HOSEA 8 - LEKHARABU INTHENG (BSI)

Lim Kamuk jâra Rōngpu ’n Israel Rano Apek

¹ Rōngpu’n ati, “Pengkun manhring ruh! Inrepuihei kha hmurai kapōa karam shunga jōng kaṭumsuk hei! Kami he’n anmani leh kan-intepna kha ansukkhōia kei mantheina kadōia inphin jo hei.

² Anmani’n kei hi an-Pathen anti enga khana kamia an-oma, kanmanhret che anti eng innum,

³ akaṭha khachu anhlonsōt a kae. Khava jâra anka-en kada he’n ankahnunga anhnong sik hei.

⁴ “Kami he’n renghei ankadei, khavakha anrachama antatlo kae. Anhlam kakei ankadei hei, tâk kei hnōm pekna invei mak. Ansana leh dangka anloa limhei ansyem, anmani insuk inhmangna hrep sik kae.

⁵ Samaria khōpui mihe’n sana sehrat limsyem antakamuk kha enhnōm mak eng. Anchunga kahnuk kana hêr. Heituk pha sō leh mo limsyem kamukna kha antadahlon sik?

⁶ Israel kut kathem in lim kha ansyem, khavakha pathen chang hêrmak! Samaria sana sehratche limsyem antakamuk kha ahar-ahak a sukkhōi sik kae!

⁷ Anmani’n thli anvor pha, thlipui thlisip antakhôm sik kae! Hleipuk a hmuchi kahminmak khan buhlom apektor mak a kae. Apektor sik innum, khōhme he’n ansâksōa kae.

⁸ Israel hi jât-hlop kapōa kachang jo akahnem mak be kakōi kapō kae.

⁹ Ram shakōrtung rahe kase kapōa, anracham kase jo hei. Assyriahei inthōpuina anjonga khana jât-hlop he’n anhrungna sik hei antia sêr anpek heia kae.

¹⁰ Tâk-kha tûn ke’n kakhôm manchun sik hei khana karâkna kapek sik hei. Assyria rengpa’n akarâk hei pha leh, nat a inkōi sik jo hei.

¹¹ “Ansetna inthengna sik Israel he’n maichâm katamchet ansak chenna, set tlona sik hmun annei chet-chet a kae!

¹² Mi mantheina sik a tei torlo leoa kamazet jo, tâk, khahei kha mihlop mivânghei ta kapōa anhlonsōt hei.

¹³ Anmani’n kahnenga inthoina antōk khana khava hme kha ansâk. Tâk-kha Rōngpu kei chu anchunga tlaimak eng, tûnchu ansetna kha kamandonsōt sik khana karâkna kapek sik jo hei; Egypt a katir male sik jo hei!

¹⁴ “Israel he’n reng-innpui ansak hei, tâk ankasyem khet khachu anmahngi joa kae. Judah he’n khōpui rekur ansak hei. Tâk-kha anreng-innpui leh ankhōpuihei ro mankângna sik a hmei kajōngtir sik.”