HLAHEI 77 - LEKHARABU INTHENG (BSI)

Inreng Pha Lungngamna

¹ Inhnaktak a Pathen hneng kaṭap eng; Inhnaktak a kaṭap eng, khana ama’n athei pek eng.

² Khōdeng kathei pha, Rōngpu hneng kader; jân kathang kakut kamadoa kader, tâk lungngamna hmutor mak eng.

³ Pathen kha kamandon pha, inrengber eng; ama kha kamandon pha, malung tlâkna kanei.

⁴ Ama’n kei, jân kathang amanṭhang eng; kamalung kachâm reia ṭongtor mak eng.

⁵ Akathlengsa kanihei kha kamandon khana hmalaia kum kathlengsa hei kha kamandon hei.

⁶ Mandonna inthûktak a jân kha kahmang; kamandona, hivahi kabinga inderna kanei:

⁷ “Rōngpu’n ahlon sōt ṭhak sik jo me mo? Nichunga tlai hêrmak jo ning mo?

⁸ Alungsetna me kha akabâng jo mo? A’ntepna kha akangir mak jo mo?

⁹ Pathen in lungset pui katluk achang sik kha amahngi jo mo? Alungsetna hmun kha hnuknat in ahlō jo mo?”

¹⁰ Khava sōa ke’n kati, “Kamalung atônna pen chu– Pathen in ratha hratna neimak jo ti hi kae.”

¹¹ Naṭōn kalen tlo kha kamandonsōt sik, Rōngpu; hmalaia naṭōn inlak leitlo hei kha kamandon sik hei.

¹² Naleitlo heirakip chunga kamandon sik; naṭōn kahrâng tlohei rakip kha lungria karôn sik hei.

¹³ Eh Pathen, natlo rakip hei kha a’ntheng rōk kae. Nang kapōa akalen Pathen lak om mak.

¹⁴ Ṭōn-inlak katlo Pathen kha nang che kae; jât-hlop hei kâra narathahrat kha namalâr.

¹⁵ Nahratna vâng namihei, Jacob leh Joseph sōn leh pârhei kha nahuksōt hei.

¹⁶ Eh Pathen, tuihei khan anhmu che pha kaṭi hei, khana tui-ôngpui inthûk khan innok a kae.

¹⁷ Sumtuk he’n sûrtui anjōngbun; bōirōk a inphut khōjang kapōk, ramkei rakip a khō inphea kae.

¹⁸ Nakhō inri kha thlisip in akaje, nakhō inphe khan vânhnōi ajōngsat manvâr; ralei kha akatlira amannok.

¹⁹ Tuipui in-nông chunga kalôn che; tui-ôngpui inthûk narakan, tâk nakebi chu inhmu tor mak.

²⁰ Kemōng kakhem kapōa namipuihei kha, Moses leh Aaron nanganse heia naṭhōi hei.