ISAIAH 11 - LEKHARABU INTHENG (BSI)

Lung mōngna Rengram

¹ David rengsōn hi thingkung a’nphûr kapō kae; tâk akungbea inphut abâk ther hei a’ncher kapōa, David phung hruia inphut rengther inkhat ahong injōr sik kae.

² Rōngpu rathla’n ama kha singna, khana manhretna leh amihei chunga vai rôn theina apek sik. Rōngpu lungdo kha amanhret sik khana kajana apek sik,

³ khana aṭong juina chunga amalung atlaipui sik. Ama’n ṭong inhri athei hrep vâng leh manhōina hrep vânga ṭong tanmak ning;

⁴ Ama’n sara khōdeng katheihei ṭong kaṭha atan sik, khana inthōpui kase hei dikna kha ahrung pek sik hei. Ama ṭongpek kha mihei karâkna apek sik hei, khana mikaṭhamak kathi sik hei.

⁵ Ama’n amihei kha malung kahnettak a leh ṭongdikna vânga vai arôn sik.

⁶ Kahne leh kemōng intōk tak a kalengsap sik hei, khana rutnu leh kete hei kajesap sik hei. Sete leh shabakkaite thlai ansâksap sik, khana naipang kasin he’n ankhem sik hei.

⁷ Sehrat leh kavom in thlai ansâksap sik, khana sete leh kavomte intōk a kajesap sik hei. Shabakkai he’n sehei kapōa sapôt ansâk sik.

⁸ Naidông inkhat mari tûr kanei hneng a’ndei inum heite manlomak ning.

⁹ Pathen tlâng intheng, Zion chunga, akaṭhamak khana insuksetna heite om mak ning. Tui-ôngpui tui asipphet kapōa ram kha Rōngpu manhretna kasip phet sik jo.

Ramlak a keisōt hei He’nle

¹⁰ David reng hruia inphut rengther inkhat jât-hei sik a mêrchîkna ahong changna sik kani kha kahong. Anmani reng khōpuia intûp sik hei khana ama kajana antapek sik kae.

¹¹ Khava kani ajōng tlung pha, Rōngpu’n aratha hratna ahmang nôk sik, Assyria ram leh Egypt ram a dahlona ka-om amihei seng, khana Pathros, Ethiopia, Elam, Babylon khana Hamath khan chu tuipui panga ram leh tuipui kekhum ramheia amihei seng an-ina aheiṭhōi male nôk sik hei.

¹² Ralei rakir manlia ami Israelhei leh Judah mi a’nchek a ka-om hei kha avea aheiṭhōi mantûp sik hei kha Rōngpu’n jât-hei hmun a sik chîkna pōnlek inkhat atârsōt sik.

¹³ Israel rengram in Judah chunga thangsetna neimak jo ning, khana Judah kha Israel indōipui chang nôk mak jo ning.

¹⁴ Anmani inchun sik heia kha tlaitlâk tinga Philistihei anbuhlu sik khana nisōtinga ka-om hei kha anhnong kachek sik hei. Anmani’n Edom leh Moab mihei antor sik hei, khana Ammon mihe’n anṭong anjui sik.

¹⁵ Rōngpu’n Suez Tuikekâk amanchâr sik, khana Euphrates manchârna sik a thli kalum amasō sik, khana tu inkhat in se leh hong antlo theina sik a, tuidung kasintek 7 rōk aṭhensōt sik.

¹⁶ Anpu anpa he’n Egypt anleidahlon pha hlampui aleika-om kapōa, Assyria inphut hlampui inkhat, khava hmun a ami Israel alakahring hei sik a ka-om sik.