HLAHEI HLA 4 - LEKHARABU INTHENG (BSI)

Pasepa

¹ Kalungdinu, heituk a akaṭha che mo! Nahmai makhuna pōn thōia nahmit-hei kha heituk a akade hei mo. Gilead hmebung ajōng kaṭumsuk ke rup-hei kapōzek a nasam kha invor nenga kalâm.

² Tûn tuna ansam antavopek leh antarasi kemōnghei kapōa nahahei kha kachek-hlak hei. Akatla inkhatbek om mak; ankhengpet a inre intōk hrep hei.

³ Nahner kha akasenvōi retpōn bong ka-ang; nang in ṭong nahei hri pha heituk a lungset ka-om hei mo. Nakabeng kha nahmai makhuna thōia inphut hong kasenser.

⁴ Narîng kha David chopui ka-ang, innejet a inpumleng, khava kimvea pho katamtak kapō maṭhi kha na-or.

⁵ Nane hei kha shangai ka-ang hei, shakhi bop hni he’n lily kâra sâk anta’njong ka-ang hei.

⁶ Bero hmebung chunga kei ka-om sik eng, khava marim katui hmebunga khan, jîngkâra thli kadai ajōnghrâng mak kârseng, khana a’nthim kha a’nhmangmak kârseng.

⁷ Kalungdinu, heituk a akaṭha che mo; heituk a pui akatluk jo che mo!

⁸ Kalômnu, Lebanon Tlâng heia inphut jōng roh kei leh inṭhōi rih. Lebanona inphut kahnenga jōng roh. Amana Tlâng lera inphut jōng ṭum roh, shabakkai leh rûtnu hei omna Senir leh Hermon Tlâng heia inphut.

⁹ Kalungdinu leh kalômnu, nahmit-hei ka-en leh khana narînga namakhei maṭhi hrui hei kahmu leh kamalung karōk kanga kaphai jo.

¹⁰ Nalungsetna eng khan amanhōi eng, kalungdinu leh kalômnu. Nalungsetna kha ju kanek a kaṭhachet, nang marim kha maru-marâng rakip kanek a kahōi jôk.

¹¹ Kalungdinu, khōihning kathlum kha nahnera kakop; namalei kha kei sik a chu sene leh khōihning kae. Nang pōn leh der kha Lebanona marim kahōi rakip inhnam.

¹² Kalungdinu, kalômnu chu, a’nthuptlit rahōn kha kae, bang inkhâr rahōn kae, binga ka-om tuiripût kae;

¹³ khana khan thingkunghei kahmông kakhang hei. Kapothei kunghei kapōa kahmông hei, khana kara kaṭhapen inra hei. Khava hmun a marim kahōi henna leh nard invât mak,

¹⁴ ṭhingṭhe, thinghnai, aithîng, khana marim katui rakip invât mak. Khana khan marim kahōipen rakip bero leh marim kanei thingbō kakek hei.

¹⁵ Tuiripût he’n rahōn kha tui anpek, khava tui kalōng kava dunghei khan Labanon Tlângbung tuihnar hei khan.

Nuhmeinu

¹⁶ Thōi roh, Sak tinga Thli. Thlâng tinga Thli, karahōna jōng sêm roh; marim kahōi vâng thli kha mansip roh. Kalungdipa kha arahōn shunga hong rasoh akaṭhapen theikarahei kha jōngsâk rasoh