HLAHEI HLA 6 - LEKHARABU INTHENG (BSI)

Nuhmeihei

¹ Nuhmeihei kâra hme kaṭhapennu nalungdipa kha khon mo akase jo? Keini’n kajongsōt puina sik che, nalungdipa kha khonting mo akase jo amanthei ung roh.

Nuhmeinu

² Kalungdipa chu arahōna kase jo, marim katui thingkunghei hmôngna rahōna khan. Akemōnghei arahōnna khan avei hei khana lily reipâr avei mantûp hei.

³ Kalungdipa kha kata kae, khana kei hi ama ta eng kae; lily hei kâra akemōnghei akhem hei.

Hla Rangana Pasepa

⁴ Kalungsetnu, Jerusalem kapōhrep a nahme kaṭha Tirza khōpui kapōa lungset kakai che, hiva khōpui kalenhei nihmu hei kapōa kaphuk insamna kachang che.

⁵ Keia inphut nahmit-hei kha mahe roh; anmani’n kei rehring sura ansur jo eng. Nasam hei khan kehei kapōa kalâm jo hei Gilead hmebung ajōng kaṭumsuk hei kha ka-ang hei.

⁶ Nahahei kha ala’nsôpsō lim kemōng rup kapōa kachek hei. Akatlek inkhatbek om mak ankhenga inrejet a ka-om hei.

⁷ Nakabeng kha nahmai makhuna pōn thōia inphut hong ka-êng.

⁸ Rengpa’n rengnu 60, nuhmei manbo 80 um neisa hei rasoh, nuhngâk tei torlo nei rasoh!

⁹ Tâk-kha kei chu inkhat rōk kha kalungset, khavakha vaṭhu kapōa lungset kakai. ama kha anu sanu inkhat rōk kae, anu’n alungsetpen sa kha kae. Nuhmei rakip in ama an-enna anmanpâk; rengnu hei leh nuhmei manbo he’num ama manpâkna hla ansak.

¹⁰ Ahmit en in jîngkâr vâr ra-âng kapōnu hi tu mo kae? Kani leh thla vâr in anta hongsat kapōa ama kha ahme kaṭha khana kavâr.

¹¹ Almond theikung hei kâra jōng kaṭum jo eng phaichama thingkung ther ahong kakek hei avaka-en sik a, vomhrui abōther ka-en sik a, khana kapothei kapâr hei aka-en sik a kahong eng.

¹² Kei hi innok eng; shakor gâri katôr he’n re antarangei kapōa nang in kei hi lungset rangeina kha namannei jo eng.

Nuhmeihei

¹³ Shulam nuhngâknu lâm roh, lâm roh, Nakalâm kha keini’n en che rung. Lâm ka-en mihei kâra ke’n kalâm pha nangni’n heijâra mo nanta-en hnōm