HOSEA 1 - LEKHARABU INTHENG (BSI)

¹ Uzziah, Jotham, Ahaz khana Hezekiah he’n Judah reng anchang lai, khan chu Israel a Jehoas sapa Jeroboam in reng achanglai, Beeri sapa Hosea hneng Rōngpu’n ajōng pek ṭong kha hi kae.

Hosea Nuhmei leh Asahei

² Rōngpu’n Hosea ahmanga Israelhei hneng hmapena ṭong ahrilai khan, ama’n Hosea hneng ahri, “Se ina nuhmei vanei roh; nanuhmei kha hlamrinthei changmak ning, khana asahei kha’m annu anpō sik. Kha leh in-anghrep a, kami he’n kei andahlon jo eng khana hlamrinthei changmak heia kae.”

³ Hosea’n Diblaim sanu, arahming Gomer inti nuhmei inkhat kha a-ompui jo. Anmani’n sapase hma-inkei inkhat anneisōa,

⁴ Rōngpu’n Hosea hneng ahri, “‘Jezreel’ tia arahming phō roh, ajârchu anpu ṭhut Jehu’n Jezreel hmun a mi aleitha jâra Israel reng karâkna kapek sik pha hi sôtmak jo ning. Ke’n Jehu phung hrui kamanbâng sik jo.

⁵ Khana Jezreel Phaichama Israel remi ratha neina kha khava pha khan kamanhmang sik jo.”

⁶ Gomer in 2 tlukna nai anei, hichu nuhmeinai kae. Rōngpu’n Hosea hneng ahri, “‘Lungset mak nu’ tia phō roh, ajârchu Israel mihei chunga lungsetna ke’n malârsōt mak ning khana rangei mandam mak jo hei ning.

⁷ Tâk-kha Judah mihei chunga chu lungsetna kamalâr sik. Rōngpu an-Pathen Ke’n, kahuk sik hei, tâk re, chemjâm, the leh sai vâng khana shakor leh shakor kachōnghei vânga chu changmak ning.”

⁸ Gomer in asanu avei manlen sōa, nai avon nôk a sapa hlop inkhat anei nôk.

⁹ Rōngpu’n Hosea hneng ahri, “Arahming ‘Kami kachangmak,’ tia phō roh, ajârchu Israel mihei hi kami changmak hei khana, Kei, an-Pathen changmak eng.”

Israel Syem mantherna

¹⁰ Israel mihei kha tui-ôngpui nêrdi kapō hongkachang sik hei, tei torlo leh tetor mak hongkachang sik hei. Tûnhin Pathen in anhnenga, “Nangni kami changmak chei,” ati, tâk-kha anhnenga, “Nangni akahring Pathen sa chei kae,” atina pha kha lakahong sik!

¹¹ Judah mi leh Israel mi lahong inchun sik hei. Anmani’n anhlam kakei sik inkhat anla kadei sik, khana vōi khat anmani’n anram shunga lahong kakhang sik hei khana lakahao sik heia kae. Kadik, Jezreel kani kha kani kalentak lahong kachang sik!