HLAHEI 96 - LEKHARABU INTHENG (BSI)

Chunghnung Reng Pathen

¹ Rōngpu hnenga hlather kha sak ruh! Vânhnōi in Rōngpu hneng sak ruh!

² Rōngpu hneng hla sak ruh khana choi ka-ân ruh! Ama’n ahuk sōtna me ṭong kaṭha ani tina hrimanthang ruh!

³ Alûrna kha phung leh jât-hei kâra hrimanthang ruh, aratha neina ṭōnhei kha mi rakip hneng phôngsōt ruh.

⁴ Rōngpu chu kalen, inshângpena choi ka-ân sik kae; ama hi Pathen rakip hei nek a kaja sik kae.

⁵ Jât rakip hei Pathenhei khachu limsyem rōk hei kae, tâk Rōngpu’n chu marvânhei kha asyem hei.

⁶ Lûrna leh kajana’n akatōmbit, ratha neina leh hmeṭhatna khan A-Bek-inn kha kasip.

⁷ Raleichunga mi rakip in Rōngpu kha choi ka-ân ruh; alûrna leh ahratna kha choi ka-ân ruh.

⁸ Rōngpu rahming kalûr kha choi ka-ân ruh! kutchoi heirôn una a Bek-inna hong ruh.

⁹ A’nthengpa kha ahon’lâr pha leh ahmai kunga inkun ruh; raleichung pumpui ahmai kunga ṭit innok pum a om ruh.

¹⁰ Jât rakip hneng hri ruh, “Rōngpu hi reng kae! Ralei hi hmun kahnettak a ada, inhlingtor mak ning; ama’n mipui chunga kadiktak a ṭong atan sik.”

¹¹ Ralei leh bōirōk inpâk ruh! Tuipui leh ashunga ka-om heirakip ông ruh;

¹² Ram pumpui leh ashunga ka-om rakip inpâk ruh! Khana ratu thōia ka-om thingkung he’m inpâk a ka-ông sik hei

¹³ raleichung vai karôn sik a Rōngpu kha ajōng pha. Ama’n raleichunga amihei kha kadik leh kaṭhatak a vai arôn sik jo hei.