HLAHEI HLA 2 - LEKHARABU INTHENG (BSI)

¹ Kei chu Sharon ramthōi reipâr hrep eng kae, Ching phaicham lily reipâr eng kae.

Pasepa

² Rahling kâra lily pâr kapōa, nuhmeihei kâra kalungdinu kha kachanga kae.

Nuhmeinu

³ Ratu thingkâra theikhup thingkung kapōa, pase ralak-hei leh nitekâk inchu kalungdipa kha kachanga kae. Ama daihlim thōia in-ong sik kha kamadu, khana ama kara kha kamantama kathlum hêr.

⁴ Ama’n arevei inndenpuia khan aṭhōi manhlut eng khana alungsetna pōnlek kachunga amakhu eng.

⁵ Thei kachâr amansâk ina ratha amannei roh, theikhup amansâk ina kataksa hi amanngarpek roh. lungset rangei jâra intle dâk jo eng.

⁶ Aveitinga akutbân in lukhama amannei eng, akut changting in akachilele enga kae.

⁷ Eh Jerusalema nuhmeihei; tlân kahrat shakhipui leh shangai-che rahminga intep ruh, keini inlungsetna hi sukkhōi mak ning ti ruh.

Hla Inhnina Nuhmeinu

⁸ Kalungdipa kare rasa kha ke’n kathei. Tlângbung ajōng rakan a kahong, kahnenga sik a hmebung arakana jōng katlân.

⁹ Kalungdipa chu shangai-che kapō kae khana kazuk chete kapō kae. Bang panga khan in-ngaia kangir. Thlikot a inphut khō aheithlir thir mankhâr kâra inphut ahei-en lele.

¹⁰ Kalungdipa’n kahnenga ṭong ahei hri. Khan chu kalungdinu, kahnenga hong jo roh; kalungsetnu, kei leh omsap rih hong jo roh.

Pasepa

¹¹ Phebi pha kathleng jo, khō’m sûrmak jo;

¹² ramthōi reipâr he’m kapâr inphut jo hei. Hiva pha hi hlasakna pha jo kae; Hleilai heia vaṭhu hei hlasak inthei inphut jo hei.

¹³ Theipōng he’n hmin anheiphut jo hei; vomhrui theipâr in thli marim kha amanhōi jo. Khan chu hong roh, kalungdinu; kalungsetnu, kei leh omsap rih hong jo roh.

¹⁴ Nang chu hlungpui hlungkare kâra a’nthup vaṭhu kha ka-ang che. Lungset ka-om nahmaisō kha amanhmu roh khana amanthei roh nakare malung hêrna kha.

¹⁵ Sur roh, ram-uihei kha, ram uite hei kha, akapârbi nivomhrui thei rahōnhei kha ansuk manhmang mak hma heia.

Nuhmeinu

¹⁶ Kalungdipa kha keita kae, khana kei hi ama ta eng kae. Ama’n kemōnghei kha lily reipâr hei kâra avei hei

¹⁷ jîngkâr thli kadai in aheisem mak kârseng, jân inthim in asesōt mak hma seng. Hong inle roh, kalungdipa, shangai-che kapōa Bether tlângbung heia kazukche kapōa.