhnōi pumpui châmhngatna leh lung mōngna anchen jo, mi rakip in inpâk hla ansak jo.

⁸ Lebanona cedar leh Cypress thingkung he’n rengpa tluk jâra inpâk hei, ajârchu ankaphûr sik mi tûte om mak jo, tûn ama om mak jo!.

⁹ “Babylon rengpa intō sik a, thina ram kha intluk jo. Raleichunga ratha kaneipen hei rathla kha inchok jo hei. Renghei rathla kha anreng in-ongna inphut kathōi jo hei.

¹⁰ Anmani ankhenga ahnenga an-ôna anti, ‘Tûnchu nang hi keini kapōa, ratha neimak jo che! Nang um keini napō jo ung mo!

¹¹ Nang kajana sik a serângdâr mahring anleihmang, tâk tûnchu hinahin thina ram a ka-om jo che. Nang in rahlung rakhum chunga ahrik kakop jânsi nan-insi jo.’”

¹² Babylon rengpa; jîngkâr vârpa, nang marvâna inphut katla jo che! Hmalai khan jât-hei naleitor hei, tâk tûnchu raleia hlon mathlâk jo che kae.

¹³ Nang in marvân chunga ke sik a leh chunga ârsi inshângpena nalen in-ongna dôn sik namantluk. Sak tinga pathenhei intûpna hmun tlâng chunga reng kapōa in-ong sik nalei mandon.

¹⁴ Nang in sumtuk chunga ketoua Akahratpen kapōa om sik nati.

¹⁵ Tâk-kha khava kanek a, kathihei ram, a’nthukpen shunga khan nam mathlâk kachang jo che.

¹⁶ Kathi khan inlaktak a anhmit anmahlanga anlei en sik che. Anmani’n ander sik, “Ama hi ralei innokpa leh rengramhei inṭhitpa kha mo?

¹⁷ Ama hi khōpui kalenhei kasukset leh vânhnōi rakip nêrdiram inchangpa kha mo? Ama hi mo rehringa asur hei ahei tik a masōloa, an-ina manle loa akada mi kha?”

¹⁸ Raleia reng rakip, reng thlân kalûr heia kaje hei.

¹⁹ tâk-kha nang chu thlân neimak che, khana nakalōng kha akaṭop sik a hlonsōt che kae. Nakalōng kha remi kathihei kalōng in akatōm, khahei kha leh inṭhōia hlung karekōk a anhlon mathlâk che, anchōn rachi che.

²⁰ Ajârchu nang in naram nasukset a nami kalenhei nathat hei, nang reng ralak kapōa inhremak tin che. Na-innkō akaṭhamak-hei kha inkhatbek hringmak hei ning.

²¹ Mi thatna kha inphut jo rasoh! Hiva rengpa sahei hi anpu anpahei set jâra kathi sik jo hei. Anmani inkhatbek inum raleichung vai rônmak jo hei ning khana khōpui um hlōmak jo hei ning.

Pathen in Babylon Asuk manhmang sik

²² Chunghnung Rōngpu’n ati, “Ke’n Babylon kabuhlu sik, kasuk manhmang sik. Ke’n heite ṭhenmak ning, naipang inkhatbek um, akahring om mak ning. Rōngpu ke’n, kahri kae.

²³ Ke’n Babylon hi tui kachōr ram kamanchang sik, khana simbu hei ka-om sik hei. Hmunther vâng heirakip niphet mantheng kapōa Babylon hi kaphet manthengpet sik jo tia akahrat Rōngpu ke’n kahri kae.”

Pathen in Assyriahei Asukset sik

²⁴ Akahrat Rōngpu’n intepna anei: “Ke’n kamantluk kha heikasōk sik. Ke’n tlo sik a kamandon kha intlosōt sik.

²⁵ Ke’n Assyriahei kha karam Israel shunga kasuk manhmang sik hei, khana katlang chung heia anmani kachōn kahnur sik hei. Kamihei, Assyriahei rîngkea inphut leh antathōk sik anrôn kahrik a inphut kamasō sik hei.

²⁶ Hivahi vânhnōi sik a kaṭōn mantlukna kha kae, khana jât-hei karâkna sik a kabân karajit jo.”

²⁷ Akahrat Rōngpu’n hivahi tlo sik a amandon jo; ama’n karâkna pekna sik a abân arazit jo, tûte’n tingtor mak ning.

Pathen in Philistihei Asukset sik

²⁸ Hivahi reng Ahaz thi kum a antahri manthang ṭongphông kha kae.

²⁹ Philistihei, nang vōkna sung kha katlek jo, kha’num nan-inpâkna sik ajâr heite om mak. Mari inkhat athi pha, akahlang kathlenga akasechet inkhat kahong. Mari inkhat in ratui athlâk a khan akajōng thei rihren amankeksōt.

³⁰ Rōngpu kha ami sarahei kemōng kakhem kachang sik khana inhuktak a aman om sik hei. Tâk nangni Philistihei chunga chu vonṭâm inhnaktak amathlâk sik, khan chu tûte khatbek kahringa ṭhenmak tin.

³¹ Inthōpuina sik a ông una ṭap ruh, Philisti khōpui rakip in! Inpir ruh, nankhenga! Sak tinga inphut ravut khu inthim kahong, khavakha ṭitna kaneimak remihei kae.

³² Philisti inphut ṭongkarôn nihnenga akahong hei kha heikhong mo nimasôn sik hei? Rōngpu’n Zion hi aphunsōt jo, khana ami inreng he’n khana khan inhukna anchen sik tia nimanthei sik hei kae.