HLAHEI 9 - LEKHARABU INTHENG (BSI)

Pathen Ṭongtan Dik jâra Manpâkna

¹ Kamalung pumpui in Rōngpu, kamanpâk sik che, naṭōntlo det-hla ka-om rakip ke’n kahri manthang sik.

² Nang jâra ke’n inpâktak a hla kasak sik, Chunghnung Pathen, nang manpâkna hla kasak sik!

³ Nang nahong inlâr pha, ka’nrepuihei ankahnung inle hei; katlu heia kathihei.

⁴ Naṭongtan kha intlun, namalung intheng khana kei ka-ôa ṭong natan a kae.

⁵ Nang in khōvelhei namaset hei, mikaṭhamak namanhmang hei, anmani mandonsōtna om nôk mak jo ning.

⁶ Keini inrepuihei ahei tik a sik om mak jo hei; nang in ankhōpuihei nasuk manhmang jo hei, khana anmani mahngi cher kachang jo hei.

⁷ Tâk-kha Rōngpu khachu kumsôt Rengpa kae, ama’n alen in-ongna kha ṭong tanna sik a amatung.

⁸ Ama’n vânhnōi ralei hi dikna vânga vai arôn; ama’n kadik a jât-hei ṭong atan hei.

⁹ Rōngpu kha suk manrima aka-om hei inthupna kae, bōina a-om pha inhukna hmun inkhat kae.

¹⁰ Rōngpu, nang inhret mihei khan antaksen sik che; nahnenga akahong tûte dahlon mak che.

¹¹ Ziona vaikarôn, Rōngpu choi ka-ânna hla sak ruh! Aṭōn leitlo kha jât rakip manthei hei ruh!

¹² Pathen in inreng khōdeng kathei kha amandonsōt hei; anṭana kha mahngi mak, khana anchunga dikmak katlohei kha karâkna apek hei.

¹³ O Rōngpu, eilungset roh! Ani ka-en kada he’n khōdeng anmantheina eng hi jōng enroh! Thina inphut ahuksōt roh, O Rōngpu,

¹⁴ Jerusalem mihei hmaikunga kangir theina sik, khana kachoi ka-ânna che ajâr rakip kahri pek theina sik hei. Nahuksōt eng jâra inpâk sik eng.

¹⁵ Pathen inhret mak he’n khur anchoa khava khan katla inhlut hei, anchâng doa khan anmani kalalen in-ôk hei.

¹⁶ Rōngpu kha aṭongtan kadik vâng khan abinga inlâra kae; khana mikaṭhamak-hei kha anṭōntlo kalalen khan akhit heia kae.

¹⁷ Mikaṭhamak seng leh Pathen kahōt seng tlungna sik khachu thina hi kae.

¹⁸ Akatlâksam hei kha ahei tik a donloa om mak hei ning; Sarahei inhōrna kha ahei tik a sukkhōi changmak ning.

¹⁹ Jōng roh, Rōngpu! Mihring he’n hnōise mak hei che rasoh! Khōvelhei kha mantûp hei ina anṭongtan roh.

²⁰ O Rōngpu, anmani’n ṭit hei rasoh. Anmani akathithei mihring hrep hei kae ti kha manthei hei roh.