HLAHEI 80 - LEKHARABU INTHENG (BSI)

Avea Jât Phun Manhnetna sik Derna

¹ Eh Israelhei Kakhempa, arangei roh; kemōng rup hlamkakeipa, athei pek roh. Mathla kanei ranhringhei chunga, nalen in-ongna chunga a’n-ongpa,

² nalungset kha Ephraim, Benjamin, khana Manasseh phung chunga malâr roh. Nahratna keini amanhmu roh; jōng ina ahuk roh!

³ Aṭhōi male roh, Eh Pathen! Nalungsetna kha eiman hmu roh, khan chu huksōt kachang sik ung!

⁴ Namihei derna chunga heituk chenmo nahnuk nalamannat sik?

⁵ Sâk sik a inrengna kha napek jo ung; in sik a kōklei kalentak a hmit-rathli kha napek jo ung.

⁶ Kankimvea aka-om hei kha kanram chunga re namantlo hei; kan-inrepuihei khan inzak namanpek ung.

⁷ Aṭhōi male roh! Akahratpen Pathen! Nalungsetna kha amanhmu roh, khan chu huksōt kachang sik ung.

⁸ Egypt a inphut vomhrui nahei rôn sōt; jât-hlop hei kha nahnong sōt heia, anram shunga khan naling manhmông jo.

⁹ Ahmôngna sik a ahmun kha namanhleng; arajung kha ralei inthûktak a aṭhō, khava khan aram pumpuia arajung asemsō.

¹⁰ Adaihlim khan hmebunghei kha amakhusō; abâk-hei khan thing kalen cedar kha amakhusō.

¹¹ Abâk-hei kha Mediterranean tui-ôngpui aphâk, khana Euphrates tuidung kapha katlung.

¹² Heisa mo khava akimvea akakurna kha nasuk thlek? Tûnchu khava hmun a se leh hong katlohei khan vomhrui thei kha anmarûktor jo;

¹³ ramvok he’n khavakha anchōn kahnur jo, khana ramsha he’n khopna annei jo.

¹⁴ Kanhnenga he’nhe roh, Akahratpen Pathen! Marvâna inphut ajōng enroh; hong ina nami vahuk hei roh!

¹⁵ Hiva vomhrui kadông, kahnettak, namankek hei hi, hiva vomhrui naling hei hi hong ina vahuk roh.

¹⁶ Kan-inrepuihei khan antuk mathlâk a hmei vâng anro; hnuk kana tak a en hei ina suk manhmang hei roh!

¹⁷ Ratha kahrat sik a nasyem jât-hei, nakadeisōt mihei kha kaṭha da hei ina hrung hei roh.

¹⁸ Nanga inphut inhe nôk hêrmak jo ni’ung; kahringa ada roh, nang kanchoi ka-ân sik che.

¹⁹ Aṭhōi male roh, Chunghnung Rōngpu Pathen! Nalungsetna kha amanhmu roh, khan chu huksōt kachang sik ung.