HLAHEI HLA 3 - LEKHARABU INTHENG (BSI)

¹ Ajân akaia kajekhuma kaje enga, kalungsetpa inkhat kha karahmanga kahmu ṭhak; ama kha ka-en ṭhak, tâk-kha hmuphâk mak eng.

² Khōpuia khan hlam invaia kalônle eng, hlamtete hei leh hlam bâk heia. Kalungdipa inkhat kha kajong, kajong tâk-kha hmutor mak eng.

³ Khōpui kahrung he’n kei anhmu enga kae. Ke’n anhnenga kader hei, “Kalungdipa nanhmu mo?”

⁴ Anmani kadahlon limhei leh kalungdipa kha kahmu jo. Ke’n ama kha kakakōtlit a masō mak eng kanu inna kaṭhōi mak hma seng, kei intetna innden shunga khan.

⁵ Jerusalem nuhmeihei, kahnenga intep ruh; tlân kahrat shakhi leh shangai rahminga, khachu keini inlungsetna hi akhâr mak ning tia.

Hla Inthumna Nuhmeinu

⁶ Nêrdiram a hmeikhu hlom kapōa akahong hi heimo kae, invei katlo he’n antajōr marim katui, bero leh marim katui hi?

⁷ Solomon kha areng in-ongna chunga anhei kadoma kahong; akahrung hei kha remi 60 katluk hei, Israel shunga remi kahrângpen hei kae.

⁸ Anmani ankhenga chem kathem rōk hei kae; anmani rekahrat a akatuk ṭhak mihei kae. Anmani inkhat et chemjâm inkhat ṭim anmatua, jân a re kahong akahrung hei kha kae.

⁹ Reng Solomon kha areng in-ongna chunga ankadom khavakha akaṭhapen thing vâng ansak a kae.

¹⁰ Khava akehei kha dangka vânga ankatōm, khava chunga sana vânga ret antasyem pōn vânga ankatōm, khava in-ongna kha vapuirei pōn vânga anmakhu, Jerusalem nuhmei he’n kaṭha nenga antakhông pōn kae.

¹¹ Zion nuhmeihei, Reng Solomon hi hong una hong-en ruh. Aluhông ninga ama inpâkna leh hōina kani ninga, anu’n alu chunga amankhu lukhu kha inkhua kae.